İQTİSADİYYAT
DÖVLƏT SOSİAL MÜDAFİƏ FONDU PROQNOZLARA ARTIQLAMASI İLƏ ƏMƏL EDİR
Bu müddət ərzində Fondun gəlirləri də nəzərəçarpacaq dərəcədə artaraq, 1 trilyon 489,8 milyard manat olmuşdur. Bu, ötən ilin müvafiq dövrü ilə müqayisədə 232,5 milyard manat, 2003-cü ilin yanvar-oktyabr ayları üçün proqnoz göstəricisindən isə 43,8 milyard manat çoxdur.
Dövlət Sosial Müdafiə Fondunun gəlirlərinin tərkibində məcburi dövlət sosial sığorta haqları 890,2 milyard manat olmuş, bununla da proqnoz 105 faiz yerinə yetirilmişdir. Dövlət büdcəsindən ayırmaların məbləği isə proqnozda nəzərdə tutulmuş məbləğdə, yəni 597,8 milyard manatdır. Məcburi dövlət sosial sığorta haqları üzrə toplanmış vəsaitin 255 milyard manatı büdcədən maliyyələşən təşkilatlardan daxil olmuşdur.
İlin əvvəlindən qeyri-büdcə təşkilatlarından və özəl sektordan məcburi dövlət sosial sığorta haqlarının vaxtında yığılması gəlirlərin tərkibində bu sahələrin xüsusi çəkisinin xeyli artmasına şərait yaratmışdır. Yanvar-oktyabr aylarında qeyri-büdcə təşkilatlarından və özəl sektordan 635,2 milyard manat məcburi dövlət sosial sığorta haqqı toplanmışdır ki, bu da nəzərdə tutulduğundan 67,9 milyard manat, ötən ilin müvafiq dövründəkindən isə 150,5 milyard manat çoxdur.
Dövlət Sosial Müdafiə Fondunun gəlirlərinin artması 2003-cü ilin 10 ayı ərzində pensiyaların, müavinətlərin və digər sosial ödənişlərin maliyyələşdirilməsini, əsasən, başa çatdırmağa imkan vermişdir. Bütövlükdə yanvar-oktyabr ayları ərzində bu məqsədlərə 1 trilyon 508 milyard manat vəsait köçürülmüşdür. Bu da ötən ilin müvafiq dövrü ilə müqayisədə 224 milyard manat və ya 19,3 faiz çoxdur.
Fondun xərclərinin tərkibində əsas sosial ödənişlər olan pensiyaların məbləği 880,9 milyard manat, işləməyən pensiyaçılara müavinətlər 143,2 milyard manat, aztəminatlı ailələrin uşaqlarına ayrılan müavinətlər 134,2 milyard manat təşkil etmişdir. Əhalinin kommunal, nəqliyyat və digər güzəştlərinin müavinətlərlə əvəz olunmasına 89,2 milyard manat, digər müavinətlər üçün isə 201,2 milyard manat vəsait xərclənmişdir.
Bundan əlavə, məşğulluq və əlillərin sosial müdafiəsi tədbirlərinin həyata keçirilməsinin maliyyələşdirilməsi məqsədi ilə Əmək və Əhalinin Sosial Müdafiəsi Nazirliyinin məşğulluq və əlillərin sosial müdafiəsi baş İdarələrinə müvafiq olaraq 8,1 milyard manat və 15,9 milyard manat, sanatoriya-kurort müalicəsi üzrə xərclərin maliyyələşdirilməsi üçün Azərbaycan Həmkarlar İttifaqları Konfederasiyasına 17,1 milyard manat köçürülmüşdür. Pensiya və müavinətlərin respublika əhalisinə çatdırılması üçün ödəniş müəssisələrinə xidmət haqqı kimi 11,6 milyard manat köçürülmüş, Fondun mərkəzi aparatının və yerli orqanlarının saxlanmasına isə 6,6 milyard manat yönəldilmişdir.