SİYASƏT
DEPUTATLARIMIZ MƏSƏLƏLƏRƏ AYDINLIQ GƏTİRMİŞLƏR
Sessiyanın gedişi zamanı müxtəlif komitələrdə yığıncaqlar keçirilir. Monitorinq komitəsinin iclasında iştirak etmiş millət vəkili AZƏRTAC-ın müxbirinə bildirmişdir ki, ölkəmizdə olmuş komitə üzvü Martines Kassan öz səfəri barədə məlumatında Azərbaycanda siyasi vəziyyət, seçkiqabağı gedən proseslər, seçki kampaniyasının aparılması ilə bağlı məsələlərə toxunmuşdur.
Komitənin digər üzvü, macarıstanlı deputat isə qərəzli mövqe tutaraq, heç bir fakta əsaslanmadan guya ölkəmizdə demokratik ideyalara təzyiq göstərildiyini qeyd etmişdir. Xatırladaq ki, bu deputat artıq deputatlıq səlahiyyəti bitmiş belçikalı Corc Kleyfartı ölkəmizə qərəzli mövqe tutmaqda həmişə dəstəkləmişdir.
Azərbaycan nümayəndəsi onun ölkəmizdə gedən demokratik inkişaf barədə digər deputatlarda yanlış təsəvvür yaratmaq səyinə qarşı kəskin etirazını bildirərək, komitədə belə neofaşist fikirlərin səslənməsinə son qoymağa çağırmış, müstəqil Azərbaycan dövlətinə, ölkəmizdə bərqərar olan demokratik proseslərə hörmətlə yanaşmağı tələb etmişdir. Eyni zamanda, o, komitə üzvlərinin diqqətini Azərbaycanda demokratik təsisatların normal işləməsinə, seçkiqabağı kampaniyanın demokratik şəkildə aparılmasına, müxalifətin seçkilərdə iştirakına tam şərait yaradılmasına, hətta AŞPA deputatlarının onların yaratdıqları İnternet saytlarına daxil olaraq apardıqları kampaniya ilə ətraflı tanış ola bildiklərinə yönəltmişdir.
Deputatımızın Azərbaycanda demokratik seçkilər keçiriləcəyi, xalqımızın öz iradəsini ifadə edərək, prezidentini seçəcəyi barədə məlumatını komitə üzvləri böyük razılıq hissi ilə qarşılamışlar.
AŞPA-nın elm, təhsil və mədəniyyət komitəsinin növbəti iclasında Ermənistan xarici işlər naziri Vartan Oskanyanın sessiyanın gedişi zamanı Strasburqda Avropa Şurasının baş katibi Valter Şvimmerə şəxsən təqdim etdiyi məktub və parlamentin üzvünün isə bu beynəlxalq quruma ünvanladığı bir neçə sənədlə əlaqədar məsələ müzakirə olunmuşdur.
Məktub və sənədlərdə Naxçıvan Muxtar Respublikasının Culfa rayonu ərazisində ermənilərə məxsus qəbiristanlıq və qədim abidələrin olduğu və onların dağıdıldığı iddia edilmiş, Avropa Şurasından bu barədə ciddi ölçü götürmək xahiş olunmuşdur. Xatırladaq ki, hələ aprel ayında məsələ ilə əlaqədar Ermənistan nümayəndə heyəti elm, təhsil və mədəniyyət məsələləri komitəsinə müraciət etmişdi. Ermənilərin bu təşvişi həmin dövrdə Milli Məclisin deputatı Əli Abbasovun AŞPA sessiyasında – Cənubi Qafqazda mədəniyyətin vəziyyəti barədə məruzəsində işğal edilmiş ərazilərimizdəki milli-mədəni sərvətlərin ermənilər tərəfindən dağıdılması haqqında məlumatından irəli gəlmişdir.
Komitə üzvləri Avropa Şurası katibliyində həmin materiallarla yaxından tanış olmuş və bununla bağlı müzakirə keçirmişlər. Müzakirə zamanı deputat Əli Abbasov Culfa rayonu ərazisindəki qəbiristanlığın və digər abidələrin alban tayfalarına məxsus olduğunu, başqa dövlətlərin mədəni irsinə kölgə salmağa vərdiş etmiş ermənilərin həmin abidələri öz adlarına çıxdığını, Ermənistan tərəfindən işğal edilmiş ərazilərimizdə, habelə Ermənistan ərazisində olan və YUNESKO-nun rəsmi qeydiyyatından keçmiş abidələrimizin dağıdıldığını konkret faktlarla açıqlamış, həmişə dünya ictimaiyyətinin diqqətini əsas məsələdən yayındırmağa çalışan ermənilərin növbəti bəhanələrinin əsassız olduğunu bildirmişdir. Deputat işğal altında olan ərazimizdəki qədim Azıx mağarasında ermənilərin bir neçə ölkənin mütəxəssisləri ilə birlikdə qazıntılar aparmaları barədə Azərbaycanın xarici işlər naziri Vilayət Quliyevin bu günlərdə AŞ-nin baş katibinə göndərdiyi məktubu və onun məzmununu xatırlatmışdır. Məktubda xalqımızın milli sərvəti olan Azıx mağarasında aparılan qazıntılara kəskin etiraz bildirilmiş, mədəniyyət abidələrinin qorunması barədə beynəlxalq konvensiyanın 4-cü maddəsinin ciddi şəkildə pozulduğu vurğulanmışdır.
Geniş və qızğın müzakirələrdən sonra komitə Cənubi Qafqazın hər üç ölkəsində məsələni yerindəcə araşdırmaq üçün müstəqil ekspertlər qrupunun yaradılmasını məqsədəuyğun saymışdır. Xatırladaq ki, ermənilər Gürcüstan ərazisində də onlara məxsus abidələrin dağıdıldığını iddia edirlər.
Komitə ekspertlər qrupunun fəaliyyəti üçün şərait yaradılması barədə hər üç ölkəyə müraciət etməyi, sənədlərdə göstərilən yerlərə qrupun səfərinin təşkili, onun məlumatının komitədə, əgər ciddi məsələlər üzə çıxarsa, AŞPA-nın sessiyalarının birində müzakirəyə çıxarılması üçün AŞ-nin rəhbərliyinə müraciət etmək barədə qərar çıxarmışdır.