CƏMİYYƏT


Deputat: Düşünülmüş dövlət siyasəti nəticəsində pandemiya vəziyyətindən mümkün dərəcədə güclü çıxacağıq

Bakı, 16 sentyabr, Səadət Hakıyeva, AZƏRTAC

Azərbaycan Prezidenti İlham Əliyevin Sumqayıt Kimya Sənaye Parkının nəzdində Peşə Təhsil Mərkəzinin açılışındakı çıxışında, həmçinin yeni dərs ilinin başlanması münasibətilə müraciətində verdiyi mesajlar və etdiyi çağırışlar böyük əhəmiyyət kəsb edir.

Bu fikri AZƏRTAC-a açıqlamasında Milli Məclisin Mədəniyyət komitəsinin sədri Qənirə Paşayeva bildirib.

Q.Paşayeva dövlətimizin başçısının çıxışındakı mesajların müəyyən məqamlara əsaslandığını qeyd edib. Bildirib ki, ilk olaraq Peşə Təhsil Mərkəzinin yerləşdiyi Kimya Sənaye Parkında məhsul istehsalı və ixrac istiqamətində müsbət dinamika mövcuddur. “Ötən il ərzində Sumqayıt Kimya Sənaye Parkında 823 milyon manatlıq məhsul istehsal edilib ki, bunun da 276 milyon manatlıq (təqribən 33 faiz) hissəsi ixrac olunub. 2020-ci ilin ilk 6 ayı ərzində 534 milyon manatlıq məhsul istehsalı ilə bu Parkın ölkə sənayesinin qeyri-neft sektorunda (5,7 milyard manat) xüsusi çəkisi 9,3 faiz olub. Hazırda Parkda fəaliyyət göstərən müəssisələrdə 5500-dən çox insan daimi işlə təmin olunub. Gəlin etiraf edək ki, o qədər də böyük olmayan zaman içində belə göstəricilərlə çıxış etmək heç də sıradan bir iş deyil. Bu, düşünülmüş addımların bəhrəsi, elmin istehsalata tətbiqinin təzahürləri kimi diqqəti cəlb edir. Məhz belə bir məqamda Peşə Təhsil Mərkəzinin mövcud olması özlüyündə məsələyə sistemli yanaşmanı, universallığı ifadə etməkdədir. Bu fəaliyyət gələcəkdə məktəbdən istehsalata, istehsalatdan məktəbə keçidi təmin etmək deməkdir”, - deyə deputat qeyd edib.

Sumqayıtın nəinki respublikamızın, ümumiyyətlə Cənubi Qafqazın ikinci böyük sənaye mərkəzi olduğunu diqqətə çatdıran Q.Paşayeva tezliklə bu şəhərdə daxili tələbatı təmin edəcək şüşə istehsalı zavodunun fəaliyyətə başlayacağını deyib. O qeyd edib: “Prezident İlham Əliyev vurğuladığı kimi, hazırda tikinti sektoru qlobal pandemiya səbəbindən bir qədər tənəzzülə uğramaqdadır. Qlobal pandemiyadan irəli gələn özünütəcrid qaydaları fonunda daxili tələbatı mümkün olduğu qədər yerli məhsullarla təmin etmək əhəmiyyətlidir. Dövlətimizin başçısının Peşə Təhsil Mərkəzinin açılışında qeyri-neft sektorunun inkişafı məsələsinə toxunması xüsusilə diqqət çəkir. Çünki bu gün tədiyyə balansının müsbət səviyyədə saxlanmasının əsas səbəbi neft-qaz amilidir. Amma ixracyönümlü və idxalı əvəzləyə biləcək istehsalat sahələri mütləq yaradılmalıdır”.

Deputat bu layihənin, ekoloji tarazlığın qorunması, həm də torpaqların istifadəsiz qalmasının qarşısının alınması baxımından əhəmiyyətli olduğunu vurğulayıb. Bildirib ki, dövlət başçısı çıxışında xaricdə yaşayan soydaşlarımızı Azərbaycana vəsait qoymağa dəvət etdi. Prezident İlham Əliyev bildirdi ki, Azərbaycan onların vətənidir və onlar hər zaman Azərbaycanın dəstəyini görürlər, güclü Azərbaycan onların da gücünü artırır. Ona görə azərbaycanlılar müxtəlif ölkələrdə iqtisadiyyat, kommersiya, biznes sahələrində böyük uğurlar əldə ediblər. Onlar da öz vətəninə vəsait qoymalıdırlar, öz vətəni ilə daim əlaqə saxlamalıdırlar.

Q.Paşayeva deyib: “Dövlət başçısı səviyyəsində çağırış varsa, deməli, Vətənə sərmayə qoymağın da, burada qazanıb, qazandırmağın da qayğısına qalmaq lazımdır. Bu, artıq milli vəzifə xarakteri daşıyır desək yanılmarıq. İnanıram ki, dünya azərbaycanlıları, iş adamları Prezident İlham Əliyevin çağırışına əməli addımlarla cavab verəcəklər”.

Deputatın sözlərinə görə, Sumqayıt Kimya Sənaye Parkının nəzdində Peşə Təhsil Mərkəzinin açılışı ümumi inkişaf tendensiyası baxımından yeniliklərə münasibətlə fərqlənir. Dövlətimizin başçısı da vurğuladığı kimi, bununla bir neçə strateji hədəfə nail olunacaq. Mərkəzin fəaliyyəti nəticəsində tələbələrə müasir infrastruktura malik mərkəzdə dövrün tələbinə uyğun bacarıqlar və peşə vərdişləri aşılanacaq. Həmçinin təlim-tədris prosesində iştirak edəcək mütəxəssislər elə parkın rezidentlərinin yüksəkixtisaslı işçilərindən olacaq. Tələbələr Sumqayıt Kimya Sənaye Parkının müəssisələrində təcrübə keçməklə iş yeri əldə etmək imkanı qazanacaqlar.

“Bu tədris ili ərəfəsində tam komplektləşdirilmiş bir neçə yeni məktəb bərpa olunaraq istifadəyə verilib. Pandemiya bitəcək və həyat normal axarına düşəcək. Biz düşünülmüş dövlət siyasəti nəticəsində mövcud vəziyyətdən mümkün dərəcədə güclü çıxacağıq”, - deyə Qənirə Paşayeva bildirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.