Bakı, 15 oktyabr, Səadət Hakıyeva, AZƏRTAC

Əzəli torpaqlarımızın düşmən işğalından azad olunması üçün 30 il gözləməli olduq. Hadisələrin gedişi Dağlıq Qarabağ münaqişəsinin həlli üçün iki yolun – sülh və ya hərbi yolun olduğunu göstərdi. Burada əsas məsələ hansı yoldan istifadə edilməsi deyil, torpaqlarımızın tamamilə işğaldan azad olunmasıdır. Qərar, hədəf və mövqe tam bəllidir. Azərbaycan Prezidenti “Haber Global” televiziya kanalına müsahibəsində qeyd etdiyi kimi, biz sona qədər gedəcəyik. Artıq döyüş meydanı var və torpaqlar uğrunda mübarizə davam edir.

Bu fikirlər Milli Məclisin deputatı Şahin Seyidzadənin “Biz sona qədər gedəcəyik - ya hərbi, ya da siyasi yolla” sərlövhəli məqaləsində yer alıb.

“Gəncə təxribatı müharibənin “yazılmış” və “yazılmamış” qanunlarını pozdu”, - deyən Ş.Seyidzadə bildirir ki, müharibənin öz qanunları var. “Əgər düşmən tərəf şüurlu formada hərbi münaqişənin baş verdiyi ərazidə, yaxud münaqişə zonasından kənarda yerləşən yaşayış məntəqələrinə hücum edir və təxribat törədirsə, bu, birmənalı olaraq bütün “yazılmış” və “yazılmamış” müharibə qanunlarının pozulmasıdır. Ermənilər tərəfindən məhz münaqişə zonasından kənarda yerləşən mülki yaşayış məntəqələrində davamlı olaraq beynəlxalq hüququn pozulması, müharibə cinayətinin törədilməsi, terror aktlarının həyata keçirilməsinin şahidi oluruq. Ermənistan tərəfindən Gəncə şəhərinə raket hücumu müharibənin “yazılmış” və “yazılmamış” qanunlarını tamamilə pozdu. Münaqişə zonasından uzaqda, dinc əhalinin yaşadığı əraziyə gecə yarı edilən bu hücum birmənalı olaraq antihumanist addım və terror aktıdır. Biz bundan əvvəl Xocalıda da düşmənin terror aktlarının şahidi olmuşduq. Dövlətimizin başçısı qeyd etdiyi kimi: “Xocalı soyqırımını törədənlər məhz Gəncəyə o hücumu da törətdilər. Dinc əhalinin – azyaşlı, qadın və qocaların zərər görməsi, vəfat etməsi və yaralanması ilə nəticələnən Gəncə hücumu terror deyil, bəs nədir?”, - deyə müəllif bildirir.

Məqalədə, həmçinin deyilir: “Döyüşlərin müxtəlif “cəbhə”lərinin olduğu aydındır. Sözsüz ki, hər bir müharibənin əsas cəbhəsi döyüş meydanıdır. Sentyabrın 27-dən başlayaraq Azərbaycan Ordusu Prezident, Ali Baş Komandan İlham Əliyevin rəhbərliyi ilə torpaqlarımızı işğaldan azad edir. Azərbaycan əsgəri öz torpağında döyüşür. Moskva danışıqları nəticəsində atəşkəs elan olunmasına baxmayaraq, Ermənistan Ordusu mülki əhalini, yaşayış obyektlərini atəşə tutur, mülki infrastruktura raket zərbələri endirir. Sözsüz ki, Azərbaycan tərəfi bu təxribat cəhdlərinin qarşısını alır.

Ordumuz döyüş meydanında vuruşarkən, eyni zamanda, siyasi danışıqlar və diplomatiya cəbhəsində də mübarizə davam edir. Diplomatiya cəbhəsində də güclü və adekvat mübarizənin aparılması vacibdir. Döyüşlər başlayandan etibarən hər iki ölkə tərəfindən danışıqlar, münaqişənin həlli ilə bağlı bir sıra telefon zəngləri və görüşlər keçirilib. Daha sonra isə artıq danışıqlar və döyüşlərin gedişatı barədə tərəflərin diplomatik nümayəndələrinin iştirakı ilə Moskva görüşü baş tutdu. Bununla da cəbhədə gedən döyüşlərin birinci mərhələsi başa çatdı. Amma düşmən tərəfi bu görüşün nəticələrinin icrasını yerinə yetirmədi”.

Deputat məqaləsində vurğulayır ki, ümumilikdə, beynəlxalq hüquq Azərbaycanın tərəfindədir, qəbul edilən və işğalçı düşmən tərəfindən heç vaxt icra olunmamış 4 qətnamə bunun ən böyük sübutudur. Azərbaycan beynəlxalq arenada daim adekvat və obyekt mövqeyi ilə seçilib. Məhz bu mövqedən irəli gələrək beynəlxalq səviyyədə Azərbaycanın ərazi bütövlüyü haqqında düşüncə də müsbət istiqamətdədir. Sözsüz ki, “beynəlxalq cəbhə”də daim ön planda olmaq, məlumatları və faktları təhrif etmədən nüfuzlu təşkilatlara, qurumlara, vətəndaş cəmiyyəti institutlarına çatdırmaq üçün “informasiya cəbhəsi”ndə güclü olmaq da zəruridir.

“XXI əsrin ən böyük cəbhələrindən biri əlbəttə ki, “informasiya cəbhəsi”dir. Məlumatların dəqiq, qərərsiz, rəsmi və mötəbər mənbələrdən dünya ictimaiyyətinə çatdırılması, Ermənistanın “qara” təbliğat, yalan məlumatların yayılması istiqamətindəki fəaliyyətinə qarşı bu cəbhədə fəallıq olduqca önəmlidir. “İnformasiya cəbhə”sində artıq Ermənistan vətəndaşları, yaxud Dağlıq Qarabağda məskunlaşan, döyüşən hərbçilərlə yox, qlobal səviyyədə diaspor və onların qara kampaniyaları ilə mübarizə aparırıq. Əlbəttə ki, bu “cəbhə”də daim öndə olmağımız üçün gənclərin təşəbbüsü və ictimai-siyasi xadimlərin, ziyalıların dəstəyi ilə kifayət qədər genişmiqyaslı işlər aparılıb və sona qədər davam etdirilməkdədir. Bu “cəbhə”də olan fəaliyyət də özlüyündə dövlətçiliyə böyük xidmətlərdən biridir. Hamı səfərbər olunub. Prezident İlham Əliyev dediyi kimi, Azərbaycan haqq yolundadır və Qarabağ Azərbaycandır!”, - deyə məqalənin sonunda vurğulanır.