SİYASƏT


Deputat: Ermənistanın mülki insanları atəşə tutması onun Azərbaycan Ordusu qarşısında acizliyinin təzahürüdür

Bakı, 29 oktyabr, AZƏRTAC

İşğalçı Ermənistan dünyanın gözü qarşısında növbəti terror aktını həyata keçirdi. Oktyabrın 28-də Bərdə şəhərinin kasetli bombalardan atəşə tutulması nəticəsində 21 nəfərin həlak olması və 70 nəfərin yaralanması bir daha göstərir ki, ermənilərin qəddarlığının, insanlığa qarşı cinayətlərinin həddi yoxdur. Oktyabrın 10-u, 18-i və 26-da əldə edilmiş humanitar atəşkəs razılaşmalarını kobud şəkildə pozan işğalçı dövlətin bu müddət ərzində törətdiyi terror aktlarına diqqət yetirsək, onların coğrafiyasının nə qədər geniş olduğunu görərik. Azərbaycanın ikinci böyük şəhəri olan Gəncənin, sonra isə Bərdə şəhərinin iki dəfə raket hücumuna məruz qalması təkcə Ermənistan hakimiyyətinin faşist mahiyyətinə və onun prinsipsizliyinə dəlalət etmir, həm də təcavüzkarın Azərbaycan Ordusu qarşısında acizliyinin təzahürüdür. Bu cinayətlər, eyni zamanda, dünyaya belə bir mesaj da ünvanlayır ki, bir cinayətin cəzasız qalması digər cinayətə yol açır.

Bu fikirləri AZƏRTAC-a açıqlamasında Milli Məclisin deputatı Malik Həsənov bildirib.

M.Həsənov qeyd edib ki, dünya dövlətləri, nüfuzlu beynəlxalq təşkilatlar nə vaxtadək baş verən hadisələrə ədalət, beynəlxalq hüququn norma və prinsipləri çərçivəsində deyil, öz maraqları baxımından yanaşır, bu halda onlardan həqiqətə həqiqət gözü ilə baxmağı gözləmək sadəlövhlük olar. “28 ilin reallığı budur ki, vasitəçilik missiyasını yerinə yetirmək məqsədilə yaradılan, həqiqətdə isə Ermənistanın yanında olub ona gizli, yaxud açıq şəkildə maddi və mənəvi dəstək göstərərək ərköyün uşaq kimi əzizləyən ATƏT-in Minsk qrupunun həmsədrləri fəaliyyətsizliklərinə görə daim tənqid olunublar. Bu gün də eyni vəziyyət davam edir. ATƏT-in Minsk qrupu həmsədrləri BMT Təhlükəsizlik Şurasının daimi üzvləri kimi də istəsələr istənilən məsələni həll etmək imkanında, gücündədirlər. Niyə etmək istəmirlər? Məhz bu niyələr Azərbaycan dövlətini narahat edir, sərt bəyanatlar səsləndirməsinə səbəb olur. Azərbaycan bu gün beynəlxalq hüquq tərəfindən tanınmış ərazilərini bərpa edir. Dövlətimizin başçısı İlham Əliyev bu çağırışı edir ki, əgər BMT Təhlükəsizlik Şurasının daimi üzvləri, Minsk qrupunun həmsədrləri bunu edə bilməyiblərsə, çəkilsinlər kənara, mane olmasınlar. Ermənistandan fərqli olaraq biz heç kimdən kömək istəmirik. Ölkə Prezidenti oktyabrın 28-də Rusiyanın İnterfaks agentliyinə müsahibəsində də sual doğuran bu kimi bir çox məqamlara diqqəti yönəltdi”, - deyə deputat vurğulayıb.

Azərbaycana hücumların məqsədinin aydın olduğunu, bunun Azərbaycan xalqını qorxutmaq və Ordumuzu Ermənistan ərazisinə cavab zərbəsi endirməyə məcbur etmək, bununla da üçüncü tərəfləri münaqişəyə cəlb etmək olduğunu bildirən Malik Həsənov deyib: “Dost, qardaş Türkiyənin Azərbaycana mənəvi dəstəyini münaqişədə tərəf kimi dünya ictimaiyyətinə təqdim edən işğalçı Ermənistan görəsən təkcə son bir ayda havadarları tərəfindən silahlandırılmasını hansı adda təqdim edir? Hər gün Azərbaycan Ordusunun məhv etdiyi və qənimət kimi götürdüyü Ermənistan hərbi texnikasının statistikası açıqlanır. Amma kasıb, havadarlarının maddı dəstəyindən asılı olan işğalçı dövlətin hərbi texnikası bitmir ki bitmir. İşğalçının Azərbaycan tərəfinin şərtləri əsasında danışıqlar masası ətrafında əyləşməsinə “çalışan” dövlətlər, xüsusilə ATƏT-in Minsk qrupunun həmsədrləri Ermənistana siyasi, iqtisadi, hərbi, diplomatik dəstəyi dayandırmağın nə qədər önəm daşıdığının fərqindədirlər. Amma özləri də danışıqların bərpası çağırışlarında qeyri-səmimi, riyakar olduqları üçün işğalçı dövləti dəstəklərindən kənarda qoymaq istəmirlər. Hətta dəstək o səviyyədədir ki, Ermənistan törətdiyi terror aktlarını da öz üzərindən atır. Belə olan təqdirdə dünya dövlətlərindən gözlərini, qulaqlarını zaman və məkana uyğun olaraq deyil, ədalətə görə açacaqlarını düşünmək nə dərəcədə real görünə bilər?”.

Lakin Ermənistan və onun havadarları bilməlidirlər ki, heç nə bizi haqq yolundan dönməyə məcbur edə bilməz”, - söyləyən Malik Həsənov bildirib ki, Azərbaycan Ordusu Bərdənin qisasını döyüş meydanında alır: “Oktyabrın 28-də Azərbaycan Silahlı Qüvvələri Zəngilan, Füzuli, Cəbrayıl və Qubadlı rayonlarının 13 kəndini işğaldan azad etdi. Qələbə xəbərləri xalqımızı qürurlandırır, bütün işğal altında olan torpaqlarımızda bayrağımızın dalğalanacağı günün çox yaxında olduğuna əminliyi artırır. Dövlət-xalq-ordu birliyi sarsılmazdır. Heç bir təxribat zəfər yolumuza mane ola bilməz”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.