SİYASƏT
Deputat: Ermənistanın son günlərdə törətdiyi təxribatlar onun üçün daha böyük faciələrə səbəb ola bilər
Bakı, 15 iyul, AZƏRTAC
Prezident İlham Əliyev Xocasən qəsəbəsində şəhid ailələri və müharibə əlillərinə mənzillərin və avtomobillərin təqdim olunması mərasimində çıxışında bir sıra vacib məsələlərə toxundu, müharibə və postmüharibə dövrünə dair təhlillər apardı, yaranmış yeni şəraitdə Azərbaycanın mövqeyini bir daha açıq şəkildə ifadə etdi. Bildirdi ki, 44 günlük müharibə nəticəsində Azərbaycan ərazi bütövlüyünü bərpa etdi, münaqişəni öz gücünə nizama saldı. Dövlətimizin başçısı bir daha açıq şəkildə münaqişəyə yekun vurulduğunu diqqətə çatdırdı və xam xəyallara düşənlərə xəbərdarlıq etdi. Azərbaycan Prezidentinin bu xəbərdarlığı həm hələ də münaqişə anlayışını ortaya atmağa çalışan bəzi xarici qüvvələrə, həm məğlubiyyətdən dərs çıxarmaq istəməyən Ermənistana, həm də bu ölkədə pozuculuq fəaliyyəti ilə məşğul olan qüvvələrə ünvanlanmışdı.
Bunu AZƏRTAC-a açıqlamasında Milli Məclisin deputatı, YAP-ın İdarə Heyətinin üzvü Şahin İsmayılov bildirib.
Deputat deyib: “Azərbaycan güclü dövlətdir. Müharibədən yeni çıxmağımıza baxmayaraq, ölkəmizdə iqtisadi, siyasi proseslər normal qaydada gedir, daxili birlik yüksək səviyyədədir, işğaldan azad olunmuş ərazilərdə böyük quruculuq işlərinə başlanılıb və regional layihələr yüksək səviyyədə icra olunur. Bütün bunların fonunda biz bəzən müxtəlif dövlətlərin və təşkilatların Azərbaycana hər hansısa formada təzyiq cəhdlərini görürük. Həmin qüvvələr yaxşı anlamalıdırlar ki, Azərbaycanla təzyiq dilində danışmaq olmaz, yalnız əməkdaşlıq formasında ünsiyyət qurmaq mümkündür. Azərbaycana təzyiq göstərməyə cəhd edənlər yox, ölkəmizlə əməkdaşlığa üstünlük verənlər bundan qazanclı çıxarlar”.
Son günlər cəbhənin müxtəlif istiqamətlərində erməni təxribatının artdığını bildirən deputat deyib ki, 44 günlük müharibədə ordusunun böyük hissəsini itirən və rəzil vəziyyətə düşən Ermənistanın bu cür hərəkətləri yekunda onun daha böyük faciələrə səbəb ola bilər. Prezident İlham Əliyevin “biz müharibəyə hər zaman hazırıq və hazır olmalıyıq” söyləməsi Ermənistana açıq şəkildə edilən xəbərdarlıqdır. İmzalanan bəyanatlar yerinə yetirilməlidir. Ermənistanın bundan başqa yolu yoxdur. Azərbaycanın səbrini sınamaq, pozuculuq fəaliyyətinə cəhdlər etmək onlar üçün yaxşı heç nə ilə nəticələnməyəcək.
“Prezident İlham Əliyev bütün dövrlərdə, o cümlədən müharibə zamanı söylədiyi fikirləri reallaşdıran müdrik dövlət başçısıdır. Buna görə də qarşı tərəf ötən gün Müzəffər Ali Baş Komandanımızın söylədiyi fikirləri ciddi şəkildə yenidən təhlil etməli və əməkdaşlıq masasına oturmalıdır. Ermənistanla münasibətlərin perspektivlərinə də toxunan Prezident İlham Əliyev Azərbaycanın şərtlərinin aydın olduğunu, lakin qarşı tərəfdən hələ də rəsmi bir münasibət bildirilmədiyini söylədi. Əslində, Azərbaycan ilə Ermənistan arasında münasibətlərin bərpası ən çox Ermənistana lazımdır. Bizim itirəcəyimiz heç nə yoxdur. Zaman bizim xeyrimizə işləyir. Azərbaycan hər gün gücünə güc qatır. Ona görə də Ermənistan bütün spekulyasiyaları kənara qoymalı və üzərinə götürdüyü öhdəlikləri yerinə yetirməlidir”, - deyə deputat əlavə edib.