Sahibkarlığın inkişafına göstərilən dövlət qayğısı bölgələrdə özəl sektorun inkişafına güclü təkan vermişdir. Cəmi 5 yaşı olan “Kürdəmir–pambıq” ATSC də rayonda mühüm istehsal sahəsinə çevrilmişdir. Səhmdar cəmiyyəti təkcə cari təsərrüfat ilində Kürdəmir və Ağsu rayonlarında 280 nəfər özəl torpaq sahibi ilə müqavilələr əsasında 3600 ton pambıq satın almışdır. Bu, keçən ildəkindən 600 ton çoxdur. Emal olunan mahlıc xarici bazarlara, o cümlədən Rusiya Federasiyasına, Türkiyəyə, Fransaya, İspaniyaya satılır.

Əldə olunan gəlir istehsal sahələrinin genişləndirilməsinə və beləliklə, əlavə iş yerlərinin açılmasına, əmək haqlarının artırılmasına imkan yaradır. Burada orta aylıq əmək haqqı 300 min manatdır. Son iki ildə torpaq sahiblərindən alınan pambığın dəyəri nağd şəkildə ödənilir. Keçən il pambığın hər kiloqramı orta hesabla 1000 manata, bu il isə 1200 manata alınmışdır.

Səhmdar cəmiyyətin Kürdəmir rayonu ərazisində 2000 hektar torpaq sahəsi vardır. Sahələrdə pambıqla yanaşı, taxıl, qarğıdalı, yonca da əkilir.

“Kürdəmir–pambıq” ATSC-nin nəzdindəki, “Vüqar” kəndli-fermer təsərrüfatında böyük heyvandarlıq kompleksi yaradılmışdır. İndi fermada 2000 başdan çox davar, xeyli qaramal saxlanılır. Hər il respublika bazarlarına on tonlarla ət, yun və süd məhsulları çıxarılır.

Bu il 22 hektar sahədə üzüm plantasiyası salınmışdır. Bağlarda məşhur “Şirvanşahı” və İrandan gətirilmiş “Kişmişi” üzüm sortları becərilir.

İstehsal sahələrinin genişləndirilməsi bölgə əhalisinin məşğulluğunun təminatına sanballı kömək göstərir. Səhmdar cəmiyyətin şöbə müdiri Şahid Həmidov AZƏRTAC-ın müxbirinə bildirmişdir ki, indi burada 300 nəfər çalışır ki, onların 100 nəfəri daimi işçidir.