Bakı, 4 may, AZƏRTAC

Ermənistanda erkən seçki marafonunda zaman daraldıqca daxili siyasi durum gərginləşməkdədir. Əslində, seçki dövründə siyasi həssaslıq və müəyyən çalxanmalar hər bir cəmiyyət üçün qəbulediləndir. Ermənistanın vəziyyətini təhlil etdikdə bu gərginliyin daha təhlükəli notlardan xəbər verdiyi gün kimi aydın olur.

Bunu AZƏRTAC-a açıqlamasında Milli Məclisin deputatı Bəhruz Məhərrəmov deyib.

Deputat diqqətə çatdırıb ki, Prezident İlham Əliyev son 15 ildə Ermənistana dəfələrlə xəbərdarlıq edərək işğala könüllü son qoymağa, bölgədə sülh və sabitlik şəraitində əməkdaşlığa çağırmış, əks halda, bu ölkəni dalana döndərəcəyini bəyan etmişdi. İstər cinayətkar Köçəryan-Sarkisyan cütlüyü, istərsə də Paşinyan hakimiyyəti bu çağırışı doğru qiymətləndirməmiş, təcavüzkar niyyətlərini gücləndirmiş, hətta bu ideyalarla erməni cəmiyyətini də zəhərləyə bilmişdilər. Nəticə etibarilə 44 günlük müharibə yalnız bölgədə işğal faktına son qoymadı, həm də haylara Ermənistanın dalan dövlətinə çevrildiyini və əslində, ölkənin uçurumda olduğunu praktiki olaraq göstərdi.

B.Məhərrəmovun sözlərinə görə, bu gün ermənilərin faciəsi ondadır ki, həm cəmiyyət, həm iqtidar, həm də müxalifət olaraq çirkabın içindədirlər. Vəziyyət o həddə çatıb ki, dəhşətli məğlubiyyətin hərbi-siyasi nəticələrinin gücləndiyi bir şəraitdə yenə də xalq olaraq zərərli ideologiyadan əl çəkmir, müəyyən kütlələr heç bir siyasi, iqtisadi və hərbi əsası olmayan revanş çağırışlarına müsbət yanaşmaqdadır. Halbuki Azərbaycan tərəfindən hərbi potensialı tam məhv edilmiş Ermənistana təcavüzkar müharibə yox, hətta minimum müdafiə qabiliyyətinə malik ordunu formalaşdırması üçün onilliklər lazımdır.

Deputat bildirib ki, bu işdə hayların köməyinə himayədarları gəlsə belə, cəbhədən qaçan fərarilərdən və orduya yararsız fərdlərdən ibarət erməni gəncliyinin hazırkı məğlub ruhu ilə yaxın zamanlarda ordu quruculuğu prosesinin başlanması mümkünsüzdür. Toplumun vəziyyətindən fərqli bir taleyə malik olmayan mövcud hakimiyyət isə “Qarabağ Ermənistandır və nöqtə”, yaxud “Yeni ərazilər üçün yeni” şüarlarının ardından hərbi-siyasi cəhətdən rüsvayçı məğlubiyyətə uğramaqla fiaskonun nəticələrini yaşamaqdadır.

“Gallup International Аssociation” təşkilatının keçirdiyi sorğuya əsasən, 3 il əvvəl 73 faizlə hakimiyyətə gələn Soros komandası bu gün bütün gücünü səfərbər edərək cəmi 31 faizlik nəticə göstərə bilir. Ölkədə hakimiyyəti məğlubiyyətdə ittiham edən və əsas güc olan Sarkisyan-Köçəryan cütlüyünün komandası isə özü bu gün erməni cəmiyyətində siyasi gücdən daha çox cinayətkar birlik kimi tanınır. Eyni zamanda, Ermənistanın məğlubiyyətinin başlanğıcı olan Aprel döyüşlərindəki rüsvayçılıq da bu cütlüyün adı ilə bağlıdır. Özləri məğlub olmalarına baxmayaraq, Paşinyanın komandası indiki məqamda belə bu cinayətkar cütlüyü Aprel döyüşlərinə görə ittiham etməkdədir. Hətta bu günlərdə deputatlara Aprel döyüşləri ilə bağlı məxfi sənədlərə çıxış imkanı verildi. Paşinyan bununla da, əslində, Köçəryan-Sarkisyan cütlüyünün əməllərinin seçki ərəfəsində daha geniş auditoriyaya çatmasında maraqlıdır.

“Nisbətən orta mövqe tutmuş Ermənistan Prezidentinin özünün də durumu ürək açan deyil”, - deyən B.Məhərrəmov diqqətə çatdırıb ki, artıq Ermənistanın baş prokurorluğu Armen Sarkisyana qarşı cinayət işi açıb. Cəmiyyətdə digər güc mərkəzi olan ordunun qalıqları faktiki olaraq nəzarətdən çıxıb, məhkəmə sistemində isə Paşinyan tərəfdarları və əleyhdarları arasında ciddi qarşıdurma yaşanmaqdadır.

“Bütün bunların fonunda Ermənistandan revanş sədalarının gəlməsi, sözün əsl mənasında, heyrət doğurur. Gündəlik yaşayışını belə təmin edə bilməyən sadə insanlar, fərari ordu, qərəzli məhkəmə, cinayətkar müxalifət və məğlub iqtidardan ibarət parçalanmış hay cəmiyyətin bu təcavüzkar ritorikası yalnız bir nəticəyə gəlməyə əsas verir – revanş sədaları və təxribatlar erməni toplumunun son nəfəsdə affekt, yaxud anlaşılmaz vəziyyətdə sərsəmləməsindən başqa bir şey deyil”, - söyləyən deputat vurğulayıb ki, Prezident, Müzəffər Ali Baş Komandan İlham Əliyev tərəfindən milli həmrəyliyin təmin olunduğu, güclü orduya və ən müasir müdafiə sənayesinə malik Azərbaycan isə əksinə, regionda diktəedici mövqeyini möhkəmləndirməkdədir. Rəsmi Bakının hədəfləri böyükdür - işğaldan azad olunmuş ərazilərimizdə ən müasir tələblərə uyğun formada quruculuq bərpa işləri həyata keçirmək, Zəngəzur dəhlizinin açılması ilə yeni əməkdaşlıq platforması qurub ölkənin tranzit və hab rolunu gücləndirmək.

“Ermənistandan fərqli olaraq, rəsmi Bakı Yerevan özü də daxil olmaqla, bütün qonşuları ilə əməkdaşlıqda və mehriban qonşuluq siyasətində maraqlıdır. Mövcudluğunu qorumaq üçün çırpınan hay dövlətindən fərqli olaraq, zaman Azərbaycanın xeyrinə işləyir. İndi, hələlik seçim Ermənistanındır, az da olsa vaxtı var. Daxili siyasi və sosial problemlər içində boğulan Ermənistan ona verilən bu müvəqqəti imkandan yararlanaraq 10 noyabr Bəyanatının şərtlərini tam yerinə yetirməyə tələsməlidir, əks halda, rəsmi Bakı ermənilər də daxil olmaqla, region xalqlarının rifahı, bölgədə sülh, sabitlik və tərəqqi naminə Yerevanı lazımi addımlar atmağa vadar etmək məcburiyyətində qalacaq.