SİYASƏT
DAXİLİ İŞLƏR ORQANLARININ VƏ DAXİLİ QOŞUNLARIN ŞƏXSİ HEYƏTİ DÖVLƏTÇİLİYİMİZƏ VƏ MÜSTƏQİLLİYİMİZƏ BUNDAN SONRA DA SADİQ OLACAQDIR
İclası giriş sözü ilə açan daxili İşlər naziri, general-polkovnik Ramil Usubov bildirmişdir ki, cinayətkarlığa qarşı mübarizə sahəsində ötən illərdə əldə olunmuş nailiyyətlər qorunub saxlanmış, bu iş əvvəlki illərə nisbətən daha yaxşı təmin edilmişdir. Ümummilli liderimiz, Azərbaycan xalqının böyük oğlu Prezident Heydər Əliyevin son on illik rəhbərliyi dövründə ölkəmizdə sabitlik, əmin-amanlıq bərqərar olmuş, dövlətçiliyimiz daha da möhkəmləndirilmişdir.
2003-cü il həm də xalqımız üçün ən kədərli illərdən biri oldu. Azərbaycan onu beynəlxalq aləmdə tanıdan, böyük şəxsiyyəti, dünyanın ən böyük siyasətçilərdən birini itirdi. Lakin Heydər Əliyevin əziz xatirəsi qədirbilən xalqımızın qəlbində əbədi yaşayacaq, onun ideyaları Azərbaycanın inkişafına bundan sonra da yol göstərəcəkdir.
Azərbaycanın ümummilli lideri Heydər Əliyevin əziz xatirəsi bir dəqiqəlik sükutla yad olundu.
Sonra general-polkovnik Ramil Usubovun “2003-cü ildə cinayətkarlıqla mübarizə və ictimai təhlükəsizliyin təmini üzrə respublika daxili işlər orqanlarının fəaliyyətinin nəticələri və qarşıda duran vəzifələr haqqında” geniş məruzəsi dinlənildi. Nazir dedi ki, ölkəmizin taleyində, onun ictimai-siyasi və mənəvi həyatında misilsiz xidmətləri olan ümummilli liderimiz Heydər Əliyevin rəhbərliyi ilə aparılan geniş quruculuq işləri, sosial-iqtisadi və siyasi-hüquqi islahatlar 2003-cü ildə də davam etdirilmiş, ictimai həyatımızın bütün sahələrində müsbət göstəricilər əldə olunmuşdur. Həyata keçirilmiş bir sıra təşkilati-praktiki tədbirlər nəticəsində cinayətkarlıqla mübarizə, ictimai təhlükəsizliyin təmin olunması, insan hüquq və azadlıqlarının müdafiəsi, sabitliyin qorunması işində də uğurlu nəticələr qazanılmışdır.
Nazir ölkəmizdə iqtisadiyyatın inkişafı, xalqın sosial vəziyyətinin yaxşılaşdırılması sahəsində görülən tədbirləri xatırlatdı, ötən il keçirilmiş Prezident seçkilərində xalqın Heydər Əliyev siyasi xəttinin layiqli davamçısı İlham Əliyevə səs verməsini ən düzgün addım kimi qiymətləndirərək dedi ki, məhz Prezident İlham Əliyevin ilk gündən qəbul etdiyi qərarlar, nəzərdə tutulmuş geniş quruculuq işləri xalqımızın gələcək rifahına zəmanət verir.
O vurğuladı ki, ötən il daxili işlər orqanları tərəfindən aparılmış zəruri təşkilati və əməliyyat-axtarış tədbirləri nəticəsində cinayətkarlıqla mübarizənin gücləndirilməsi, ictimai təhlükəsizliyin təmin olunması, qanunçuluğun və hüquq qaydalarının möhkəmləndirilməsi sahəsində qarşıda duran vəzifələr müvəffəqiyyətlə yerinə yetirilmişdir. Görülmüş əməli tədbirlər nəticəsində cinayətlərin ümumi sayı 2 faiz, o cümlədən şəxsiyyət əleyhinə cinayətlər 3,9 faiz, ictimai təhlükəsizlik və ictimai qayda əleyhinə cinayətlər 1,4 faiz, dövlət hakimiyyəti əleyhinə olan cinayətlər 12,9 faiz azalmışdır. Cinayətlərin digər növlərinin dinamikasında da müsbət dəyişikliklər baş vermişdir. Qəsdən adamöldürmələr 13,7 faiz, hədə-qorxu ilə tələbetmələr 33,9 faiz, quldurluq 10,4 faiz, soyğunçuluq 7,7 faiz, mal-qara oğurluqları isə 8,7 faiz azalmışdır.
Hesabat dövründə mütəşəkkil cinayətkarlığa qarşı aparılan mübarizə işi daha məqsədyönlü xarakter almış, Zaqatala-Balakən bölgəsində bir sıra ağır və xüsusilə ağır cinayətlər, o cümlədən silahlı quldur basqını törətmiş iki cinayətkar dəstə zərərsizləşdirilmişdir. Ümumiyyətlə, respublika üzrə qrup halında 1594 cinayət baş vermiş, bu cinayətlər üzrə 3408 cinayətkar zərərsizləşdirilmişdir. Nəticədə qrup şəklində törədilən cinayətlərin sayı 10 faiz azalmışdır.
Nazir xüsusi vurğuladı ki, Azərbaycanda 2002-ci illə müqayisədə əhalinin hər yüz min nəfərinə düşən cinayətlərin sayı 194-dən 185-ə enmişdir ki, bu da MDB məkanında ən yaxşı göstəricidir. Cinayət-axtarış xətti üzrə qeydə alınmış cinayətlərin 93,8 faizi, onların ağır və xüsusilə ağır növlərinin isə 92 faizi açılmışdır.
Axtarılan 5124 nəfər, o cümlədən MDB ölkələrində gizlənmiş 345 nəfər, habelə dövlət hakimiyyəti əleyhinə cinayətlər törətmiş 8 nəfər respublikaya gətirilərək, məhkəmə məsuliyyətinə cəlb olunmuşlar. MDB ölkələri tərəfindən axtarılan 60 nəfər cinayət törədən şəxs respublikamızda tutularaq həmin dövlətlərə təhvil verilmişdir.
Ötən il qanunsuz saxlanılan 2035 odlu silah, 257 minə yaxın döyüş sursatı götürülmüş, bu sahədə cinayətlərə görə 123 nəfər məsuliyyətə cəlb olunmuşdur. Bu tədbirlər öz bəhrəsini vermiş, nəticədə odlu silahlarla törədilən cinayətlərin sayı 33,3 faiz azalmışdır.
Narkotiklərlə mübarizə işi Ümummilli Proqram əsasında qurulmuş, ötən il qanunsuz dövriyyədən 161 kiloqrama yaxın, yəni 2002-ci illə müqayisədə 70 kiloqramdan çox müxtəlif narkotik vasitə, həmçinin belə vasitələrin hazırlanmasında istifadə edilən 861 kiloqram xammal götürülmüş, 291 tona yaxın narkotik tərkibli bitki aşkar olunaraq məhv edilmişdir. Narkotiklərin qanunsuz dövriyyəsi ilə bağlı cinayətlərə görə 1827 nəfər məsuliyyətə cəlb olunmuşdur.
Nazir cinayətkarlıqla mübarizədə, o cümlədən silahlı quldur dəstələrinin zərərsizləşdirilməsində, ictimai-siyasi sabitliyin dönməzliyinin saxlanılmasında, bütövlükdə hüquq qaydalarının təmin edilməsində DİN-in Daxili Qoşunlarının şəxsi heyətinin böyük əməyinin olmasını da xüsusi vurğuladı.
R.Usubov ötən il görülən işlər və qazanılan uğurlarla yanaşı, daxili işlər orqanlarının əməliyyat xidməti fəaliyyətində bir sıra nöqsan və çatışmazlıqların olduğunu da təəssüflə bildirdi, onların aradan qaldırılması barədə konkret tapşırıq və tövsiyələr verdi.
Daxili işlər naziri iştirakçılar adından Azərbaycan Prezidenti, Silahlı Qüvvələrin Ali Baş Komandanı İlham Əliyevi əmin etdi ki, dövlətçiliyimizə və müstəqilliyimizə daim sadiq olan, son 10 ilin bütün çətinliklərindən, sınaqlarından əzmlə çıxmış, zəngin təcrübə toplayaraq daha da mətinləşmiş, böyük potensiala malik daxili işlər orqanlarının və Daxili Qoşunların şəxsi heyəti 2004-cü ildə də cinayətkarlıqla mübarizə və ictimai təhlükəsizliyin qorunması sahəsində daha böyük uğurlara və yüksək göstəricilərə nail olacaq, dövlətin ali məqsədi olan insan hüquq və azadlıqlarının müdafiəsini yüksək səviyyədə təmin edəcəkdir.
Azərbaycan Respublikası Prezidentinin İcra Aparatının hüquq-mühafizə orqanları ilə iş şöbəsinin müdiri Fuad Ələsgərov kollegiya iclasında çıxış edərək, son illər dövlətçiliyimizin möhkəmləndirilməsi, cinayətkarlıqla mübarizə və ictimai təhlükəsizliyin təmin olunması, sabitliyin, qanunçuluğun və hüquq qaydalarının qorunması sahəsində daxili işlər orqanlarının mühüm nailiyyətlər əldə etdiyini onların gərgin əməyinin, məqsədyönlü fəaliyyətinin dövlətimizin başçısı və xalqımız tərəfindən təqdir edildiyini vurğuladı. O, Prezident İlham Əliyevin Fransaya ilk rəsmi səfərini xatırladaraq, daxili işlər orqanlarının beynəlxalq əlaqələrinin genişləndirilməsinin əhəmiyyətindən və vacibliyindən də danışdı.
Müzakirələrdə DİN-in Baş Mühafizə İdarəsinin rəisi, polis general-mayoru Asəf Həsənov, Baş Kadrlar İdarəsinin rəisi, polis general-mayoru Məmməd Əsgərov, Baş Dövlət Yanğın Təhlükəsizliyi İdarəsinin rəisi, polis general-mayoru Murad Hüseynov, Mütəşəkkil Cinayətkarlıqla Mübarizə İdarəsinin rəisi, polis polkovniki Vilayət Eyvazov, Pasport və Qeydiyyat İdarəsinin rəisi, polis polkovniki Rafiq Babayev və başqaları çıxış edərək, ötən il görülmüş işlərdən, əldə olunmuş uğurlardan danışdılar, mövcud nöqsanların qısa müddətdə aradan qaldırılması üçün lazımi tədbirlər görüləcəyini bildirdilər.