SİYASƏT


Deputat: Azərbaycan cəmiyyətində toxunulmaz şəxs yoxdur

Bakı, 23 avqust, AZƏRTAC

Koronavirus pandemiyası ilə əlaqədar kütləvi tədbirlərin, o cümlədən toyların qadağan edildiyi bir vaxtda sosial şəbəkələrdə yayılan toy görüntüləri ictimai rəydə kəskin etiraz doğurub. Bu da təbiidir, çünki indiyə kimi bu cür tədbirlər keçirən sadə vətəndaşlarımız barədə inzibati tədbirlər görülüb və onların cəzalandırılması ictimaiyyətin gözü qarşısında baş verib.

AZƏRTAC xəbər verir ki, bu fikirləri Milli Məclisin deputatı Məzahir Əfəndiyev deyib.

O bildirib ki, dövlətin insanları karantin rejiminin tələblərinə riayət etməyə çağırdığı, Ermənistan Azərbaycan Dağlıq Qarabağ münaqişəsinin gərginləşdiyi bir vaxtda cəmiyyətdə tanınan insanların bu hərəkətlərinə heç bir halda haqq qazandırmaq olmaz. Bu cür vəzifə daşıyıcıları sadə insanlara nümunə olmaq əvəzinə özləri qanunları kobud şəkildə pozur və buna bəzi hallarda hətta haqq qazandırmağa çalışırlar.

Toy sahiblərinin, eyni zamanda, iştirak edənlərin qanunları pozaraq Prezidentin çağırışlarına məhəl qoymamaları, həmçinin “Biz birlikdə güclüyük” şüarına saymazyana yanaşmaları ictimai rəydə hökumətin bu istiqamətdə hansısa sərt tədbirlər görəcəyinə şübhələri artırırdı. Lakin baş verən hadisələr bunun əksini göstərdi.

Azərbaycan ictimaiyyətinin haqlı tələbinə uyğun xalq qarşısında məsuliyyət daşıyan bu vəzifə sahiblərinin hakimiyyət tərəfindən cəzalandırılması ictimai təpki ilə yanaşı, dövlətin iradəsinin, gücünün bir daha ortada olduğunu əyani sübut etdi. Aydın oldu ki, artıq Azərbaycan cəmiyyətində toxunulmaz şəxs yoxdur, qanunu pozanlar kimliyindən asılı olmayaraq qanun qarşısında cavab verəcəklər.

Bu gün Azərbaycan üçün çətin, həssas bir zamanda hamımız birmənalı şəkildə Prezidentin yanında olmalıyıq və qanunu pozanlar bilməlidir ki, güclü dövlətimiz onlara layiq olduqları yerin bundan sonra da çox böyük həvəslə göstərilməsində yardımçı olacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.