DÜNYA QİÇS-LƏ MÜBARİZƏNİ UDUZUR

AZƏRTAC-ın xarici informasiya agentliklərindən aldığı xəbərə görə, bunu QİÇS-lə, vərəm və malyariya ilə mübarizə fondunun icraçı direktoru Riçard Fiçem Kanberrada (Avstraliya) çıxışında bildirmişdir. O demişdir: “Biz bu dəhşətin bütün vüsətini yalnız indi dərk etməyə başlayırıq. Odur ki, bu xəstəliklərin kökünü tamam kəsmək üçün hələ çox uzun yol keçməliyik”.

Avstraliya hökumətinin QİÇS-lə mübarizəyə 20 milyon dollar ayırması ilə əlaqədar keçirilən mərasimdə iştirak etmək üçün Kanberraya gələn fondun başçısı bildirmişdir ki, Cənubi Afrika ölkələrində vəziyyət xüsusilə ağırdır. BMT-nin məlumatına görə, bu regionda təxminən 26,6 milyon insan immun çatışmazlığı virusuna yoluxmuşdur.