CƏMİYYƏT
Dini Qurumlarla İş üzrə Dövlət Komitəsi 2016-cı ildəki fəaliyyəti ilə bağlı hesabat verib
Bakı, 27 dekabr, AZƏRTAC
Dekabrın 27-də Dini Qurumlarla İş üzrə Dövlət Komitəsində (DQİDK) ilin yekunlarına dair mətbuat konfransı keçirilib.
AZƏRTAC xəbər verir ki, mətbuat konfransında komitənin sədri Mübariz Qurbanlı ölkəmizdəki sabit dini durumdan danışıb. Bildirib ki, ulu öndər Heydər Əliyevin müasir Azərbaycanda dövlət-din münasibətlərinin formalaşmasında həyata keçirdiyi din siyasətinin əsasında da bu dayanır. Ümummilli Liderimizin hakimiyyətə qayıdışından sonra ölkədə dini fəaliyyət sahəsində sabitliyə nail olunması, konfessiyalar arasında dözümlülük mühitinin qorunub saxlanılması və möhkəmləndirilməsi istiqamətində gördüyü böyük işlər dini etiqad azadlığına geniş imkanlar açıb və nəticədə dini icmaların normal fəaliyyəti üçün hüquqi-mənəvi şərait yaradılıb. Ümumiyyətlə, Ulu Öndərin dövlət-din münasibətləri sahəsində irəli sürdüyü ideyaların, müdrik tövsiyələrin bu günün reallıqları kontekstində oynadığı müsbət rolu daha aydın görürük.
Komitə sədri Prezident İlham Əliyevin uzaqgörən siyasəti nəticəsində 2016-cı ilin “Multikulturalizm ili” elan edildiyini və dövlət başçısının təsdiq etdiyi müvafiq “Tədbirlər Planı”na uyğun olaraq, ölkədə və beynəlxalq səviyyədə ardıcıl iş aparıldığını jurnalistlərin diqqətinə çatdırıb. Mübariz Qurbanlı çıxışında ölkəmizdə multikultural və tolerantlıq ənənələrinin inkişafı və beynəlxalq səviyyədə təbliği və təşviqində Heydər Əliyev Fondunun müstəsna rolunun olduğunu diqqətə çatdırıb. O bildirib ki, Heydər Əliyev Fondunun fəaliyyəti ölkəmizdə milli-mənəvi dəyərlərə və mədəni irsə qayğının əyani təzahürüdür.
Mübariz Qurbanlı Dini Qurumlarla İş üzrə Dövlət Komitəsinin cari ildə gördüyü işlər barədə danışaraq bildirib ki, cari ildə 101 İslam, 4 qeyri-İslam olmaqla, dövlət qeydiyyatına alınmış dini icmaların ümumi sayı 749-a çatıb. İndiyədək dövlət qeydiyyatından keçmiş dini qurumlardan 721-i İslam, 28-i qeyri-İslam təmayüllüdür. Nəzarət markası ilə markalanmış dini təyinatlı ədəbiyyatın, audio və videomaterialların, mal və məmulatların, dini məzmunlu başqa məlumat materiallarının satışı üzrə ixtisaslaşdırılmış satış məntəqələrinin yaradılması ilə əlaqədar razılığın verilməsi ilə bağlı 33 müraciət daxil olub. Bunlardan 24 sənəd qanunvericiliyə uyğun tərtib edilmədiyinə görə geri qaytarılıb. Ümumilikdə, 2016-cı ildə 9 ixtisaslaşdırılmış satış məntəqəsinə razılıq verilib.
Diqqətə çatdırılıb ki, il ərzində komitədə 1451 adda dini məzmunlu ədəbiyyata baxılaraq dini dözümsüzlüyü, ayrı-seçkiliyi və radikallığı təbliğ edən 55 adda kitabın ölkəyə idxalına razılıq verilməyib. Ölkədə çap olunmaq məqsədilə 240 adda dini ədəbiyyat ekspertizadan keçirilib, onlardan 3-də dini dözümsüzlüyü təbliğ edən fikirlər aşkarlandığından çapı məqsədəuyğun sayılmayıb.
Dini təyinatlı ədəbiyyat, audio və videomateriallar, mal və məmulatlar və dini məzmunlu başqa məlumat materiallarının nəzarət markası ilə markalanması işinin təşkili istiqamətində tədbirlər davam etdirilib. Belə ki, 379 adda dini təyinatlı ədəbiyyata yapışdırılması üçün nəzarət markaları verilib. Hüquq-mühafizə orqanlarından dinşünaslıq ekspertizasına göndərilmiş 689 adda dini ədəbiyyata baxılaraq, onlardan 330 adda dini ədəbiyyatın zərərli olduğu, yaxud müvafiq razılıq alınmadan idxal və istehsal edildiyi müəyyənləşib.
Komitə tərəfindən milli-mənəvi dəyərlərimizin, o cümlədən ölkəmizdə mövcud olan tolerant və multikultural ənənələrin təbliği, dini radikalizmin fəsadları və s. mövzularda maarifləndirici kitab və broşürlər nəşr olunub.
Hüquq-mühafizə orqanları, o cümlədən Baş Prokurorluq, Daxili İşlər Nazirliyi və Dövlət Təhlükəsizliyi Xidməti ilə birgə dini radikalizmlə mübarizə istiqamətində 50-dən çox tədbir həyata keçirilib. Həmçinin Ədliyyə Nazirliyinin Penitensiar Xidməti ilə birgə cəzaçəkmə müəssisələrində məhkumların vicdan və dini etiqad azadlıqlarına dair maarifləndirmə işinin aparılması məqsədilə 30-dan çox tədbir təşkil olunub. Dövlət Sərhəd Xidməti, Müdafiə Nazirliyi, Gənclər və İdman Nazirliyi, Bakı Şəhər Gənclər və İdman Baş İdarəsi ilə dini radikalizmlə mübarizənin effektivliyinin artırılması məqsədilə 24 tədbir keçirilib.
Vurğulanıb ki, komitə dini maarifləndirmə istiqamətində Qafqaz Müsəlmanları İdarəsi ilə yaxından əməkdaşlıq edib və bu qurumla birgə 11 tədbir həyata keçirib. Ölkədə dini maarifləndirmə və milli-mənəvi dəyərlərin təbliği işini daha da gücləndirmək məqsədilə Azərbaycan Respublikasının Prezidenti İlham Əliyevin 2014-cü il 27 noyabr tarixli Sərəncamına əsasən, 2014-cü ilin dövlət büdcəsində nəzərdə tutulmuş Prezidentin ehtiyat fondundan Dini Qurumalarla İş üzrə Dövlət Komitəsinə 2,5 milyon manat vəsait ayrılıb. Cari ildə Sərəncamda göstərilən istiqamətlər üzrə maarifləndirmə işinin təşkili üçün dini icmaların təqdim etdiyi layihələrin maarifləndirmə və ideoloji baxımdan dəyərləndirilməsi həyata keçirilib və 68 layihənin hazırlanmasına metodiki dəstək verilib. İndiyədək İslam dini icmaları tərəfindən təqdim edilən 136 layihə maliyyələşdirilib.
DQİDK-nın sədri vətəndaşların qəbulu cədvəlinə uyğun olaraq 12 mərkəzi şəhərdə qəbul keçirib. Qəbullarda əsasən dini icmaların dövlət qeydiyyatı, dini icmalara maliyyə yardımının ayrılması, məscid və dini icmaların kitablarla təmin edilməsi, “Quran” kurslarının təşkili, məscidlərin təmiri, dini məzmunlu məhsulların satışı üzrə ixtisaslaşdırılmış məntəqələrin yaradılmasına razılıq verilməsi və s. məsələlərlə bağlı olub.
Komitə sədri mətbuat konfransında jurnalistləri maraqlandıran sualları cavablandırıb. Mübariz Qurbanlı mollaların məscidlərə təyinatı ilə bağlı sualları cavablandırarkən bildirib ki, qeyri-qanuni fəaliyyət göstərən mollalar QMİ tərəfindən təyin olunan və rəsmi fəaliyyət göstərən mollaların işinə kölgə salırlar. Necə ki, reket jurnalistlərin fəaliyyəti peşəkar jurnalistlərin fəaliyyətinə kölgə salır.