REGİONLAR
Daşkəsən şəhərinin 12 mindən artıq sakini fasiləsiz içməli su ilə təmin edilib VİDEO
Daşkəsən, 26 iyul, Elcan Məmmədov, AZƏRTAC
“Daşkəsən şəhərinin içməli su təchizatı və kanalizasiya sistemlərinin yenidən qurulması” layihəsi Azərbaycan Hökuməti və İslam İnkişaf Bankı tərəfindən birgə maliyyələşdirilən “Azərbaycanın 6 rayonunda Milli Su Təchizatı və Kanalizasiya Proqramı layihəsi” çərçivəsində həyata keçirilib. Layihə 2035-ci ilə perspektiv inkişaf nəzərə alınmaqla Daşkəsən şəhərində 12 min nəfərin içməli və tullantı su xidmətlərindən istifadəsinin yaxşılaşdırılmasına hesablanıb.
Bu fikirləri AZƏRTAC-ın bölgə müxbirinə müsahibəsində “Azərsu” Açıq Səhmdar Cəmiyyətinin mətbuat katibi Anar Cəbrayıllı deyib.
O bildirib ki, layihənin icrasına qədər rayonun su təchizatında və kanalizasiya sistemlərində vəziyyət o qədər də ürəkaçan olmayıb. “Daşkəsən şəhərinin mərkəzləşdirilmiş içməli su təchizatı sistemi 1950-60-cı illərdə yaradılıb. Mövcud su və kanalizasiya xətləri şəhəri tam əhatə etmirdi və istismara yararsız vəziyyətdə idi. “Azərsu” ASC şəhərdə yaşayanların 4800 nəfərinə və ya təqribən 43 faizinə xidmət göstərirdi. Şəhər əhalisinə içməli su gün ərzində bir neçə saatlıq qrafik əsasında verilirdi. Əhalinin qalan hissəsi isə tələbatını fərdi qaydada ödəyirdi”, - deyə qurum rəsmisi söyləyib.
“Daşkəsən şəhərinin içməli su təchizatı və kanalizasiya sistemlərinin yenidən qurulması” layihəsinin icrasına 2015-ci ildə başlanıb. Daşkəsən şəhərini, həmçinin ətraf kəndləri keyfiyyətli içməli su ilə təmin etmək üçün Qarainək bulaqları və Gurbulaq su mənbəyində ümumi məhsuldarlığı sutkada 2600 kubmetr olan 5 ədəd suqəbuledici qurğu inşa edilib. Su mənbəyindən şəhərə 20,3 kilometr uzunluğunda magistral su kəməri çəkilib, kəmər üzərində 1 ədəd sutoplayıcı, 2 ədəd təzyiq qırıcı kamera, eləcə də suyun şəhərə nəqli üçün 2 ədəd nasos stansiyası tikilib.
A.Cəbrayıllı deyib ki, layihə çərçivəsində Daşkəsən şəhərində ümumi tutumu 4500 kubmetr olan 4 su anbarı, 17 kilometr paylayıcı su şəbəkəsi inşa edilib, 2030 ünvana birləşmə verilərək sayğaclar quraşdırılıb. Eyni zamanda, suyun optimal paylanmasını təmin etmək üçün paylayıcı su şəbəkəsi üzərində 55 ədəd siyirtmə, yanğın təhlükəsizliyi məqsədilə 50 ədəd hidrant da quraşıdırılıb. Hazırda yeni yaradılmış su təchizatı sistemi ilə Daşkəsən şəhərinin 12 mindən artıq sakini fasiləsiz içməli su ilə təmin edilir.
Eyni zamanda, rayon sakinlərinin təmiz içməli su ilə təmin olunması, məişət şəraitlərinin yaxşılaşması ilə yanaşı əhalinin sağlamlıqlarının qorunmasına da müsbət təsir göstərəcəkdir.
“İndiyədək içməli suya olan tələbatımızı əsasən, bulaqlar hesabına fərdi qaydada ödəyirdik. Uzaq məsafədən daşınma, bulaqlarda isə sululuğun azalması ciddi çətinliklərə səbəb olurdu. Su təchizatı sisteminin yaxşılaşdırılmasında göstərilən diqqət və qayğıya görə Prezident İlham Əliyevə təşəkkür edirik,”- deyə rayon sakini, rayon Ağsaqqallar Şurasının sədri Cavanşir Qocayev qeyd edib.
Layihə çərçivəsində Daşkəsən şəhərində 11,5 kilometr uzunluğunda kanalizasiya şəbəkəsi də yaradılıb. Şəhərdə yaranan tullantı sularının təmizlənərək kənarlaşdırılması məqsədilə şəhərin yaxınlığında məhsuldarlığı sutkada 3500 kubmetr olan bioloji tipli tullantı sutəmizləyici qurğu inşa olunaraq istismara verilib.
İşçilərin əmək şəraitinin yaxşılaşdırılması və istehlakçılara göstərilən müştəri xidmətlərin keyfiyyətinin yüksəldilməsi məqsədilə Daşkəsən Sukanal Sahəsi üçün sahəsi 180 kvadratmetr olan müasir tipli inzibati bina tikilib.
Qeyd edək ki, “Azərbaycanın 6 rayonunda Milli Su Təchizatı və Kanalizasiya Proqramı layihəsi” Gədəbəydə 12 min, Astarada 28,5 min, Tərtərdə 26 min, Qazaxda 26 min sakinin içməli su təchizatı və kanalizasiya xidmətlərindən istifadəsinin yaxşılaşdırılmasına hesablanıb.