SİYASƏT
Deputat: Ermənistanda ordu yox, ayrı-ayrı quldur və cinayətkar dəstələr var
Bakı, 5 oktyabr, AZƏRTAC
Prezident İlham Əliyevin müsahibə və çıxışlarını nəinki Azərbaycan və Türkiyə ictimaiyyəti, bütövlükdə bölgə ictimaiyyəti, xarici mətbuat səbirsizliklə gözləyir, bu çıxışlar çox böyük diqqətlə izlənilir. Çünki bütün bu müsahibə və çıxışlarda hər dəfə gündəmi müəyyən edən, mətbuatın baş xəbərinə çevrilən mesajlar səslənir. Həmçinin Prezident İlham Əliyevin fəaliyyəti və onun çıxışları Ermənistan ictimaiyyəti və mediasının da diqqət mərkəzindədır. Sadə erməni xalqı çox gözəl dərk edir ki, bir xalq olaraq onların taleyi Azərbaycan dövlətindən, onun humanist Prezidentindən asılıdır. Ermənistan dövlətinin rəhbərliyi və siyasətçiləri də bu gerçəkliyi anlayırlar, bilirlər ki, artıq Ermənistanın baş naziri kapitulyasiya aktına imza atıbdır. Bu mənada qalib dövlətin, qalib Rəhbəri, onun şərtləri ilə razılaşmaq məcburiyyətindədir. Təbii ki, onların və onları dəstəkləyən qüvvələr üçün də Azərbaycandan gələn mesajlar çox önəmlidir. Hər dəfə Prezident İlham Əliyevin Ermənistana və onların havadarlarına yönəlik sərt və reallığa əsaslanan mesajları səslənən kimi, vaxt keçmədən əks tərəfdən reaksiya gəlir. Prezidentin Suqovuşandakı çıxışına ilk reaksiyalardan biri, daha doğrusu, ilk üzrxahlığı sabiq prezident Robert Köçəryandan gəldi. Həqiqətən də bütün bunlar güclü və haqlı olmağımızın nəticəsidir.
Bu fikirləri AZƏRTAC-a açıqlamasında Milli Məclisin deputatı Məlahət İbrahimqızı bildirib.
Deputat deyib: “Ermənistanın keçmiş prezidenti cəllad Serj Sarkisyanın törətdiyi cinayətlər, xüsusən də Xocalıdakı qətliam beynəlxalq təşkilatlar üçün qara ləkə və utancverici bir haldır. Bu cinayətkar illər boyu Avropada, ABŞ-da AŞPA, ATƏT, Avropa Parlamenti, BMT-nin ofislərində sərbəst gəzəndə, ona heç vaxt törətdiyi və mətbuatda etiraf etdiyi bu cinayətlə bağlı bir dəfə də olsun sual vermədilər. Əksinə ayağının altına qırmızı xalçalar açaraq, axtarışda olan bu cinayətkardan müxtəlif mükafat və rüşvət almaqla məşğul idilər. İnsan haqları, demokratiya dəyərlərini ancaq Azərbaycan və Türkiyədə axtaran bu beynəlxalq qurum və siyasətçilər, yüzlərlə günahsız qətlə yetirilmiş canların hesabının Allah tərəfindən, haqqı və ədaləti tələb edən Azərbaycan dövləti tərəfindən bir gün tələb olunacağını bilmirdilərmi? Amma belə qatillər və onları dəstəkləyənlər üçün haqq və ədalət məfhumu ancaq kağız üzərində olub. Həmin hesab günü keçən il Azərbaycan xalqının 44 günlük Vətən müharibəsində Milli Ordumuzun şücaəti ilə qazandığımız Zəfər Günü idi. Keçən il müharibə bitəndən sonra Prezident İlham Əliyev çıxışlarının birində demişdir ki, bizim müharibəmiz bitdi, lakin mübarizəmiz davam edir. Bəli bizim mübarizəmiz azərbaycanlıların və türklərin qanına susamış Serj Sarkisyan və onun kimi cinayətkarlara qarşı davam edir. Müharibənin də öz qanunları var. Ermənistanın təcavüzkarlıq siyasəti Azərbaycana qarşı elan edilməmiş və işğalçılıq müharibəsi idi. Qeyd etdiyim kimi, yüzlərcə günahsız mülki insanların öldürülməsinə, Xocalı qətliamına və Gəncə, Bərdə, Tərtər, Naftalan, Mingəçevir, Goranboy, Qəbələ kimi cəbhədən çox uzaqda törədilən terrora və müharibə cinayətlərinə görə səbəbkarlar hüquq qarşısında cavab verəcəklər. Bütün bunlarla bağlı Baş Prokurorluq tərəfindən cinayət işi açılıbdır. Hesab edirəm ki, işlər yekunlaşdıqdan sonra müvafiq beynəlxalq qurumlara təqdim ediləcək Biz mübarizəmizi sona qədər aparacağıq.
M.İbrahimqızı qeyd edib: “Ötən dövrdə Prezident İlham Əliyev bütün çıxışlarında Ermənistan hakimiyyətində, erməni ictimaiyyətində baş verən prosesləri o qədər dəqiqliklə təhlil edir ki, bəlkə də Ermənistan rəhbərliyi öz ölkəsində ictimai-siyasi proseslərin vəziyyətini bu dərəcədə dərk etmirlər. Bilirsiniz, Ermənistan rəhbərliyi hər zaman öz xalqına yalan danışır, onları aldadıblar. Prezidentimiz erməni ordusunda olan hərc-mərclikdən, korrupsiya və total rüşvətxorluq, satqınçılıq və nəhayət on minlərlə əsgər və hərbiçinin fərarilik haqqında məlumatları bir daha bölgə ictimaiyyətinə çatdırdı. Təsəvvür edin, müharibənin təkcə ilk günündə Suqovuşan qəsəbəsi və Talış kəndi istiqamətində döyüşlər zamanı Hadrut ətrafında on beş mindən çox erməni əsgər və zabit öz mövqelərini qoyub qaçıb. Yəni, onlar anladılar ki, bu torpaq onların vətəni deyil. Vətən məfhumu dərin mənaya malikdir, o, insanların genetik yaddaşlarında formalaşmış bir istəkdir, sevgidir, duyğudur. Vətən pulla alınmır. İnsan yaşadığı torpağa və ya əraziyə vətən demir. İnsan anlayanda ki, onun ayağı altındakı torpaq uğrunda qanlar axıdılıb və ya dədələrin ruhu gəzir, onda dərk edir ki, bura Vətən torpağıdır. Abbas Səhhət “…Vətən əcdadlarımızın məskənidir…” misrasını sözgəlişi deməyib. Biz azərbaycanlıları da vətənə bağlayan bu ruhdur, bu sevgidir. Bu mənada erməni ordusunu kütləvi olaraq tərk edən on minlərlə əsgər bilir ki, nəinki Qarabağ hətta indiki Ermənistan ərazisi belə onların vətəni deyil. Müxtəlif xarici və erməni mətbuatının verdiyi məlumata görə bu müharibə dövründə erməni tərəfindən guya altmış minə yaxın hərbi qulluqçu və əsgər olmuşdur. Sözsüz ki, bunun əksəriyyəti xaricdən döyüşmək üçün gətirilən muzdu əsgərlər və terrorçular idi. Deməli, erməni ordusunun hər üçüncü və ya dördüncü hərbçisi fərari olmuşdur. Bu rəqəm özlüyündə Ermənistanda baş verən xaos, eləcə də bir çox problemlərin cavabıdır. Bu, həmçinin onu göstərir ki, Ermənistanda ordu deyilən qrup yoxdur, quldur və ayrı-ayrı cinayətkar dəstələr var. Erməni ordusunun təchizatına ayrılan bütün pulları uzun illər hakimiyyətdə olan Serj Sarkisyan və onun cinayətkar komandası mənimsəyibdir. Əvəzində isə Rusiyadan ucuz qiymətə istifadə müddəti bitmiş və köhnə model silahlar alınıb. Bunu keçən il müharibə vaxtı ölkənin baş naziri Nikol Paşinyan da etiraf etdi. Mövqelərdə öz əsgərinin ayağını zəncirlə bağlayan bir ordunu ordu adlandırmaq olarmı? Ona görə Ermənistanda gənclər kütləvi olaraq ölkəni tərk edir”.
Onun sözlərinə görə, 2018-ci il Serj Sarkisyanın son seçki nəticələrinin beynəlxalq təşkilatlar, xüsusən ATƏT-in Demokratik Təsisatlar Bürosu tərəfindən tanınması, onun demokratik seçki adlandırılması bu təşkilatların iflası və ya bu seçki cinayətinə şərik olmaq demək idi. Prezident İlham Əliyev istər Azərbaycanda, istərsə də xaricdə, ən yüksək kürsülərdə çıxışlarında hər zaman bu məsələlərə, ATƏT-in Minsk Qrupunun, faktaraşdırıcı və monitorinq qruplarının yarıtmaz fəaliyyətinə, qeyri-obyektiv, qərəzli mövqelərinə qarşı kəskin münasibətini bildiribdir. Görünən həqiqət də budur ki, Qarabağ münaqişəsinin də uzun müddət həll olunmamasında, müharibə vəziyyətinə gətirib çıxarılmasında onların da məsuliyyəti var.