SİYASƏT
Deputat: Prezident İlham Əliyevin Ağdama səfəri bütün Qarabağda yüksək texnologiyaların tətbiqinə start verilməsi baxımından xüsusi əhəmiyyət kəsb edir
Bakı, 31 may, AZƏRTAC
Azərbaycan Prezidenti İlham Əliyevin işğaldan azad olunmuş rayonlara səfərləri və ən əsası, bu səfərlər zamanı həmin ərazilərdə aparılan quruculuq işləri çərçivəsində inşa edilən yeni strateji obyekt və müəssisələrin təməlini qoyması həm siyasi, həm iqtisadi, həm də mənəvi cəhətdən mühüm əhəmiyyət kəsb edir. Bu, bir daha göstərir ki, Azərbaycan dövləti işğaldan azad edilmiş ərazilərin bərpası və yenidən qurulması ilə bağlı bütün ideya və planlarını sürətlə reallaşdırmağa qadirdir.
Bunu AZƏRTAC-a açıqlamasında Milli Məclisin deputatı Anar Məmmədov deyib.
Deputat vurğulayıb ki, Prezident, Müzəffər Ali Baş Komandan İlham Əliyev qətiyyətli və yenilməz Sərkərdə kimi rəşadətli Ordumuzun gücünə və xalq-iqtidar birliyinə söykənərək düşməni ildırım sürəti ilə necə məğlub etdisə, o cür yenilməz ruhla da işğaldan azad edilmiş ərazilərdə sistemli quruculuq işlərinin, yüksək texnologiyaların tətbiqinə start verib. İndi az qala bütün dünya həmin ərazilərdə bərpa-quruculuq işlərinin birinci mərhələsinin necə geniş vüsət almasına şahidlik edir.
“Hazırda Azərbaycan dövləti işğaldan azad edilmiş ərazilərdə intensiv şəkildə bərpa-quruculuq işləri həyata keçirməkdədir. Bu işlər çərçivəsində inşasına başlanılan mühüm strateji obyektlərin, müəssisələrin təməlinin Prezident İlham Əliyev tərəfindən şəxsən qoyulması isə görülən işlərin xüsusi diqqət mərkəzində saxlandığından xəbər verir. Bu baxımdan, Prezident İlham Əliyevin mayın 28-də Ağdam şəhərinə səfəri bütün Qarabağda yüksək texnologiyaların tətbiqinə start verilməsi baxımından böyük maraq doğurur və xüsusi əhəmiyyət kəsb edir”, - deyən A.Məmmədov vurğulayıb ki, səfər çərçivəsində Bərdə-Ağdam avtomobil yolunun təməlinin qoyulması, eyni zamanda, gələcəkdə Bərdə-Ağdam dəmir yolunun və dəmir yolu vağzalının tikintisinin nəzərdə tutulması Qarabağda müasir tələblərə cavab verən yol infrastrukturunun yaradılacağından xəbər verir. Bu layihələr, həmçinin işğaldan azad edilmiş rayon və kəndlərin sosial-iqtisadi inkişafında çox mühüm rol oynayacaq. Bununla Azərbaycan həm də quruculuq ənənələrinə, sülhə və əmin-amanlığa sadiqliyini nümayiş etdirir - özü də qonşu Ermənistanda siyasi qüvvələrin qarşıdurmasının sərtləşdiyi bu zamanda.
Deputatın sözlərinə görə, dövlətimizin başçısının işğaldan azad edilən bütün şəhərlərin baş planlarının hazırlandığını bildirməsi yaxın gələcəkdə bu ərazilərdə ciddi şəhərsalma fəaliyyətinə start veriləcəyinin və yerli yol-nəqliyyat infrastrukturunun qurulacağının anonsu kimi qiymətləndirilə bilər. “Prezident İlham Əliyev, həmçinin bərpa olunacaq ərazilərdə müasir iqtisadi və texnoloji innovasiyaların tətbiqi barədə fikirlərini bölüşdü. Bu isə dövlətimizin başçısı tərəfindən xalqımızın Qarabağın “ağıllı region” kimi inkişafı ilə bağlı istəklərinə cavab verməsi deməkdir. Bu istiqamətdə işğaldan azad olunan ərazilərdə ekoloji cəhətdən təmiz, bərpaolunan enerji növlərinin yaradılması üçün də geniş imkanlar mövcuddur. Dövlət başçısı bəyan etdi ki, bu torpaqlar “yaşıl enerji” zonası olacaq”, - deyən deputat vurğulayıb ki, bu yolla ölkəmiz daha geniş aspektdən alternativ enerjinin tətbiqini reallaşdırmış olacaq. Ümumilikdə isə layihənin spektri çox geniş olmaqla yaşayış, istehsal, sosial xidmətlər, “ağıllı kənd təsərrüfatı” və alternativ enerji kimi bir sıra zəruri sahələri əhatə edir. Həmçinin şəhərin içində 125 hektarlıq böyük bir meşə zolağı və süni gölün yaradılması, kanal və körpülərin salınması gələcəkdə bütün Qarabağ bölgəsinin “yaşıl enerji” zonası olacağından xəbər verir.
“Artıq Qarabağ bölgəsində infrastrukturun bərpasına başlanıb. Tezliklə həmin ərazilərdə digər quruculuq-abadlıq işləri və sosial-iqtisadi layihələr də icra ediləcək. Bunun üçün indidən zəruri infrastruktur qurulur ki, bərpa prosesində heç bir problem yaranmasın. İnfrastruktur layihələrinin sürətlə həyata keçirilməsi isə dövlət başçısının bu sahədə işlərin tezliklə başa çatdırılması üçün verdiyi tapşırıqların vaxtında yerinə yetiriləcəyindən xəbər verir”, - deyə Anar Məmmədov fikirlərini yekunlaşdırıb.