DÜNYADA ƏN İRİ “CANLI” BAYRAQ

Bu günlərdə Əbu-Dəbi şəhərinin dənizkənarı parkında dünyada ən iri bayrağı - Birləşmiş Ərəb Əmirliklərinin milli bayrağını görmək olardı.

AZƏRTAC-ın xarici informasiya agentliklərindən aldığı xəbərə görə, bayrağı onun qırmızı, ağ, qara və yaşıl rənginə uyğun idman kostyumları geyinmiş müxtəlif millətlərdən olan 5 mindən çox məktəbli və tələbə düzəltmişdi. 600 kvadratmetr sahəni tutan “canlı” bayraqla yanaşı, təxminən 17 min rəngbərəng şardan hazırlanmış bayraq göyə buraxılmışdı.

Əbu-Dəbinin hər yerində könüllüləri bu tədbirdə iştirak etməyə çağıran plakatlar asılmışdı.

Birləşmiş Əmirliklər hökuməti bu tədbiri milli rəmzə hörmət və ölkənin çoxmillətli icmalarının nümayəndələri arasında həmrəylik kimi qiymətləndirir.