Bakı, 21 noyabr, AZƏRTAC

Azərbaycan Respublikası Prezidenti İlham Əliyevin ölkəmizin ərazi bütövlüyü ilə bağlı qətiyyətli mövqeyi və xalqının sarsılmaz iradəsi nəticəsində işğal altında olan torpaqlarımız 44 gün ərzində düşmən tapdağından azad edildi. Azərbaycan xalqının birliyi və dövlətimizin başçısının ətrafında sıx birləşməsi, Ordumuzun isə bu birlik və həmrəylikdən, həmçinin inamdan aldığı qüvvə ilə 44 gün ərzində əsl vətənpərvərlik nümunəsi göstərdi. “Vətən torpağından pay olmaz” ifadəsini reallığa çevirən Ordumuz işğalçı düşmənə sarsıdıcı zərbələr endirərək hər gün xoş xəbərlə xalqımızı daha da qürurlandırdı.

Bunu AZƏRTAC-a açıqlamasında Milli Məclisin deputatı Şahin Seyidzadə deyib.

Deputat Vətən müharibəsinin Azərbaycan, Rusiya və Ermənistan rəhbərlərinin birgə bəyanatı əsasında Azərbaycanın mütləq Qələbəsi ilə yekunlaşdığını xatırladıb. Bildirib ki, erməni silahlı qüvvələri müəyyən edilən cədvəl əsasında Azərbaycana məxsus ərazilərindən çıxarılır. Azərbaycan illərdir ki, işğalçı Ermənistan silahlı qüvvələrinin ərazilərimizdən qeyd-şərtsiz çıxarılması ilə bağlı təklif verdiyi halda, qarşı tərəf bunu qulaqardına vurub. Göründüyü kimi, məsələnin həlli üçün hərbi-siyasi yolun tətbiqi zəruri idi.

Bəyanatın imzalanmasından müəyyən müddət keçib. Artıq sazişdə qeyd edilən şərtlərin və icra olunmalı proseslərin birinci mərhələsi həyata keçirilib. Noyabrın 20-də Azərbaycanın işğal altında olan Ağdam rayonu ölkəmizə təhvil verildi. 30 illik münaqişənin 44 günlük müharibə nəticəsində Qələbə ilə sona çatdığı kimi, Ağdam rayonunun da danışıqlar yolu ilə qan tökülmədən azad olunması sözsüz ki, növbəti tarixi anlardan biridir. Ağdam 1990-cı illərin əvvəlində baş verən birinci Qarabağ müharibəsinin ən çox şəhid verən rayonlarından biri olub. Lakin aparılan uğurlu və müdrik siyasət nəticəsində Ağdam bu il noyabrın 20-də heç bir hərbi əməliyyat keçirilmədən azad edildi.

Ş.Seyidzadənin sözlərinə görə, İkinci Dünya müharibəsindən sonra, XX əsrin ikinci yarısı - XXI əsrin əvvəlinə nəzər saldıqda görürük ki, Azərbaycan tarixində dünyada nadir yaşanan halı görürük. Qeyd edilən dövrdə baş verən müxtəlif münaqişələr zamanı heç vaxt belə hal yaşanmayıb ki, təcavüzkar tərəf işğal etdiyi torpaqları heç bir güllə atmadan təhvil versin. Bu, alqışlanası hadisədir. Çünki həm torpaqlarımız işğaldan azad olunur, həm də bu proses itkisiz həyata keçirilir. Ümumiyyətlə, Azərbaycan üçün böyük əhəmiyyət kəsb edən bölgələrdən biri olan Ağdamın ölkə rəhbərliyinin qətiyyəti sayəsində bu formada azad olunması həqiqətən də qürurvericidir.

“Təəssüf ki, erməni silahlı qüvvələri 30 il ərzində işğal altında saxladıqları ərazilərdə infrastrukturu dağıdıb və resursları talan ediblər. Ona görə də həmin ərazilərdə ciddi yenidənqurma işlərinə ehtiyac var. Amma əminik ki, dövlətimizin başçısı çıxışlarında qeyd etdiyi kimi, işğaldan azad edilən bütün bölgələr yenidən dirçələcək, həyat və infrastruktur yenidən qurulacaq”, - deyə deputat əminliyini ifadə edib.