İQTİSADİYYAT
DÖVLƏTİN AQRAR SİYASƏTİNİ ƏKS ETDİRƏN ENSİKLOPEDİK NƏŞR
“HEYDƏR ƏLİYEV VƏ DÖVLƏTİN AQRAR SİYASƏTİ” KİTABI ÇAPDAN ÇIXMIŞDIR
Baş nazirin birinci müavini, Dövlət Aqrar İslahatı Komissiyasının sədri Abbas Abbasovun, Milli Məclis sədrinin birinci müavini Arif Rəhimzadənin, kənd təsərrüfatı naziri İrşad Əliyevin, ekologiya və təbii sərvətlər naziri Hüseynqulu Bağırovun, YAP icra katibi Əli Əhmədovun müxtəlif dövlət komitələri sədrlərinin, birlik və cəmiyyət rəhbərlərinin, Milli Məclisin daimi komissiyaları sədrlərinin, deputatlarının, mütəxəssislərin iştirak etdiyi mərasimi universitetin rektoru, Milli Məclisin deputatı akademik Əli Abbasov açaraq demişdir: Azərbaycanın müstəqilliyi dövründə həyata keçirilən iqtisadi siyasətdə aqrar problemlərin həllinə, kənd təsərrüfatının inkişafına xüsusi diqqət yetirilir. Bu kitab ümummilli liderimiz Heydər Əliyevin 1993-cü ildən sonra respublikanın aqrar bölməsinin tərəqqisi üçün müəyyən etdiyi dövlət siyasətindən, onun rəhbərliyi ilə ölkədə aqrar və torpaq islahatının həyata keçirilməsindən bəhs edir. Kitaba dövlətin aqrar siyasətinin həyata keçirilməsi üçün Heydər Əliyevin fəaliyyətini, tarixi xidmətlərini əks etdirən çıxışları, nitqləri, imzaladığı qanunlar, verdiyi fərman və sərəncamlar daxil edilmişdir.
Milli Məclis sədrinin birinci müavini Arif Rəhimzadə, Parlamentin iqtisadi siyasət daimi komissiyasının sədri Səttar Səfərov, Torpaq və Xəritəçəkmə Komitəsinin sədri Qərib Məmmədov, universitetin kafedra müdiri professor Əbülfəz Qasımov, Kənd Təsərrüfatı Akademiyasının rektoru Məmmədtağı Cəfərov çıxış etmişlər. Onlar Heydər Əliyevin dövlətin aqrar siyasətinin həyata keçirilməsi sahəsində fəaliyyətinin ayrı-ayrı məqamlarını təhlil etmiş, onun rəhbərliyi altında respublikamızda həyata keçirilən torpaq islahatını MDB məkanında bənzəri olmayan addım kimi qiymətləndirmişlər. Xatırladılmışdır ki, müstəqil Azərbaycanın iqtisadiyyatının tərəqqisi üçün yeganə yolun bazar iqtisadiyyatı olduğunu görən Heydər Əliyev hələ 1992-ci ildə Naxçıvan Muxtar Respublikası Ali Məclisinin sədri vəzifəsində işləyərkən aqrar islahatların aparılmasının əsasını qoymuşdur. Artıq ölkədə bu islahatların birinci mərhələsi uğurla başa çatmışdır.
Qeyd edilmişdir ki, on illik bir dövrü - 1993-2003-cü illəri əhatə edən kitabda aqrar siyasətlə, kənd təsərrüfatı ilə bağlı Azərbaycan Prezidenti Heydər Əliyevin çıxışları və nitqləri, fərman və sərəncamları, qanunları xronoloji ardıcıllıqla sistemləşdirilərək dərc olunmuşdur. Bu sənədləri oxuduqca möhtərəm Heydər Əliyevin ölkədə çörək qıtlığını aradan qaldırmaq üçün gördüyü nəhəng və cəsarət tələb edən işlər bir daha göz önündə canlanır. Məhz həmin nəhəng işlərin nəticəsidir ki, ölkəmizdə mövcud olan 2028 kolxoz və sovxoz ləğv edilib, onların torpağı və əmlakı təmənnasız olaraq vətəndaşlara paylanmış, 3,5 milyon nəfər, yaxud 871 min 779 ailə mülkiyyət sahibi olmuşdur. Eyni zamanda, onlara 1,6 milyon hektar əkinəyararlı torpaq verilmişdir. Bütün bunlar o deməkdir ki, indi kənddə iş yeri var. Bu məsələ ilə bağlı opponentlərin uydurduğu şayiələrə də toxunulmuşdur. Onlar deyirlər ki, kəndli sahib olduğu torpağı becərmək imkanından məhrumdur, guya dövlət onu problemləri ilə tək qoyub. Əslində isə “Aqrar islahatların sürətləndirilməsinə dair bəzi tədbirlər haqqında” Azərbaycan Respublikası Prezidentinin 22 mart 1999-cu il tarixli Fərmanı ilə kənd təsərrüfatı məhsulları istehsalçıları 5 il müddətinə torpaq vergisi istisna olunmaqla qalan bütün vergilərdən azad edilmişlər, onların bu vergilərə görə borcları silinmişdir. Fermerlərə və torpaq sahiblərinə yanacaq güzəştlə satılır. Yeri gəlmişkən, bu imtiyazların müddəti daha beş il müddətinə uzadılmışdır.
Natiqlər xüsusi vurğulamışlar ki, bu ilin oktyabr ayında xalqın böyük əksəriyyətinin səsini qazanaraq Azərbaycan Prezidenti seçilmiş İlham Əliyev də möhtərəm Heydər Əliyevin aqrar siyasətini davam etdirir. O, yeni formalaşmış Nazirlər Kabinetinin ilk iclasında ölkənin aqrar bölməsinin inkişafını təmin etmək üçün təməli cənab Heydər Əliyev tərəfindən qoyulmuş aqrar siyasəti davam etdirməyi, aqrar islahatların ikinci mərhələsinə keçməyi, texniki servis mərkəzləri yaratmağı, toxumçuluq bazasını və emal sənayesini inkişaf etdirməyi vacib vəzifə kimi qarşıya qoymuş, bu barədə fərman imzalamışdır.
Çıxış edənlər yekdilliklə bildirmişlər ki, kitab nazirliklərdə, komitələrdə, yerli icra hakimiyyəti orqanlarında, bələdiyyələrdə, elmi-tədqiqat və tədris müəssisələrində, digər təşkilatlarda aqrar sahədə çalışan mütəxəssislər, kənd təsərrüfatı məhsulları istehsalı ilə məşğul olan sahibkarlar üçün dəyərli vəsaitdir. Bu kitab siyasi, iqtisadi, sosial əhəmiyyət kəsb etməklə yanaşı, proqnozlaşdırma fəaliyyətində böyük rol oynayacaqdır.
Kitabın məsul redaktoru, Milli Məclisin aqrar siyasət daimi komissiyasının sədri dosent Eldar İbrahimov mərasim iştirakçılarına təşəkkürünü bildirmişdir.