SİYASƏT


Corc Dik: Azərbaycandakı tolerantlıq digər ölkələrə nümunə ola bilər

Bakı, 23 fevral, AZƏRTAC

Fevralın 23-də Milli Məclisin Azərbaycan-İsrail parlamentlərarası əlaqələr üzrə işçi qrupunun rəhbəri Anatoliy Rafailov İsrailin Azərbaycandakı səfiri Corc Dik ilə görüşüb.

Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildiriblər ki, deputat qonağı salamlayaraq ölkələrimiz arasındakı dostluq münasibətlərindən söz açıb. Azərbaycan və İsrail dövlət rəhbərlərinin yüksək səviyyəli münasibətlərinin bütün sahələrdə əməkdaşlığın inkişafında mühüm rol oynadığını deyib. O bildirib ki, bir çox dinlərin və millətlərin vətəni olan Azərbaycanı yəhudilər də ta qədimdən vətən seçib, uzun illər burada sülh və əmin-amanlıq şəraitində yaşayıblar.

Anatoliy Rafailov Milli Məclisin Azərbaycan-İsrail parlamentlərarası əlaqələr üzrə işçi qrupunun rəhbəri kimi İsrail parlamenti ilə münasibətlərin perspektivləri ilə bağlı fikirlərini bölüşüb. Söhbət zamanı bu sahədə əməkdaşlığı gücləndirmənin vacibliyi qeyd olunub. Bildirilib ki, Azərbaycan ilə İsrail arasında zamanın sınağından keçmiş və qarşılıqlı hörmətə, hər iki ölkənin milli maraqlarına əsaslanan bu münasibətlərin daha da inkişafı üçün kifayət qədər potensial var.

İsrailin Azərbaycandakı fövqəladə və səlahiyyətli səfiri Corc Dik iki ölkə arasında mövcud olan əlaqələrin gələcəkdə də davam etdiriləcəyinə inamını ifadə edib. Səfir Azərbaycanın yəhudi icması ilə tanışlığının onda böyük təəssürat yaratdığını, buradakı tolerantlığın başqa ölkələrə nümunə ola biləcəyini diqqətə çatdırıb. Corc Dik multikulturalizmin Azərbaycan cəmiyyətinin mühüm tərkib hissəsi olduğunu qeyd edib.

İsrail səfiri Azərbaycanın Ermənistanın təcavüzünə məruz qaldığı uzun illər ərzində, müharibədə qalib gəldiyi hazırkı vaxtda da öz dəyərlərinə sadiq qalmasını yüksək qiymətləndirib. Müharibə vaxtı bombalanan Gəncəyə səfərini xatırladan səfir Azərbaycanın müharibə acılarına şərik olduğunu bildirib.

Görüşdə dövlətlərimiz, parlamentlərimiz və xalqlarımız arasındakı zamanın sınağından çıxan dostluğun inkişafının gələcək istiqamətləri ilə bağlı fikir mübadiləsi aparılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.