Daşkəsən, 8 fevral, Rauf Hacıyev, AZƏRTAC

Son illər Azərbaycanın bütün bölgələri kimi, ucqar dağ rayonu olan Daşkəsənin də uğurlu inkişafı təmin edilib. 2017-ci ildə Daşkəsən rayonunda faktiki qiymətlərlə ümumi məhsul buraxılışının həcmi əvvəlki ilə nisbətən müxtəlif sahələr üzrə xeyli artıb. Ümumi məhsul buraxılışında 2016-cı illə müqayisədə 2017-ci ildə kənd təsərrüfatı məhsulları 35 milyon 212 min manat (5,2 faiz çox), nəqliyyat üzrə 3 milyon 112 min manat (3,4 faiz çox), ticarət və ictimai iaşə xidmətləri üzrə 21 milyon 824 min manat (6 faiz çox) olub. Rayonda ümumi məhsul buraxılışında qeyri-dövlət sektorunun xüsusi çəkisi 95 faiz təşkil edib.

AZƏRTAC-ın bölgə müxbiri xəbər verir ki, bu barədə Daşkəsən rayonunda 2017-ci ilin sosial-iqtisadi inkişafının yekunları və 2018-ci ildə qarşıda duran vəzifələrə dair keçirilən hesabat yığıncağında danışılıb.

Rayon icra hakimiyyətinin başçısı Əhəd Abıyevin məruzəsində qeyd olunub ki, 2017-ci ildə Daşkəsəndə bir sıra tikinti, təmir-bərpa, yenidənqurma, abadlıq-quruculuq işləri görülüb və hazırda da bəzi sahələr üzrə işlər davam etdirilir.

Diqqətə çatdırılıb ki, Azərbaycan Hökuməti ilə İslam İnkişaf Bankı tərəfindən maliyyələşən “Daşkəsən şəhərinin su və kanalizasiya sistemlərinin yenidən qurulması” layihəsində son tamamlama işləri yerinə yetirilir. Artıq Daşkəsən şəhərinin bir hissəsi ekoloji cəhətdən təmiz və fasiləsiz içməli su ilə təmin olunur. Prezident İlham Əliyevin “Əhalinin içməli su ilə təminatının yaxşılaşdırılmasına dair əlavə tədbirlər haqqında” müvafiq Sərəncamına uyğun olaraq Daşkəsən şəhərinin Alunitdağ qəsəbəsi içməli su ilə təminatın yaxşılaşdırılması nəzərdə tutulan yaşayış məntəqələrinin siyahısına əlavə olunub.

Keçən il rayon məhkəməsinin inzibati binası əsaslı təmir edilib, Dövlət Notariat Kontoru və rayon qeydiyyat şöbəsi yeni binaya köçürülüb. Daşkəsən Rayon Mərkəzi Xəstəxanasının binasında əsaslı, Qabaqtəpə kənd xəstəxanasında və Xoşbulaq həkim məntəqəsində isə cari təmir işləri aparılıb. Güneykənd kəndində 56 şagird yerlik modul tipli yeni məktəb binasının tikintisi başa çatdırılıb, Şahvələdli kəndində isə 23 şagird yerlik modul tipli yeni məktəb binasının tikintisi davam etdirilir. Bayan kənd tam orta məktəbin dam örtüyü yenisi ilə əvəzlənib, Quşçu kənd uşaq bağçası təmir olunub. Həmçinin şəhərdə 9 çoxmərtəbəli yaşayış binası da əsaslı təmir olunub. 2018-ci ildə isə şəhərdəki 7 çoxmərtəbəli yaşayış binasının əsaslı təmiri nəzərdə tutulub.

Məruzədə bildirilib ki, Əmək və Əhalinin Sosial Müdafiəsi Nazirliyinin sifarişi əsasında Daşkəsən şəhərində, Daşkəsən qəsəbəsində, Qabaqtəpə və Dəvrallı kəndlərində Qarabağ müharibəsi əlilləri və şəhid ailələri üçün 4 fərdi yaşayış evinin və Fövqəladə Hallar Nazirliyinin xətti ilə Alunitdağ və Yuxarı Daşkəsən qəsəbələrində, eləcə də Quşçu kəndində evləri qəzalı vəziyyətdə olan vətəndaşlar üçün 3 fərdi yaşayış evinin tikintisinə başlanılıb. Yaponiyanın ölkəmizdəki səfirliyinin qrantı hesabına “Yuxarı Daşkəsən qəsəbəsində İçməli Su Təchizatının Yaxşılaşdırılması” layihəsinin həyata keçirilməsi başa çatdırılıb. Daşkəsən şəhərində Qarabağ müharibəsi əlilləri və şəhid ailələri üçün yeni 36 mənzilli yaşayış binasının tikintisi üçün torpaq sahəsi ayrılıb. Yaxın vaxtlarda Əmək və Əhalinin Sosial Müdafiəsi Nazirliyinin sifarişi ilə həmin binanın tikintisinə başlanılacaq.

Vurğulanıb ki, Daşkəsən Rayon İcra Hakimiyyəti tərəfindən ötən il rayona özəl investisiyaların cəlb olunması sahəsində bir sıra işlər görülüb. Daşkəsən şəhərində yeni hotel və restoran, eyni zamanda, müxtəlif sahələr üzrə bir neçə obyekt istifadəyə verilib. Müxtəlif sahələrə 12 sahibkar tərəfindən ümumi dəyəri 1 milyon 885,7 min manat olan layihələrin həyata keçirilməsi üçün 885,7 min manat investisiya cəlb edilib. Həmin layihələrin başa çatdırılması üçün 750 min manat investisiya qoyuluşu nəzərdə tutulub.

Rayonda kənd təsərrüfatının inkişafı sahəsində bir sıra işlər görülüb. Hazırda rayonda kartofçuluq üzrə üç toxumçuluq təsərrüfatı fəaliyyət göstərir. Toxumçuluq təsərrüfatlarının artırılması üçün işlər davam etdirilir. 2017-ci ilin məhsulu üçün 713 hektar sahədə buğda əkilib, 1568,6 ton məhsul istehsal olunub, 61 hektar sahədə isə arpa əkilərək 156,6 ton məhsul yığılıb. Həmçinin 2017-ci il ərzində rayon ərazisində 1308,4 hektar sahədə kartof, 83 hektar sahədə kələm, 66,4 hektar sahədə lobya və 4 hektar sahədə qarğıdalı əkilib. Əkilmiş sahələrdən 13087 ton kartof, 1445 ton kələm, 17,4 ton tərəvəz lobyası və 15,2 ton qarğıdalı götürülüb.

Heyvanların cins tərkibinin yaxşılaşdırılması məqsədilə Quşçu kəndində süni mayalama məntəqəsi fəaliyyət göstərir. Mayalandırılmış heyvanlardan 67 baş bala alınıb. Gələcəkdə məntəqələrin sayının artırılması üçün işlər davam etdirilir.

Bildirilib ki, ötən il Daşkəsən rayonunun Qazaxyolçular kəndində 110, Qaraqollar kəndində 102, Xoşbulaq kəndinə isə 594 abonent təbii qazla təmin olunub. 2018-ci ildə rayonun daha 2 yaşayış məntəqəsinə qaz xəttinin çəkilişi nəzərdə tutulub.

Məruzə və çıxışlarda uğurlarla yanaşı, problemlər də sadalanıb, onların həlli üçün təkliflər irəli sürülüb.

Prezident Administrasiyasının məsul işçisi Arif Novruzov və Milli Məclisin deputatı Rövşən Rzayev hesabat yığıncağında çıxış ediblər. Çıxışlarda regionların sosial-iqtisadi inkişafı Dövlət Proqramının icrasından, aqrar sektorda aparılan islahatlardan, ixracyönümlü məhsulların istehsalındakı müsbət dinamikadan söz açılıb, dövlətimizin başçısının qarşıya qoyduğu vəzifələr diqqətə çatdırılıb.

Hesabat yığıncağının sonunda qərar layihəsi qəbul olunub, toplantı iştirakçıları adından Prezident İlham Əliyevə müraciət qəbul edilib.