Bakı, 30 sentyabr, AZƏRTAC

Qırx dörd günlük Vətən müharibəsi dünya miqyasında ən qısa zamanda məqsədə nail olunan müharibədir. Belə ki, bir çox ölkələr arasında illərlə müharibələr baş versə də çox zaman ya məqsədə nail olunmur, ya da istənilən nəticə əldə edilmir. Ali Baş Komandan, Prezident İlham Əliyevin uzaqgörənliyi, siyasi iradəsi sayəsində zamanında başladılan müharibə qısa müddət ərzində Zəfərimizlə yekunlaşdı. Haqq savaşımızdan qalib ayrılmağımızda üç amil mühüm rol oynadı.

Milli Məclisin deputatı Azər Badamov AZƏRTAC-a açıqlamasında Qələbəni şərtləndirən birinci amil kimi ölkənin iqtisadi asılılığının olmamasını göstərib. O deyib: “Prezident İlham Əliyevin apardığı düşünülmüş iqtisadi siyasət Azərbaycanı yardım alan ölkədən kömək edən ölkəyə çevirib. Dövlətimizin başçısının Azərbaycanın bütün regionlarının inkişafına eyni dərəcədə diqqət ayırması ölkəmizin hərtərəfli tərəqqisinə geniş imkanlar açıb. Əhalinin sosial rifahının yaxşılaşdırılması istiqamətində geniş addımlar atılıb, böyük valyuta ehtiyatları formalaşdırılıb. İqtisadi gücümüzün yetərincə olması isə ordumuzun müasirləşdirilməsinə imkan verdi.

Möhtəşəm Zəfərin qazanılmasında rol oynayan ikinci amil ölkəmizdə vətənpərvərlik ruhunun yüksək olmasıdır. Dövlətimizin başçısı ictimaiyyətin nümayəndələri ilə görüşlərində gənclərin vətənpərvərlik ruhunda tərbiyə edilməsini ön plana çəkir və torpaqlarımızın işğalı ilə heç vaxt barışmayacağımızı və tezliklə Şuşada üçrəngli bayrağımızı dalğalandıracağımızı qeyd edirdi. 1990-cı illərin əvvəllərində dünyaya gələn və erməni vəhşiliklərini görə-görə, öyrənə-öyrənə böyüyən gənc nəsildə Vətənə sevgi, düşmənə nifrət hissləri yüksək səviyyədə formalaşdı. Hər kəs tezliklə torpaqlarımızın azad ediləcəyi və erməni işğalına son qoyulacağı notlarına kökləndi. Ermənilərin hər bir təxribatına qarşılıq olaraq xalqımız ayaqlandı və Ali Baş Komandana səfərbər olmaq istədiyini bildirdi. Bunun kulminasiya nöqtəsi isə Tovuz hadisələri oldu. 2020-ci ilin iyul ayının ortalarında Ermənistan silahlı qüvvələrinin bölmələri Ermənistan-Azərbaycan dövlət sərhədinin Tovuz rayonu istiqamətində atəşkəs rejimini kobud şəkildə pozaraq mövqelərimizi ələ keçirmək məqsədilə hücuma keçməyə cəhd göstərdilər. Dövlət sərhədində düşmənin törətdiyi təxribatın qarşısının alınması ilə bağlı görülən təxirəsalınmaz tədbirlər nəticəsində hücumun qarşısı alındı. Ordumuz düşmənə layiqli cavab verərək və xeyli canlı qüvvəsini məhv edərək onları geri oturtdu. Avqustun sonlarında isə düşmənin Goranboy rayonu istiqamətində göndərdiyi diversiya-kəşfiyyat qrupu Azərbaycan Ordusu tərəfindən zərərsizləşdirildi, düşmən itki verərək geri çəkildi, diversiya qrupunun komandiri isə əsir götürüldü. Ermənilərin təxribatları zamanı vətəndaşlar hərbi komissarlıqlara axışır və müharibəyə könüllü getmək üçün qeydiyyatdan keçirdilər. Hər kəs torpaqlarımızı işğaldan azad etmək üçün ön cəbhəyə can atırdı. Ötən ilin payızında isə bütün dünya xalqımızın savaş ruhuna, döyüşkənliyinə bir daha şahid oldu. Ali Baş Komandanın bir çağırışına nəinki ölkə əhalisi səfərbər oldu, hətta dünyanın müxtəlif ölkələrində yaşayan soydaşlarımız da Vətənin müdafiəsinə hazır olduqlarını bildirdilər. Xalqımız əsl milli birlik və həmrəylik nümayiş etdirdi. Bu, xalqımızda formalaşmış yüksək vətənpərvərlik ruhunun göstəricisi idi”.

Deputat Qələbənin qazanılmasına rəvac verən üçüncü amilin isə ordumuzun yüksək döyüş hazırlığı olduğunu deyib. O bildirib ki, Prezident İlham Əliyev bütün beynəlxalq tədbirlərdə torpaqlarımızın işğal altında qalması ilə heç vaxt barışmayacağımızı dəfələrlə qeyd edərək, münaqişənin danışıqlar yolu ilə həllini tapmayacağı təqdirdə, ərazi bütövlüyümüzü müharibə yolu ilə bərpa edəcəyimizi bildirirdi. Bununla yanaşı, ordunun maddi texniki bazasının müasirləşməsi, yeni hərbi silahların alınması, hərbi qulluqçuların peşəkarlığının artırılması istiqamətində tədbirlər görülürdü. Ordumuz və xalqımız müharibəyə tam hazır idi və Ali Baş Komandanın əmrini gözləyirdi. Nəhayət həmin an yetişdi və rəşadətli Azərbaycan Ordusu savaş meydanında öz sözünü deməyə başladı. Müharibə dövründə bütün xalq siyasi baxışlarından asılı olmayaraq, monolit birliyə çevrildi və hamı eyni nöqtəyə vurdu. Arxa cəbhədəkilər “hər şey cəbhə üçün” amalı ilə çalışdılar, Ordumuz isə hər gün qarış-qarış irəlilədi. 44 günlük müharibə dövründə ölkəmizə xarici təzyiqlər də artmışdı. Lakin Prezident İlham Əliyevin xarici mətbuata verdiyi müsahibələr Azərbaycanın niyyətini dünyaya çatdırdı. Dünya ictimaiyyəti bir daha əmin oldu ki, Azərbaycan haqq-ədaləti bərpa edir və beynəlxalq səviyyədə tanınmış sərhədləri daxilində öz ərazi bütövlüyünü təmin edir.

“Şanlı ordumuz öz şücaəti və əzmkarlığı ilə ermənilərin öz ordusu ətrafında yaratdığı məğlubedilməzlik mifini və “Azərbaycan xalqı döyüşkən deyil” düşüncələrini darmadağın etdi. Qırx dörd günlük müharibə bir daha sübut etdi ki, hansı xalq döyüşkəndir, hansı fəraridir. Həmin dövrdə ermənilər 10 mindən çox fərarisinin olduğunu etiraf etdiyi halda Azərbaycanda bir nəfər də olsun fərari olmadı. Əli silah tutan hər bir vətəndaş vuruşub düşməni torpaqlarımızdan çıxartmaq və ərazi bütövlüyümüzü bərpa etmək əzmində idi. Bu, belə də oldu. Hərbçilərimizin mübarizliyi, xalqımızın həmrəyliyi noyabrın 10-da ermənilərin dizini yerə qoydu və Paşinyan kapitulyasiya sənədinə imza atmağa məcbur oldu. Üçtərəfli Bəyanatın imzalanmasından sonra hərbi əməliyyatlar dayandırıldı və Kəlbəcər, Laçın və Ağdam güllə atılmadan, şəhid verilmədən azad edildi. Şanlı Ordumuz düşmənin hərbi birləşmələrini elə darmadağın etdi, onlara elə savaş dərsi verdi ki, ermənilərin yenidən güc toplayıb ordu halına gəlməsi üçün hələ neçə onilliklər lazım olacaq. Bu, Azərbaycanın Böyük Qələbəsi idi. Bu qələbəni bizə yaşadan vaxtında və düzgün qərarlar qəbul edən Müzəffər Ali Baş Komandan, rəşadətli ordumuz, xalqımızın milli birliyi və həmrəyliyi oldu. Bir yumruq kimi birləşməyimiz Azərbaycanın həmişə nailiyyətlərə imza atmasına və üzləşdiyi çətinliklərdən qalib çıxmasına yol açacaq”, - deyə A.Badamov fikirlərini yekunlaşdırıb.