Bakı, 21 dekabr, AZƏRTAC

Ermənistan 30 ilə yaxın müddət ərzində işğal altında saxladığı ərazilərimizdə kütləvi ekoloji terror törətməklə yanaşı, yeraltı və yerüstü sərvətləri talayıb, regionun ekoloji tarazlığının pozulmasına ciddi ziyan vurub. Azad olunmuş ərazilərdə bu müddət ərzində qızıl, civə, mis, qurğuşun, sink, kömür və sair daxil olmaqla, 163 faydalı qazıntı yatağı, həmçinin meşə örtüyü, nadir ağaclar Ermənistan tərəfindən qanunsuz istismara məruz qalıb.

Təəssüflər olsun ki, bu gün də Ermənistanın ölkəmizə qarşı ekoloji cinayətləri davam etməkdədir. Təsdiqlənmiş məlumatlara görə, hazırda Rusiya sülhməramlı kontingentinin müvəqqəti yerləşdiyi ərazilərimizdə, o cümlədən “Qızılbulaq” qızıl və “Dəmirli” mis-molibden faydalı qazıntı yataqlarında aparılan qeyri-qanuni qazıntı və emal işləri nəticəsində təbii sərvətlərin talan edilməsi davam edir.

Bu fikirləri AZƏRTAC-a açıqlamasında Milli Məclisin deputatı Anar Məmmədov söyləyib.

Ermənilərin ekologiyaya və təbiətə qarşı törətdiyi bu ağır cinayətlərin ətraf mühit sahəsində müvafiq konvensiyaların kobud surətdə pozulması olduğunu bildirən A.Məmmədov deyib: “Azərbaycan Ermənistanın ekoloji terror siyasəti ilə bağlı dəfələrlə müvafiq beynəlxalq təşkilatlara müraciətlər edib. Hətta aidiyyəti qurumların iştirakı ilə aparılan danışıqlara baxmayaraq dekabrın 10-da sözügedən ərazilərə Azərbaycan nümayəndələrinin səfərinə maneçilik törədilmiş, sülhməramlıların hərəkətsizliyi ucbatından monitorinq baş tutmamış və nümayəndə heyəti hər iki istiqamətdə təxribatla üzləşib. Məhz bu səbəbdən də Azərbaycan vətəndaş cəmiyyətinin nümayəndələri və ekologiya fəalları Laçın-Xankəndi yolunda etiraz aksiyasına başlayıblar”.

Deputatın sözlərinə görə, dinc formada keçirilən aksiyanın iştirakçıları qanunsuz istismarın qarşısının alınması üçün Azərbaycan mütəxəssislərinin ərazidə monitorinq keçirmələrinə şərait yaradılmasını tələb edirlər. Haqlı olaraq xalqımız təbii sərvətlərimizin talan edilməsinə və ətraf mühitin çirkləndirilməsinə göz yuma bilməz. Ona görə də etirazçılar Ermənistan və onun havadarlarının Laçın-Xankəndi yolundan hərbi məqsədlər, minaların və talan olunan təbii sərvətlərin daşınması məqsədilə istifadə edilməsinin qarşısını almağa çalışırlar. Ermənistan tərəfi isə əsassız iddialar əks etdirən bəyanatlar səsləndirməklə beynəlxalq ictimaiyyətin diqqətini problemin mahiyyətindən yayındırmağa çalışır, hadisələri siyasi və humanitar böhran kimi təqdim edirlər. Lakin səsləndirilən bu fikirlər tamamilə əsassızdır.

“Aksiyanın ərazidə yaşayan dinc ermənilərə heç bir aidiyyəti yoxdur, ekofəallar dinc erməni əhalisinə məxsus mülki avtomobillərin, təcili yardım maşınlarının həmin yoldan keçidinə şərait yaradırlar. Azərbaycanın ekologiya fəallarının, vətəndaş cəmiyyəti təmsilçilərinin keçirdiyi etiraz aksiyası mülki ermənilərə qarşı deyil, Rusiya sülhməramlılarının yerləşdiyi Azərbaycan ərazilərində həyata keçirilən qanunsuz iqtisadi fəaliyyətlə, respublikamızın təbii sərvətlərinin talanması və ekologiyaya dəyən zərərlə bağlıdır. Bu, Azərbaycan ictimaiyyətinin tam haqlı narazılığıdır və hər kəs bundan nəticə çıxarmalıdır. Belə olan halda isə beynəlxalq təşkilatlar, ayrı-ayrı ölkələr, hətta ətraf mühitin qorunması üzrə ixtisaslaşmış QHT-lər də bu məsələyə münasibət bildirməlidirlər. Çünki bu, yalnız Azərbaycanın deyil, bölgənin və bütün dünyanın ekoloji təhlükəsizliyinə ciddi zərbədir”, - deyə Anar Məmmədov vurğulayıb.