SİYASƏT


Deputat: Azərbaycan gəncliyi bütün platformalarda qalibdir

Bakı, 30 iyul, AZƏRTAC

Azərbaycan Respublikası artıq 30 ildir ki, müstəqil olaraq müasir dünyada uğurla inkişaf edir. Azərbaycan gəncliyi daim ölkənin ictimai-siyasi həyatında lokomotiv rolunu oynayaraq dövlətçiliyin qurulması, möhkəmləndirilməsi və inkişafı mərhələsində öz bilik, bacarıqları ilə bu proseslərdə iştirak etməklə Vətənə, dövlətə bağlılıqlarının, eləcə də Vətənin qorunmasının hər zaman ali hədəf olduğunu bu uzun müddət ərzində mənimsəyib. Azərbaycan gəncliyinin mübarizliyinin bariz nümunəsi 44 günlük Vətən müharibəsində Azərbaycan Ordusunun böyük Zəfər qazanmasıdır.

Bunu AZƏRTAC-a açıqlamasında Milli Məclisin deputatı Məzahir Əfəndiyev söyləyib.

O bildirib ki, əsası ulu öndər Heydər Əliyev tərəfindən qoyulan gənclər siyasəti 2003-cü ildən Prezident İlham Əliyev tərəfindən yeni müstəvidə uğurla davam etdirilərək istər gənclərin mədəni-sosial həyatının təşkili, istərsə də onların elmi, vətənpərvərlik biliklərinin müasir çağırışların tələblərinə uyğunlaşdırılması istiqamətində böyük işlər görülüb. Xüsusilə Azərbaycan gənclərinin qlobal-siyasi debatlarda iştirakçılığı, habelə yeni platformalarda özlərinin aktiv rolu Azərbaycan gəncliyinin böyük potensialının varlığını bu gün də təsdiq edir. Belə ki, Azərbaycan dünya gənclər siyasətinin müəyyənləşməsində on ildən artıq bir müddətdə yaxından iştirak edir. Ölkəmizin bu sahədə əldə etdiyi uğurlu təcrübəni dünyada fəaliyyət göstərən qlobal gənclər institutları yüksək qiymətləndirərək 2014-cü ildə ilk dəfə olaraq bütün dünyanın, BMT-yə üzv olan ölkələrin, gənclər siyasəti ilə məşğul olan dövlət, qeyri-dövlət mütəxəssislərinin, nazirlərin iştirakı ilə “Gənclər Siyasəti üzrə birinci Qlobal Forumu”nun (1st Global Youth Policy Forum) məhz ölkəmizdə keçirilməsini dəstəkləyib.

“BMT-nin Baş katibinin yanında fəaliyyət göstərən Gənclər Ofisi, Avropa Şurasının Gənclər Departamenti, UNESCO, BMT-nin İnkişaf Proqramının, eləcə də gənclər siyasəti ilə məşğul olan regional ofislərin iştirakı ilə 2014-cü il oktyabrın 28-30-da Bakıda keçirilmiş bu Qlobal Forumda dünyada gənclər siyasətinə dair “Bakı Kommünikesi” adlandırılan sənəd qəbul olunub. Həmin görüşdə Azərbaycan Prezidenti İlham Əliyev məzmunlu və əhatəli nitq söyləyib. Dövlətimizin başçısının “Gənc nəslimiz innovasiyalarla bağlı məsələlərdə fəal iştirak edir. Gənc nəsil çox yaradıcıdır, dinamikdir. Həmçinin Azərbaycan informasiya-kommunikasiya texnologiyaları sahəsində də sürətlə inkişaf edir” sözləri ölkəmizin hər zaman innovasiya, yeniliklərə, müasir çağırışlara hazır olduğunun əyani sübutudur.

Bu il iyulun 18-22-də dünya qlobal gənclər platformasında Azərbaycanın ev sahibliyi ilə reallaşdırılan yeni, böyük tarixi həmrəylik təşəbbüsünə şahidlik etdi. Belə ki, 120 ölkəni özündə birləşdirərək BMT Baş Assambleyasından sonra ən böyük beynəlxalq təsisat olan Qoşulmama Hərəkatına sədrlik edən dövlətimizin təşəbbüsü ilə Hərəkata üzv dövlətlərin Gənclər Şəbəkəsinin Sammiti keçirildi”, - deyə deputat qeyd edib.

Onun sözlərinə görə, hələ 2019-cu il oktyabrın 25-26-da Bakıda keçirilən Qoşulmama Hərəkatının XVIII Zirvə Görüşü çərçivəsində dövlət və hökumət başçıları həmin il oktyabrın 24-25-də ilk dəfə keçirilən Qoşulmama Hərəkatının Gənclər Zirvə Görüşünün təşkilini müsbət qarşılayıblar.

Deputat vurğulayıb ki, Qoşulmama Hərəkatının Gənclər Şəbəkəsinin yaradılması, eyni zamanda, Azərbaycanın günümüzün ən əhəmiyyətli inkişaf sənədi olan “2030-cu ilədək Davamlı İnkişaf sahəsində Gündəliyin” 17-ci Məqsədinin əsas çağırışı olan qlobal tərəfdaşlığın gücləndirilməsi çağırışına cavab verən fəaliyyətinin nəticəsidir. Bu, Prezident İlham Əliyevin rəhbərliyi ilə QH-nin institutlaşması istiqamətində Parlament Şəbəkəsinin yaradılmasından sonra atılan növbəti uğurlu addım idi. Sammitin digər bir qürurverici məqamı da bağlanış tədbirinin mədəniyyət paytaxtımız olan Şuşa şəhərində keçirilməsidir. Hərəkatın ilk Gənclər Sammitinin açılış mərasimində Prezident İlham Əliyevin iştirakçılara ünvanlanan müraciəti zamanı səsləndirilən fikirlər bir daha Azərbaycanın ulu öndər Heydər Əliyev tərəfindən əsası qoyulan gənclər siyasətinə verdiyi müstəsna əhəmiyyətin, habelə Qoşulmama Hərəkatına sədrliyimizin müvəffəqiyyətlə həyata keçirildiyinin və üzv dövlətlərin ölkəmizə göstərilən etimadının bariz nümunəsidir.

“Sammitdə Azərbaycanın 27 illik təcrübəyə malik Azərbaycan Respublikası Gənclər Təşkilatları Milli Şurasının (ARGTMŞ) sədri səviyyəsində təmsil olunması Şəbəkənin gələcək fəaliyyətində məhz gənclər siyasəti sahəsində fəaliyyət göstərən təşkilatlarımızın əldə etdiyi uğurlu təcrübə və nailiyyətlərdən istifadə olunacağına dəlalət edir. Bu günə qədər ölkəmizin bütün sahələrində ARGTMŞ-nin təcrübəsindən istifadə olunması çoxvektorlu xarici siyasətimizdə də yeni-yeni uğurlara və inkişafa yol açacaq.

İnanıram ki, Azərbaycan gənclərinin qlobal çağırışlarda, habelə qlobal gündəliyin icrasında iştirakçılığı bundan sonra da ikitərəfli və çoxtərəfli əməkdaşlıqla davam etdiriləcək. Prezident İlham Əliyevin rəhbərliyi ilə gənclər sahəsinin inkişafı üçün yaradılmış bütün infrastrukturdan maksimum istifadə etməklə formalaşmaqda olan yeni nəsildən ali dəyərlərin qorunmasında və inkişaf etdirilməsində istifadə olunmalıdır”, - deyən Məzahir Əfəndiyev fikirlərini yekunlaşdırıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.