SİYASƏT


Deputat: “Xarıbülbül” musiqi festivalı 44 günlük Vətən müharibəsində qazanılmış Zəfərin davamıdır

Bakı, 13 may, AZƏRTAC

Azərbaycan xalqı üçün daha bir tarixi hadisə yaşandı. Prezident İlham Əliyevin müvafiq qərarı ilə Heydər Əliyev Fondu milli qürur, milli mənlik, mədəniyyət, incəsənət və tarix beşiyimiz olan Şuşada möhtəşəm “Xarıbülbül” musiqi festivalını təşkil etdi. Bu festival sonuncu dəfə 1989-1990-cı illərdə keçirilmişdi. Ermənistanın Azərbaycana təcavüzündən sonra bu mədəniyyət tədbiri elə tarix olaraq yaddaşlarda yaşamağa başlamışdı, fotolarda, videokadrlarda qalmışdı. Lakin 30 il sonra Müzəffər Ali Baş Komandan İlham Əliyevin və qalib Ordumuzun sayəsində bu mədəniyyət tədbiri də bərpa olundu. Bu mənada, Şuşada Cıdır düzündə keçirilən “Xarıbülbül” musiqi festivalı milli birlik, qürur, zəfər, ləyaqət bayramına çevrildi.

AZƏRTAC xəbər verir ki, bunu Yeni Azərbaycan Partiyası Nizami rayon təşkilatının sədri, Milli Məclisin deputatı Sədaqət Vəliyeva deyib.

Sədaqət Vəliyeva bildirib ki, tarixi siması qaytarılan, yenidən bərpa olunan Qarabağın döyünən ürəyi və ölkəmizin mədəniyyət paytaxtı olan Şuşada belə bir tədbirin keçirilməsi, xüsusilə də ilk festivalın şəhidlərimizə həsr olunması böyük əhəmiyyətə malikdir: “Həm də “Xarıbülbül” musiqi festivalını 44 günlük Vətən müharibəsində qazanılmış Zəfərin davamı kimi də qiymətləndirə bilərik. Necə ki, 44 gün ərzində torpaqlarımızın işğaldan azad olunması üçün bütün xalqların nümayəndələri birgə savaşırdısa, elə Şuşada, Cıdır düzündə də həmin xalqların nümayəndələri Qələbəni bir daha birgə qeyd edir, milli birlik nümayiş etdirirdi. Bununla xalqımız Şuşanı tankla, topla, ağır silahlarla silahlanmış düşməndən əliyalın şəkildə azad edən hərbçilərimizin, şəhidlərimizin, qazilərimizin əməlini yüksək dəyərləndirir, qürurunu yüksək tutur. Əlbəttə ki, bu tədbiri bütün dünya da canlı izləyirdi. Dostlarımız da, düşmənlərimiz də baxırdı və hər kəs bir daha Azərbaycandakı milli birliyi, milli qüruru, milli ləyaqəti görürdü. Vaxt var idi ki, Paşinyan və işğalçı dövlətin başqa nümayəndələri Cıdır düzündə yallı oynayır, azərbaycanlılara gözdağı verirdi. Lakin tarixi ədalət bərpa olundu və Prezident İlham Əliyevin dediyi kimi artıq Azərbaycan mədəniyyəti, mədəniyyətimizin görkəmli nümayəndələri Şuşaya qayıdıblar və bu qayıdış reallıqdır, bu reallıqla hər kəs hesablaşmalıdır”.

“Bu ildən başlayaq hər il Şuşada “Xarıbülbül” musiqi festivalı keçiriləcək, eləcə də gələn il Şuşanın 270 illik yubileyi qeyd olunacaq”, – deyən Sədaqət Vəliyeva əlavə edib ki, vaxtilə Şuşada formalaşmış mədəniyyət, incəsənət, yaşayış da bərpa olunacaq: “Bütün bunlar bir daha nümayiş etdirir ki, Prezident İlham Əliyev ulu öndər Heydər Əliyevin vəsiyyətini yerinə yetirərək azadlığına qovuşan, 270 illik tarixi olan Şuşa şəhərini yenidən bərpa edir, dirçəldir, əvvəlki şöhrətinin qaytarılması üçün yeni dövr başladır. Bu dövr milli qürur, milli ləyaqət və inkişaf, dirçəliş dövrüdür”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.