CƏMİYYƏT


Danimarka Azərbaycan ilə səhiyyə və tibb elmi sahəsində əməkdaşlığı genişləndirməkdə maraqlıdır

Danimarka Azərbaycan ilə səhiyyə və tibb elmi sahəsində əməkdaşlığı genişləndirməkdə maraqlıdır

Bakı, 8 dekabr, AZƏRTAC

Səhiyyə Nazirliyində Danimarka Krallığının Azərbaycan Respublikasındakı qeyri-rezident səfiri Denni Annanın başçılıq etdiyi nümayəndə heyəti ilə görüş olub.

AZƏRTAC Səhiyyə Nazirliyinin mətbuat xidmətinə istinadla bildirir ki, görüşdə eyni zamanda fəxri konsul Arno Qovart və Danimarkanın aparıcı əczaçılıq şirkəti olan “Novo Nordisk” şirkətinin nümayəndələri də iştirak ediblər.

Səhiyyə naziri Teymur Musayev son illər ölkələrimiz arasında bir çox sahələrdə, o cümlədən səhiyyə sahəsində əməkdaşlığın dinamik şəkildə inkişaf etdiyini qeyd edib. “Danimarka səhiyyəyə xüsusi diqqət yetirən ölkələrdən biridir. Ölkələrimizin ali tibb mütəxəssislərinin davamlı peşə təhsili sahəsində müasir metodiki və elmi-praktik təcrübə mübadiləsi üçün bütün imkanlar mövcuddur. Bundan əlavə, Azərbaycan Tibb Universiteti Kopenhagen Universiteti ilə tibb sahəsində fəal əməkdaşlıq edir”,- deyə nazir bildirib.

Ölkələr arasında əczaçılıq sahəsində əlaqələrin inkişaf etdirilməsi üçün geniş imkanların olduğunu qeyd edən Teymur Musayev deyib: “Əczaçılıq sənayesi hər bir ölkənin iqtisadiyyatı üçün ən mühüm sektorlardan biridir və onun inkişaf səviyyəsi mükəmməl təşkil olunmuş səhiyyə sistemini xarakterizə edir. Danimarkanın güclü əczaçılıq sənayesi dünyanın ən yaxşılarından biri hesab olunur”.

Öz növbəsində Denni Annan Danimarkanın Azərbaycanla münasibətlərin inkişafına xüsusi önəm verdiyini bildirib. Ölkələrimiz arasında iqtisadi-ticari əlaqələrin genişləndiyini qeyd edən səfir, həmçinin ölkəsinin Azərbaycan ilə səhiyyə və tibb elmi sahəsində əməkdaşlığın daha da yüksək səviyyədə olmasında maraqlı olduğunu bildirib.

“Novo Nordisk” şirkətinin Azərbaycandakı nümayəndəliyinin rəhbəri Gülşabə Abbasova ölkəmizdə, o cümlədən Səhiyyə Nazirliyinin tabeliyində olan tibb mərkəzləri ilə birgə layihələrin uğurla həyata keçirildiyini qeyd edib. Diqqətə çatdırılıb ki, 2023-cü ildə 100 illiyini qeyd edəcək “Novo Nordisk” qlobal əczaçılıq şirkətidir, eyni zamanda şəkərli diabetin müalicəsi üçün dərmanların hazırlanması və istehsalı üzrə dünya lideridir.

Konstruktiv və qarşılıqlı anlaşma mühitində keçən görüşdə tərəflər farmasevtika sahəsində əməkdaşlığın gücləndirilməsinin yeni perspektivlərini müzakirə ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.