SİYASƏT
Deputat: Şuşa indi azad nəfəs alır
Bakı, 28 yanvar, AZƏRTAC
Azərbaycan Respublikası Prezidenti İlham Əliyevin Şuşa rayonunda xüsusi nümayəndəsinin təyin edilməsi haqqında imzaladığı Sərəncam Şuşaya olan diqqətin bariz nümunəsidir. Dövlətimizin başçısının bu Sərəncamı həm də Şuşada bundan sonra başlayacaq böyük quruculuq işlərinin növbəti müjdəsidir.
Bunu AZƏRTAC-a açıqlamasında Milli Məclisin deputatı, Demokratik Maarifçilik Partiyasının sədri Elşən Musayev deyib.
Şuşanın tariximiz, mədəni irsimiz olduğunu söyləyən partiya sədri bildirib: “Şuşa Qarabağın döyünən ürəyidir. Şuşa bizə o qədər doğmadır ki, onu həm də rəmz kimi qəbul etmişik. Ona görə də Şuşanın işğaldan azad olunması və həmin xəbərin Müzəffər Ali Baş Komandan tərəfindən elan edilməsi hər bir Azərbaycan vətəndaşı üçün xüsusi əhəmiyyət daşıyır”.
Deputatın sözlərinə görə, Şuşanın işğaldan azad edilməsi ermənilərin ürəyinə qəlbinə dağ çəkib. Naqis düşmən məhz Şuşa alınandan sonra anladı ki, başqa yolu qalmayıb və kapitulyasiya aktına qol çəkməlidir. Uzun illərdir mənəm-mənəmlik edən düşmən diz çökdü və məğlubiyyətini etiraf etdi. Üstəlik, həmin məğlubiyyətdən doğan rəzil durum bu gün də erməni seqmentinin bütün sahələrində hiss olunur. Hətta hökumət üzvlərinin açıqlamalarında da bunu görürük. Bir neçə gün əvvəl Ermənistanın xarici işlər naziri Ara Ayvazyan belə bir sərsəm açıqlama verib ki, guya Şuşa ermənilərin mədəniyyət mərkəzidir. Təsəvvür edirsiniz? Görün, bunlar nə qədər bəsit insanlardır. O zaman bu bədbəxt diplomata sual vermək lazımdır ki, əgər Şuşa mədəniyyət mərkəziniz idisə, 30 il boyu niyə onu o günə, o hala salmışdınız? Niyə daş üstdə daş qoymamışdınız? Niyə bütün mədəni irsi, mədəni mərkəzləri, tarixi abidələri güllə altına vermişdiniz? Bu namərdlərdə utanma hissi o qədər tükənib ki, artıq ağıllarına da gələni yox, məhz ağızlarına gələni danışırlar. Niyə? Çünki məntiq yoxdur, qiymətləndirmə itib, bir sözlə, reallıqdan uzaqdırlar. Ermənilər hər şeyi bax, bu cür saxtalaşdırmağa çalışır. Tarix boyunca da saxtalaşdırıb.
Elşən Musayev bildirib ki, Şuşa qədim Azərbaycan şəhəridir, Pənahəli xanın əsəridir, bizlərin dədə-baba məkanıdır. Şuşa 30 ilə yaxın işğal altında qaldı, dağıdıldı, söküldü, istismar olundu. İndi isə Şuşa artıq xilas olub. Şuşa indi azad nəfəs alır. Şuşa bizimdir və biz onu dirçəldəcəyik.
“Şuşanı Azərbaycanın igid əsgərləri əlbəyaxa döyüşlə, dünya tarixinə qızıl hərflərlə yazılacaq qəhrəmanlıqla geri qaytarıblar. Şuşa bundan sonra əbədi Azərbaycanın olacaq. Şuşanı bundan sonra göz bəbəyimiz kimi qoruyacağıq. Şuşaya artıq yol çəkilir, mədəniyyət beşiyimizdə dövlət idarələrinin şöbələri təsis olunur, infrastruktur formalaşır. Şuşaya səfər edən Azərbaycanın Müzəffər Ali Baş Komandanı gecəni Şuşada qalır, sabahını orada açır və dünyaya mesajlarını bu müqəddəs torpaqdan verir”, - deyə o qeyd edib.