İDMAN
Dənizkənarı Milli Parkda gənclərin Olimpiya və sağlamlıq festivalı keçirilmişdir VİDEO
Bakı, 23 iyun (AZƏRTAC, Səxavət Quliyev). İyunun 23-də Gənclər və İdman Nazirliyinin, Milli Olimpiya Komitəsinin və “İnkişaf Naminə İdman” İctimai Birliyinin birgə təşkilatçılığı ilə Dənizkənarı Milli Parkda müasir Olimpiya hərəkatının yaranması və Beynəlxalq Olimpiya Komitəsinin təsis olunmasının 120 illiyi münasibətilə gənclərin Olimpiya və sağlamlıq festivalı keçirilmişdir.
AZƏRTAC xəbər verir ki, əvvəlcə ölkəmizin turizm potensialından və 2015-ci ildə Bakıda təşkil olunacaq birinci Avropa Oyunlarına hazırlıqla bağlı videoçarx nümayiş etdirilmişdir.
Gənclər və idman nazirinin müavini İsmayıl İsmayılov ölkəmizdə idmana göstərilən dövlət qayğısından və idmançılarımızın beynəlxalq arenada qazandığı nailiyyətlərdən danışmışdır. O bildirmişdir ki, Azərbaycan irimiqyaslı turnirlərə yüksək səviyyədə ev sahibliyi edir. Bunun nəticəsidir ki, ötən il Azərbaycanda 57 irimiqyaslı turnir keçirilmişdir. Ölkəmizdə Olimpiya hərəkatının inkişaf etdiyini diqqətə çatdıran nazir müavini atletlərimizin Olimpiya Oyunlarındakı uğurlu çıxışını xatırlatmışdır.
Azərbaycanda ilk dəfə olduğunu bildirən atletika üzrə dördqat Olimpiya, dəfələrlə dünya çempionu Maykl Conson qonaqpərvərliyə görə minnətdarlığını bildirmişdir. Olimpiya Oyunları həyatımın ayrılmaz bir hissəsidir. Məhz bu yarış vasitəsilə müxtəlif ölkələrə səfər etmiş və oradakı insanlarla xoş ünsiyyət qurmuş, fərqli mədəniyyətlərlə yaxından tanış olmuşam.
Gələn il Bakının birinci Avropa Oyunlarına ev sahibliyi etməsindən məmnunluğunu diqqətə çatdıran M.Conson yarışın idmançılar üçün sınaq məkanı, azarkeşlər üçün isə idman bayramına çevriləcəyini vurğulamışdır.
“İnkişaf Naminə İdman” İctimai Birliyinin sədri Mehman Kərimov və “Bakı-2015” Avropa Oyunları Əməliyyat Komitəsinin baş icraçı direktoru Saymon Kleq festivalın əhəmiyyətini yüksək qiymətləndirmiş, gələn il Avropa Oyunları çərçivəsində 23 iyun – Beynəlxalq Olimpiya Gününün qeyd olunacağını bildirmiş və Oyunların keçiriləcəyi müddətdə dünyanın diqqətinin məhz Azərbaycanın paytaxtına çevriləcəyini demişlər.
Dənizkənarı Milli Parkda idmançıların nümunəvi çıxışlarına baxış keçirildikdən sonra kütləvi qaçışa start verilmişdir. Gərgin idman mübarizəsi şəraitində keçən yarışda veteranlar arasında Şəfiddin Şıxnəbiyev, qızların qaçışında Özləm Əmiraslanova, oğlanların mübarizəsində isə Zaur Əliyev birinci olmuşlar. Qaliblərə sertifikatlar və xatirə hədiyyələri təqdim olunmuşdur.
Tədbir konsert proqramı ilə davam etmişdir.
Festivalın əsas məqsədi Olimpiya hərəkatı və sağlam həyat tərzini geniş əhali kütləsi arasında təşviq etməklə insanları, xüsusilə uşaqları, gəncləri və böyükləri bu istiqamətdə həvəsləndirməkdir.
Tədbir iştirakçıları kütləvi qaçışla yanaşı, şən oyunlarda, o cümlədən idmanın müxtəlif növlərində güclərini sınamışlar.