Bakı, 1 avqust, AZƏRTAC

Prezident İlham Əliyev Masallı, Lerik və Göygöl Rayon İcra Hakimiyyətlərinin yeni başçılarını qəbul edərkən ölkədə bu vaxta qədər görülmüş işlər, qarşıda dayanan vəzifələr haqqında geniş məlumat verdi. Bildirildi ki, son illərdə bütün rayonlarda regionların sosial-iqtisadi inkişafı Dövlət Proqramının icrası nəticəsində geniş abadlıq-quruculuq işləri görülüb, böyük infrastruktur layihələri icra edilib və uzun illər ərzində insanları narahat edən problemlərin böyük hissəsi aradan qaldırılıb. Elektrik enerjisi ilə təchizat, qazlaşdırma, yol infrastrukturu, suvarma, içməli su layihələri, sosial infrastruktur layihələri icra olunub, hər rayonda müasir xəstəxana, tibb ocaqları, bir çox məktəblər inşa edilib. Bütün bunlar qəbul olunmuş Dövlət proqramlarının müsbət nəticələri olaraq qiymətləndirilir. İnfrastruktur layihələri davamlı olaraq icra edilir.

AZƏRTAC xəbər verir ki, bunu Milli Məclisin deputatı, Yeni Azərbaycan Partiyasının İdarə Heyətinin üzvü Cavid Osmanov bildirib.

C.Osmanov qeyd edib ki, infrastruktur layihələrinin icra edilməsi, eyni zamanda, yeni iş yerlərinin yaradılmasına xidmət göstərir. Bölgələrdə həyata keçirilən bütün quruculuq işlərində sahibkarlar da fəal iştirak edirlər. Bu əsasda yeni iş yerlərinin yaradılması xüsusi əhəmiyyət kəsb edir. Belə ki, ölkə əhalisinin sayında davamlı artım dinamikası qeydə alınır. Əgər Azərbaycan müstəqilliyə qovuşanda əhalinin sayı 7 milyondan bir qədər çox idisə, bu gün 10 milyondan çoxdur. Bu, təbii olaraq tələb edir ki, iş yerlərinin açılması prosesi daimi xarakter alsın. Son illər ölkədə ödənişli sosial işlərin yaradılması da geniş vüsət alıb.

Dövlətimizin başçısı bir neçə rayonun keçmiş icra başçılarının törətmiş olduqları qanunsuz əməllərə diqqət çəkərək onların cinayət məsuliyyətinə cəlb edildiklərini bildirməklə heç kimin qanundan üstün olmadığını qeyd etdi. Vurğulandı ki, icra başçıları daim insanlarla təmasda olmalıdırlar. Onlar bütün kəndləri gəzməli, kənd camaatının qayğıları ilə yaşamalı, insanları narahat edən problemləri onların dilindən eşitməli və imkan daxilində bu problemləri həll etməlidirlər. Həqiqətən də, əgər hər bir kəndin problemi həll olunarsa, demək olar ki, ölkədə insanları narahat edən ciddi problem qalmaz. Ümumiyyətlə, icra başçıları öz fəaliyyətlərində sosial ədalət prinsipinə əməl etməyə borcludurlar.

“Dövlətimizin siyasətinin də mərkəzində məhz Azərbaycan vətəndaşı və sosial ədalət prinsipləri dayanır. Həyata keçirilən siyasət Azərbaycan xalqının rifah halının yaxşılaşmasına istiqamətləndirilib və bu siyasət nəticəsində ölkəmizin beynəlxalq nüfuzu davamlı olaraq güclənir.

“Prezident İlham Əliyev yeni təyin edilmiş icra başçıları qarşısında vəzifələri müəyyənləşdirərkən ilk olaraq şəhid ailələrinə xüsusi diqqət göstərilməli olduğunu bildirdi. Qeyd etdi ki, dövlətimiz tərəfindən şəhid ailələrinə bu diqqət daim göstərilir. İkinci Qarabağ müharibəsindən əvvəl və İkinci Qarabağ müharibəsindən sonra şəhid ailələri daim diqqət mərkəzindədir. Şəhid ailələrinin və müharibə əlillərinin məişət problemləri dövlət xətti ilə həll olunur. Şəhid ailələrinə dövlət tərəfindən mənzillər, fərdi evlər və minlərlə minik maşınları verilib. Bu proses davam etdirilir. Bakı, Sumqayıt və Abşeron rayonlarında şəhid ailələrinin evlə təminatı məsələləri artıq yekunlaşmaq üzrədir. Digər rayonlarda da dövlət xətti ilə müvafiq işlərin görülməsi planlaşdırılır. O cümlədən şəhid ailələrini, müharibə əlillərini işlə təmin etmək üçün çoxsaylı tədbirlər həyata keçirilir. Rayon icra orqanlarının nümayəndələri də bu kateqoriyadan olan insanlara biganə qalmamalı, əksinə, daim onların yaşayışı ilə maraqlanmalıdırlar”, - deyə C.Osmanov vurğulayıb.

Deputat bildirib ki, qəbulda Göygöl, Masallı və Lerik rayonlarının turizm potensialının çox zəngin olması, həm də hər üç rayonda kənd təsərrüfatının inkişafı üçün əlverişli imkanların olması qeyd olundu. Prezident İlham Əliyev torpaqların qanunsuz zəbt edilməsi məsələsinə toxunaraq, qanunsuz işlərlə məşğul olanların cəzalandırılacağını bəyan etdi. Dövlətimizin başçısı həmçinin müasir idarəetmə qaydalarının tətbiq edilməsinə, eləcə də ictimai nəzarətin vacibliyinə diqqət çəkdi, müasir idarəetmənin faydalarından danışdı.

“İctimai nəzarət mövcud olan problemlərə dövlət orqanlarının diqqətinin cəlb edilməsinə zəmin yaradır və səmərəliliyi artırır”, - deyə Cavid Osmanov bildirib.