SİYASƏT
DAXİLİ İŞLƏR NAZİRLİYİ VƏ RESPUBLİKA PROKURORLUĞU MƏTBUAT XİDMƏTLƏRİNİN MƏLUMATI
Azərbaycan Respublikasının Prezidenti cənab Heydər Əliyevin ölkədə cinayətkarlıqla mübarizənin daha da gücləndirilməsi, cinayət törədərək istintaqdan qaçıb gizlənənlərin tapılıb-tutulması və cinayət məsuliyyətinə cəlb edilməsi, vətəndaşların konstitusion hüquqlarının daim qorunması ilə bağlı hüquq-mühafizə orqanları qarşısında qoyduğu tələblərin icrası uğurla davam etdirilir.
Məlum olduğu kimi, bu il iyulun 30-da saat 4.30 radələrində avtomat silahlarla silahlanmış 3 nəfər naməlum şəxs Daxili İşlər Nazirliyi Daxili Qoşunlarının Zaqatala rayonunun Qala adlanan ərazisində yerləşən hərbi hissəsinin növbətçi hissəsinə basqın edərək qərargahın çaparı, sıravi Rəhmanov Şöhrət Vəfa oğluna baş nahiyyəsindən avtomatın qundağı ilə xəsarət yetirmiş, növbətçi kapitan Vəliyev Bakir Yusif oğlunu öldürməklə hədələyib silah otağının açarını tələb etmişlər. Lakin müqavimətə rast gəldiklərindən atəş açaraq onu yaralayıb hadisə yerindən qaçmışlar. B.Vəliyev aldığı yaradan hospitalda vəfat etmişdir.
Əhali arasında çaşqınlıq, dövlətə, xüsusilə hüquq-mühafizə orqanlarına qarşı inamsızlıq yaratmaq məqsədi güdən bu ağır cinayət əməli nəinki rayonda, bütövlükdə respublikada geniş ictimai rezonans doğurmuşdur. Aparılmış əməliyyat-axtarış və istintaq tədbirləri nəticəsində bu ağır cinayəti törədən şəxslər müəyyən olunmuşdur. Onlardan Zaqatala rayon sakini İslam Xiniyev həbs olunmuş, Emin Bakkayev isə Rusiya Federasiyasının Dağıstan Respublikası Daxili İşlər Nazirliyi əməkdaşları ilə keçirilən tədbirlər nəticəsində Mahaçqala şəhərində yaxalanmışdır. Onun Azərbaycana gətirilməsi üçün müvafiq tədbirlər görülür.
İbtidai istintaq zamanı aparılmış axtarışlar nəticəsində həmin bandaya məxsus olan döyüş sursatının bir qismi – bir ədəd F-1 qumbarası, 2 plastmas butulkada partlayışa hazırlanmış trotil partlayıcısı, çoxlu sayda 5,45 və 7,62 mm, kalibrli avtomat və pulemyot patronları, banda üzvlərinin istifadə etdikləri maskalar və bıçaqlar aşkar edilmişdir. Cinayətin törədilməsində iştirakçı olan digər şəxslər də müəyyən olunmuş, onların tapılıb-tutulması üçün əməliyyat-axtarış və istintaq tədbirləri davam etdirilir.
Ağır cinayət törədərək layiq olduğu cəzadan yayınmağa çalışanların müəyyənləşdirilərək istintaqa cəlb edilməsinə dair başqa bir fakt.
21 iyul 2001-ci il tarixdə evinə qayıtmayan Bakı şəhər sakini Əfəndiyev Əhməd Əlibala oğlunun evinə və iş yerinə həmin gündən sonra çoxsaylı zənglər edilərək onun avtomobil qəzasına düşməsi, hazırda müalicə olunduğu bildirilirdi. Avqustun 2-dəƏ.Əfəndiyevin evinə növbəti zənglə müalicə üçün 100 min ABŞ dolları məbləğində pul tələb edilmişdir. Keçirilən istintaq-əməliyyat tədbirləri nəticəsində müəyyən olunmuşdur ki, Əhməd Əfəndiyev iyulun 21-də Bakı şəhər sakini Mirzəxan Cəfərov və onun Cəlilabad rayonunun Pokrovka kəndində yaşayan qardaşı Mirzəcan tərəfindən Abşeron rayonu ərazisində mübahisə zəminində öldürülmüş, meyiti yandırılmış, qalıqları isə basdırılmışdırs. Məhkəmə-tibb ekspertinin iştirakı ilə aparılan istintaq eksperimenti və digər istintaq hərəkətləri nəticəsində qardaşlar təkzibedilməz sübutlar qarşısında aciz qalaraq təqsirlərini etiraf etmişlər. Hər iki şəxs həbs olunmuşdur.
Son vaxtlar əhalidə qanunsuz saxlanan minlərlə odlu silahın, külli miqdarda döyüş sürsatının yığılmasına, könüllü təhvil verilməsinə baxmayaraq, təəssüf ki, yenə də odlu silahdan istifadə edilməklə ağır cinayətlər törədilir. Lakin bu istiqamətdəpeşəkarlıqla həyata keçirilən əməliyyat-istintaq tədbirləri bir tərəfdən onu törədənlərin layiqli cəzalandırılmasına imkan verir, digər tərəfdən yeni-yeni cinayətlərin qarşısını alır, neçə-neçə insanı, onun əmlakını cinayətkar qəsdlərdən xilas edir.
Bu günlərdə Samux rayonu ərazisində silahlı qarətlə məşğul olan 2 şəxs həbs olunmuşdur. Hər ikisi Samux rayon sakini olan Vladim Bağırov və Feyzulla Abbasov avtomat silahla bölgənin ayrı-ayrı kəndlərində öz cinayətkar əməllərini həyata keçirirdilər. Tutularkən onlardan AKS markalı avtomat silah, 26 ədəd avtomat patronu və bir ədəd avtomat sandığı götürülmüşdür.
İyul ayının 14-də İsmayıllı rayonunun Kürdmaşı kəndindəki avtomat telefon stansiyasını qarət edənlər də silahlı olmuşlar. Həyata keçirilmiş tədbirlər nəticəsində bu cinayəti törədənlər – Bakı şəhər sakinləri, əvvəllər məhkum olunmuş Asif Mirzəyev və Qurban Məmmədov, Kürdəmir rayon sakini Həsrət Səfərov, Mingəçevir şəhər sakini Asif Əliyev müəyyən edilərək yaxalanmışlar. Tutularkən onlardan bir ədəd “Volter” tipli tapança götürülmüşdür. Bu çinayət işinin istintaqı zamanı həmçinin müəyyən edilmişdir ki, həmin şəxslər bir gün əvvəl Ağsu rayonunun İlxıçı və Muradxanlı, daha əvvəllər isə Ağdaş rayonunun Qaradağlı, Kükəl, Şəmkir rayonunun Seyfəli kəndlərində eyni xarakterli çinayətlər törətmiş, nəticədə qiymətli rabitə avadanlığı oğurlamaqla dövlətə külli miqdarda maddi ziyan vurmuş, bu istiqamətlərdə normal iş rejimi pozulmuşdur.
Qrup halında törədilən və nəticədə daha çox vətəndaşın zərər çəkdiyi bir cinayətin üstünün açılması nəticəsində müxtəlif vaxtlarda Ğəncə, İsmayıllı və Ağsu bölgələrində ayrı-ayrı şəxslərdən üst-üstə 200 baş xırdabuynuzlu mal oğurlayan dəstə ifşa olunmuşdur. Faktla bağlı istintaq-əməliyyat tədbirləri davam etdirilir.
Əvvəlki illərdə törədilməklə uzun illər bağlı qalan ağır cinayətlərin açılması istiqamətində də uğurlu tədbirlər həyata keçirilmişdir. 1995-ci ilin noyabrında Balakən rayon polis şöbəsinə hücumda iştirak edən dəstənin indiyədək axtarışda olan sonuncu üzvü – Eyvaz Qebeyev həbs olunmuşdur. Elçin Əmiraslanovun cinayətkar dəstəsinin üzvü və dövləti cinayətdə təqsirli bilinərək axtarışda olan Ceyhun Mustafayev Rusiyanın Tula, Azərbaycan Respublikası cinayət məcəlləsinin eyni maddəsi ilə təqsirli bilinən Yusif Əşrəfov isə Qazaxıstanın Çimkənd şəhərində yaxalanmışdır.
Narkotik maddələrin qanunsuz dövriyyəsi, narkotik vasitələrin satılması hallarının aşkarlanması da diqqət mərkəzində olmuş, bitki mənşəli narkotiklərin xammal bazasının ləğv edilməsi məqsədi ilə səmərəli əməliyyat-istintaq tədbirləri keçirilmişdir.
Belə ki, İran İslam Respublikasının vətəndaşı Adil Əhmədi Qəmbər 30 iyun 2001-ci il tarixdə 8-ci kilometr qəsəbəsindəsatış məqsədi iləəldə etdiyi 2 kiloqram 100 qram narkotik vasitə olan həşişi 2 min 400 ABŞ dollarına satarkən Daxili İşlər Nazirliyi Narkotiklərlə Mübarizə İdarəsi əməkdaşlarının keçirdiyi tədbir nəticəsində tutulmuşdur.
Sumqayıt şəhər polis idarəsinin bu günlərdə həyata keçirdiyi tədbir də uğurla nəticələnmişdir. Sumqayıt şəhər sakini Rasim Qurbanovdan güclü təsiredici narkotik vasitə olan 1 kiloqramdan çox heroin götürülmüşdür.
Bakı şəhər sakini Ənvər Həsənov bu il avqustun 3-də Yasamal rayon polis idarəsinəərizə ilə müraciət edərək bildirmişdir ki, 30 iyul 2001-ci il tarixdə naməlum şəxs telefonla zəng edərək qızı Aytən Həsənovanı oğurladığını demiş, onun azad olunması üçün 100.000 ABŞ dolları tələb etmiş, əks təqdirdə qızı öldürəcəyi ilə hədələmişdir. Bakı Şəhər Baş Polis İdarəsi və Yasamal rayon polis idarəsi əməkdaşlarının dərhal həyata keçirdikləri əməliyyat-axtarış tədbirləri nəticəsində qızın gizlədildiyi yer müəyyən edilmiş və o girovluqdan azad olunmuşdur. İlkin araşdırmalar zamanı müəyyən edilmişdir ki, Aytən Həsənovanı Canpolad Cahangirov adlı şəxs oğurlayaraq mənzilində saxlamış, azad olunması üçün valideynlərinə və qohumlarına dəfələrlə zəng vuraraq pul tələb etmiş, əks təqdirdə onu öldürəcəyi ilə hədələmişdir. Canpolad Cahangirov elə həmin gün həbs edilmişdir. Faktla bağlı cinayət işi qaldırılaraq istintaq aparılır.
Daxili İşlər və Prokurorluq Orqanları qanunçuluğun və hüquq qaydalarının möhkəmləndirilməsi, cinayətkarlıqla mübarizə və ictimai təhlükəsizliyin qorunması istiqamətində uğurlu əməliyyat-axtarış və istintaq tədbirlərini davam etdirirlər.