ELM VƏ TƏHSİL
Cümhuriyyət tariximiz qürurumuzdur
Bilik Fondu Azərbaycan Xalq Cümhuriyyətinin 100 illiyi ilə bağlı silsilə tədbirlər təşkil edir
Bakı, 29 may, AZƏRTAC
Prezident İlham Əliyevin “Azərbaycan Xalq Cümhuriyyətinin 100 illik yubileyi haqqında” 2017-ci il 16 may tarixli Sərəncamından irəli gələn tələblər Azərbaycan Respublikasının Prezidenti yanında Bilik Fondu tərəfindən uğurla həyata keçirilir. Belə ki, Bilik Fondu 2018-ci ilin ölkəmizdə “Azərbaycan Xalq Cümhuriyyəti İli” elan olunduğunu nəzərə alaraq, Şərqdə ilk dəfə qurulan demokratik respublika haqqında əhalinin daha dolğun bilgilərlə təmin olunması məqsədilə silsilə tədbirlər təşkil edir. Bu tədbirlər həm məzmununa, həm coğrafiyasına, həm də xarakterinə görə müxtəlifliyi ilə seçilir.
AZƏRTAC Bilik Fondunun informasiya təminatı sektorunun müdiri Xatirə Hüseynova və mətbuat katibi Ceyhun Musaoğlunun həmin tədbirlərlə bağlı müsahibəsini təqdim edir:
- Yəqin ki, Cümhuriyyətə həsr olunan tədbirləriniz hər hansı plana əsasən reallaşır. Bu barədə nə deyə bilərsiniz?
- X.Hüseynova: Əlbəttə. Prezident İlham Əliyevin 2018-ci il 10 yanvar tarixli Sərəncamından sonra Bilik Fondunun idarə heyəti toplandı. Müzakirələr nəticəsində belə qərara gəldik ki, əvvəlcə fondun əməkdaşları Cümhuriyyət barədə maariflənsinlər. Beləliklə, Azərbaycan Respublikasının Prezidenti yanında Dövlət İdarəçilik Akademiyası tarix kafedrasının müdiri, tarix üzrə fəlsəfə doktoru, dosent Firdovsiyyə Əhmədova qonağımız oldu və demokratik respublikamız haqqında çox maraqlı bilgilər əldə etdik. Bu bilgilər əməkdaşlarımızın alim və mütəxəssislərlə birgə keçirdikləri görüşlərdə, təqdimatlarda gərəyimiz oldu.
- C.Musaoğlu: Firdovsiyyə xanım bizimlə faktlara əsaslanan bilgilərini bölüşdü. Müzakirələrin nəticəsi olaraq “Cümhuriyyət tariximiz - qürurumuzdur” layihəsini hazırladıq və bu təşəbbüs çərçivəsində yola çıxdıq. Ümumiyyətlə, Bilik Fondu bütün maarifləndirici tədbirləri qabaqcadan hazırlanmış və idarə heyəti tərəfindən təsdiq olunmuş proqramlar çərçivəsində həyata keçirir.
- X.Hüseynova: Cümhuriyyətə həsr olunan tədbirlərimiz davam etməkdədir. İndiyədək 70-ə yaxın tədbir keçirmişik. Müxtəlif rayonlardan gələn sosial sifarişlər onu deməyə əsas verir ki, bu rəqəmi ilin sonunadək ən azı 100-ə çatdıracağıq. Keçirdiyimiz tədbirlərin altısı elmi-təcrübi, ikisi beynəlxalq konfrans, biri isə “dəyirmi masa” formatında olub. Digərləri mühazirələr, film nümayişləri, kitab təqdimatlarıdır.
- C.Musaoğlu: Konfranslara bir sıra dövlət qurumları da dəstək verib. Belə ki, “Azərbaycan Xalq Cümhuriyyəti – milli dövlətçiliyin ideya əsasları və müasirlik” mövzusundakı elmi konfrans Azərbaycan Milli Elmlər Akademiyasının (AMEA) Fəlsəfə İnstitutu, “Cümhuriyyət tariximiz - qürurumuzdur” mövzusundakı konfrans AMEA-nın A.Bakıxanov adına Tarix İnstitutu və Şabran Rayon İcra Hakimiyyəti, “Soyqırımı hadisələri müasir elmi araşdırmalarda” mövzusundakı beynəlxalq elmi konfrans Tbilisidəki M.F.Axundzadə adına Azərbaycan Mədəniyyəti Muzeyi, Azərbaycanın Gürcüstandakı səfirliyi və Gürcüstan Milli Elmlər Akademiyası, “Heydər Əliyev və müasir Azərbaycan” mövzusundakı elmi-praktiki konfrans Şamaxı Rayon İcra Hakimiyyəti, “Cümhuriyyətimizin 100 ili” mövzusundakı elmi-praktiki konfrans Şabran Rayon İcra Hakimiyyəti tərəfindən dəstəklənib. “Azərbaycan: müasirlik və gələcəyin qovuşuğunda” üçüncü beynəlxalq şagird konfransı və “Azərbaycan Cümhuriyyəti gənclərin gözü ilə” mövzusunda elmi-praktiki konfrans isə Bilik Fondunun təşkilatçılığı ilə keçirilib.
- X.Hüseynova: Konfranslarda həm yerli, həm də xarici ölkələrdən gələn alimlərin məruzələri dinlənilib. İştirakçılar Cümhuriyyət dövrünün araşdırılaraq öyrənilməsi və təbliğinə xidmət edən çıxışları böyük maraqla qarşılayıblar. Alimlər ilk demokratik dövlətin türk dünyasına nümunə olduğunu bildiriblər. Tədbirlərdə geniş fikir mübadiləsi aparılıb, tarixi reallıqlardan həm də nəticə çıxarılması tövsiyə olunub. Əsas məqsədimiz ictimaiyyəti maarifləndirməkdir və demək olar ki, hər dəfə bu məqsədimizə nail ola bilirik.
- C.Musaoğlu: Yeri gəlmişkən, mayın 21-də AMEA-nın Neft və Qaz İnstitutunun Gənc Alim və Mütəxəssislər Şurası üzvlərinin iştirakı ilə “Azərbaycan Xalq Cümhuriyyəti dövründə neft amili” mövzusunda Azərbaycan Dövlət Neft və Sənaye Universitetinin nəzdində Bakı Neft-Energetika Kollecində “dəyirmi masa” təşkil etdik. Tədbirdə institutun gənc alimlərinin maraqlı məruzələri dinlənildi. Kollecin rəhbərliyi bu məruzələrdən dərs prosesində də istifadə olunacağını vurğuladı. Bu yanaşmadan çox razı qaldıq. Deməli, gördüyümüz işin həqiqətəm də bir nəticəsi oldu.
- Bəs mühazirələriniz hansı bölgələri əhatə edib?
- X.Hüseynova: 2018-ci ilin yanvarından etibarən Bilik Fondu Oğuz, Xızı, Şamaxı, İsmayıllı, Şəmkir, Şabran, Salyan, Quba, Qusar, Cəlilabad, Masallı, Abşeron rayonları və Gəncə şəhərində, paytaxtın Binəqədi, Suraxanı, Xəzər, Səbail, Nizami, Yasamal, Xətai, Sabunçu, Qaradağ, Nəsimi, Nərimanov rayonlarında, eləcə də Türkiyə, Rusiya və Gürcüstanda alim və tədqiqatçıların, deputatların və tanınmış jurnalistlərin mühazirələrini təşkil edib. Bu mühazirələrin təşkilində fondun yerli nümayəndələri və bilik evləri yaxından iştirak ediblər. Mühazirələrdən faydalananların sayı 10 mini keçib. Fondun monitorinq və proqnozlaşdırma qrupu və Sosioloji Sorğu Mərkəzi tədbirlərin monitorinqini aparıb, iştirakçılar arasında sorğular keçirib. Məlum olub ki, “Azərbaycan Xalq Cümhuriyyətindən müstəqil Azərbaycan Respublikasına aparan 100 il”, “Azərbaycan Xalq Cümhuriyyətinin Azərbaycanın dövlətçilik tarixində yeri və rolu”, “Azərbaycan Xalq Cümhuriyyəti: milli dövlətçiliyin ideya əsasları və varislik”, “Cümhuriyyət tariximiz və müasirlik”, “Cümhuriyyət parlamentinə gedən yol”, “Azərbaycan Xalq Cümhuriyyətinin mədəniyyət siyasəti”, “Müasir Azərbaycan - Azərbaycan Xalq Cümhuriyyətinin varisidir”, “Azərbaycan Xalq Cümhuriyyəti dövründə elm və təhsil”, “Azərbaycan Xalq Cümhuriyyətinin beynəlxalq əlaqələri”, “AXC dövründə qadınlar”, “Tarixin 100 ili – 100 ilin tarixi”, “Cümhuriyyət dövrü ədəbiyyatı və onun təmsilçiləri”, “Maarifçilikdən Xalq Cümhuriyyətinə: siyasi-fəlsəfi aspektlər”, “Azərbaycan Xalq Cümhuriyyəti sənədli filmlərdə”, “Azərbaycan Xalq Cümhuriyyəti Azərbaycan ədəbiyyatında”, “Əhməd Cavad - istiqlalımızın tərənnümçüsü”, “Cümhuriyyət dövrü və mətbuat”, “Cümhuriyyət dövründə musiqi” və digər adını çəkmədiyim mövzular dinləyicilərin böyük marağına səbəb olub.
- Mühazirələri maraqla qarşılanan alimlər barədə nə deyə bilərsiniz?
- C.Musaoğlu: Əvvəlcədən onu deyim ki, Bilik Fondunun lektorlar qrupunun üzvləri olan alim və mütəxəssislərin sayı 400-dən artıqdır. Biz onların hər birinə yüksək dəyər və qiymət veririk. Sadəcə çıxışları ilə auditoriyanın marağına səbəb olan bir neçə lektorun adını xüsusilə çəkmək olar. Alim və tədqiqatçılardan Möhsün Nağısoylu, Misir Mərdanov, İlham Məmmədzadə, Anar İsgəndərli, Tofiq Mustafazadə, Alxan Məmmədov, Firdovsiyyə Əhmədova, Qalib Sayılov, Yeganə İsmayılova, Nuridə İsmayılova, Nardanə Yusifova, Boran Əziz, Mətanət Şəkixanova, Milli Məclisin deputatları Aydın Mirzəzadə, Hikmət Babaoğlu, KİV rəhbərləri Rəşad Məcid, İlham Quliyev, Vüqar Rəhimzadə, Akif Aşırlı auditoriyanın həsrətlə gözlədiyi mühazirəçilərimizdəndir.
- Bəs hansı filmlərin təqdimatlarını keçirmisiniz? Cümhuriyyət ilinə həsr edilən nəşrləriniz olubmu?
- X.Hüseynova: Bilik Fondu ilə “ARB Aranfilm” studiyası arasında əməkdaşlıq çərçivəsində sənədli filmlərin mütəmadi olaraq müxtəlif məkanlarda nümayişini təşkil etmişik. “Sarmaşıqlı məzarlar”, “Parisdən məktublar”, “Gizli istiqlalçılar”, “Həqiqətin özü”, “Düdəngədən Münhenə” filmləri tamaşaçıların böyük marağına səbəb olub. KİV bütün bu təqdimatları geniş şəkildə işıqlandırıb.
- C.Musaoğlu: Bilik Fondunun ölkədaxili layihələr sektoru tərəfindən “Azərbaycan Xalq Cümhuriyyəti: 100 suala 100 cavab” məlumat kitabçası tərtib edilib və tarixçi alimlər tərəfindən çapa tövsiyə olunub. Bununla yanaşı, Cümhuriyyətə həsr olunmuş şagird konfransının materialları da nəşrə hazırdır.
- X.Hüseynova: Həmin sektorun nəzdində fəaliyyət göstərən Sosioloji Sorğu Mərkəzi ölkənin müxtəlif bölgələrindəki bir sıra orta, orta-ixtisas və ali məktəblərdə təhsil alan yüzlərlə yeniyetmə və gəncin iştirakı ilə “Gənclikdən soraq” layihəsi çərçivəsində “Azərbaycan Xalq Cümhuriyyəti haqqında bildiklərimiz” mövzusunda bilik yarışmaları keçirir. Maarifləndirici tədbirlərimiz davam etdirilir. Bilik Fondunun dəstəyi ilə Oğuz, Qax, Şəmkir, İsmayıllı, Ağdaş, Astara, Ağstafa, Tərtər və Nardaran bilik evlərində, Bilik Fondunun nəzdində fəaliyyət göstərən “Tariximizi öyrənək və öyrədək” Gənclər Klubu və “Gənc jurnalistlər” Klubunda tədbirlərin mütəmadi təşkili üçün hazırlıq işləri aparılır.
“Azərbaycan Xalq Cümhuriyyəti İli”nin başa çatmasına hələ çox var. Qarşıda bizi yeni konfranslar və elmi seminarlar, silsilə mühazirələr və müzakirələr, film və kitab təqdimatları, intellektual müsabiqələr və elmi turlar gözləyir. Alim və tədqiqatçıları qürurumuz olan Cümhuriyyət tariximizlə bağlı maarifləndirmə işində bizə dəstək göstərməyə, gənclərimizi bu dəstəkdən faydalanmağa çağırırıq.