SİYASƏT
Daşkənddə keçirilən beynəlxalq konfransda Azərbaycan nümayəndələri də iştirak edirlər
Daşkənd, 19 fevral, AZƏRTAC
Daşkənddə “Mərkəzi Asiyada qarşılıqlı əlaqə: çağırışlar və yeni imkanlar” adlı beynəlxalq konfrans keçirilir. Tədbirdə dünyanın 36 ölkəsindən, 9 beynəlxalq və regional təşkilatdan nümayəndələr iştirak edirlər.
Konfransda Azərbaycan Milli Məclisinin deputatı Elman Nəsirov, “Baku Network” Ekspert Şurasının direktoru Elxan Ələsgərov, Prezident yanında Dövlət İdarəçiliyi Akademiyasının müəllimi Zaur Məmmədov, “Sputnik” Multimedia Mətbuat Mərkəzinin direktoru İlqar Vəlizadə, Bakı Beynəlxalq Multikulturalizm Mərkəzinin böyük müşaviri Tofiq Abbasov iştirak edirlər.
Tədbiri Özbəkistanın xarici işlər naziri Əbdüləziz Kamilov açaraq Mərkəzi Asiyada belə bir konfransın keçirilməsinin zəruriliyindən və regional əməkdaşlığın dərinləşdirilməsi imkanlarından danışıb.
Birləşmiş Millətlər Təşkilatının xüsusi nümayəndəsi Natalya German, Özbəkistan parlamenti Senatı sədrinin birinci müavini Sadık Safoyev, xarici işlər nazirinin müavini İlham Nematov və başqaları Mərkəzi Asiyada regional təhlükəsizliyin qorunması məsələlərindən danışıblar.
Çıxış edənlər Mərkəzi Asiyada ticari-iqtisadi, nəqliyyat-kommunikasiya, su-ekoloji, energetika, mədəni-humanitar, turizm və digər sahələrdə əlaqələrin genişləndirilməsindən söhbət açıblar.
Sonra konfrans işini bölmələr üzrə davam etdirib.
“Mərkəzi Asiyada regional əməkdaşlığın yeni dinamikası-regiondan baxış” bölməsindəki çıxışında Elman Nəsirov Mərkəzi Asiyada keçmiş və müasir terror təhlükələrindən danışıb. O bildirib ki, Əfqanıstandakı hazırkı vəziyyət regionda gərginliyin artmasına səbəb olur.
Elman Nəsirov qeyd edib ki, İŞİD terror təşkilatının Mərkəzi Asiyadakı filialı olan “DAİŞ-Xorasan” Əfqanıstanla həmsərhəd Özbəkistan, Türkmənistan və Tacikistan dövlətləri üçün real təhlükədir. Belə ki, Əfqanıstan xüsusi xidmət orqanlarının verdiyi məlumata görə, Suriya və İraqdan gələnlərin hesabına bu təşkilatdakı terrorçuların sayı təxminən 2 min nəfərə çatıb.
Tofiq Abbasov Mərkəzi Asiyada regional təhlükəsizliyin qorunması, bütün sahələrdə əlaqələrin dərinləşdirilməsi məsələlərinə toxunub, Ermənistan-Azərbaycan Dağlıq Qarabağ münaqişəsi haqqında məlumat verib. O deyib ki, Ermənistanın təcavüzü və münaqişənin davam etməsi regional təhlükəsizliyə zərbədir. Belə olan halda Bakı ancaq özünün deyil, tərəfdaşlarının təhlükəsizliyini də düşünməyə məcbur olur və bu sahədə addımlar atır.
Tədbirin açılışında Azərbaycanın Özbəkistandakı səfiri Hüseyn Quliyev də iştirak edib.
Konfrans öz işini davam etdirir.
Qulu Kəngərli
AZƏRTAC-ın xüsusi müxbiri
Daşkənd