RƏSMİ XRONİKA


DÖVLƏTİMİZİN BAŞÇISININ QAYĞISI SEVİNDİRİR, RUHLANDIRIR VƏ İLHAMLANDIRIR

Azərbaycan Prezidenti Heydər Əliyevin sərəncamları ilə respublikamızın qabaqcıl mədəniyyət və incəsənət xadimlərinə fəxri adların, Prezident mükafatlarının və təqaüdlərinin verilməsi bu sahələrdə çalışan yaradıcı insanlarda dərin sevinc və minnətdarlıq duyğuları oyatmışdır. Son bir neçə gündə AZƏRTAC-a həmin mövzuda onlarca məktub daxil olmuşdur. Bu məktublarda ölkəmizin başçısının sənətə və sənətkara, yaradıcı ziyalılara göstərdiyi tükənməz diqqət və qayğıya daha məhsuldar çalışmaqla, milli mədəni dəyərlərimizin inkişafı sahəsində yeni uğurlar qazanmaqla cavab veriləcəyi bildirilir.

Respublikanın xalq artistləri Əminə Yusif qızı, Qərinə Kərimova, Mədinə Əliyeva, Hacı İsmayılov, əməkdar artistlər Teymur Mustafayev, Əlikram Hüseynov, Xanım Qafarova, Novruz Əliyev, Mənsum İbrahimov, Elmira Şabanova, professor Vaqif Əsədov, Gənc Tamaşaçılar Teatrının direktoru Kamal Əzizov, Kukla Teatrının direktoru Rəhman Quliyev və başqaları bildirirlər ki, bizdə dərin sevinc hissi doğuran təkcə o deyildir ki, Prezident mükafatları maddi durumumuzu yaxşılaşdıracaqdır. Əsasən ona görə sevinir və məmnunuq ki, bu mükafatları bizə müdrik bir insan, dünya miqyasında sayılıb-seçilən siyasi xadim, qətiyyəti, əzmi və iradəsi ilə örnək olan qüdrətli bir şəxsiyyət – sevimli Prezidentimiz Heydər Əliyev vermişdir. Məktubların hamısında belə bir yekdil fikir ifadə olunur: Qarşıdan gələn prezident seçkilərində Azərbaycanın mədəniyyət və incəsənət xadimləri ölkəmizin rəhbəri Heydər Əliyevin namizədliyini dəstəkləyəcək, yalnız ona səs verəcəklər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin