AZƏRTAC xəbər verir ki, qadın voleybolçular arasında dünya çempionatının 2006-cı il oktyabrın 31-dən noyabrın 16-dək Yaponiyanın paytaxtı Tokioda keçiriləcək final mərhələsinin püşkü atılmışdır.

Püşkatmanın nəticələrinə görə, Azərbaycan milli yığma komandası “B” qrupunda Çin, Rusiya, Dominikan Respublikası, Almaniya və Meksika kollektivləri ilə mübarizə aparacaqdır. Çempionluq uğrunda isə, ümumilikdə, 24 komanda 4 yarımqrupda yarışacaqdır.

Xatırladaq ki, finaladək komandalar arasında seçmə qrup mərhələsinin oyunları keçirilmişdir. 2005-ci ilin mayında Bakıda keçirilən I seçmə qrup mərhələsi çərçivəsində Azərbaycan yığması İspaniya, Belçika və Rumıniya komandalarını məğlub edərək, ikinci mərhələyə çıxmışdı. İyul ayında isə Moskvada II mərhələnin oyunlarında məşqçi Faiq Qarayevin yetirmələri Rusiya, Çexiya və Bolqarıstan yığmaları üzərində qələbə qazanaraq final oyunlarına vəsiqə qazanmışdır.