Lənkəran, 16 dekabr, Bağır Əliyev, AZƏRTAC

Dekabrın 15-də Kənd Təsərrüfatı Nazirliyinin tabeliyində olan “Aqrar Tədarük və Təchizat” ASC və ABŞ-ın Beynəlxalq İnkişaf Agentliyinin (USAID) birgə təşkilatçılığı ilə “Şəhərdən Kəndə” layihəsi çərçivəsində “Sitrus vadisi” aqroturu təşkil olunub.

Lənkəran rayonunun İstisu qəsəbəsində yerləşən “Citrus Valley” fermer təsərrüfatına təşkil olunmuş aqroturda Azərbaycanda akkreditə olunmuş diplomatik nümayəndəliklərin rəhbər şəxsləri, beynəlxalq təşkilatların, müvafiq dövlət və özəl qurumların nümayəndələri iştirak ediblər.

AZƏRTAC-ın bölgə müxbiri xəbər verir ki, aqroturun məqsədi ölkəmizdə həyata keçirilən ilk aqroekoturizm layihəsi olan “Şəhərdən Kəndə” barədə xarici və yerli qonaqlara ətraflı məlumat vermək, onları yerli fermer təsərrüfatları ilə tanış etmək, eyni zamanda, Lənkəran və bölgələrdə aqroekoturizmin inkişafına dəstək göstərməkdir.

Bu münasibətlə keçirilən tədbirdə çıxış edən "Sitrus vadisi" fermer təsərrüfatının rəhbəri Rəftarə Şükürova qonaqları salamlayaraq bildirib ki, 15 hektar ərazini əhatə edən təsərrüfatda müxtəlif növ sitrus meyvələri yetişdirilir.

Fermer təsərrüfatının bir ildir "Aqrar Tədarük və Təchizat" ASC ilə əməkdaşlıq etdiyini vurğulayan R.Şükürova bu əməkdaşlığın "Kənddən Şəhərə" layihəsi ilə başlandığını söyləyib: “İndi isə "Şəhərdən Kəndə" layihəsi çərçivəsində əməkdaşlıq edirik. İki ay ərzində artıq 150-yə yaxın turist qəbul etmişik. Gələcəkdə bu sayı daha da artırmaq istəyirik”.

Lənkəran Şəhər İcra Hakimiyyətinin başçısının birinci müavini Möhübbət Babayev çıxışında rayonda aqrar sahədə qazanılmış uğurlardan danışıb: “Lənkəran çay, çəltik və sitrus təsərrüfatları ilə hər zaman məşhur olub. Bu tədbirin baş tutduğu İstisu qəsəbəsi rayonda ilk çay fabrikinin tikildiyi qəsəbədir. Azərbaycan Prezidentinin apardığı islahatlar nəticəsində biz Lənkəranda təsərrüfat sahələrini inkişaf etdiririk. Hazırda Lənkəranda min hektardan çox çəltik, 500 hektardan artıq isə çay becərilir”.

Kənd Təsərrüfatı nazirinin müavini Elçin Zeynalov isə çıxışında ölkədə aqrar sahədə islahatların aparıldığını bildirib: “Bu gün Azərbaycanda kiçik və orta sahibkarlığın inkişafına dövlət tərəfindən böyük dəstək göstərilir. Aqrar sahədəki islahatların aparılmasında məqsəd innovativ texnologiyaların tətbiqi ilə bağçılıq təsərrüfatlarında məhsuldarlığın artmasını təmin etməkdir. Ümid edirik ki, həyata keçirdiyimiz layihələr sayəsində aqrar turizmin inkişafı təmin olunacaq. Çalışacağıq ki, bir ildən sonra ölkəmizdə aqroturizmin daha böyük nəticələrini sizinlə bölüşək”.

Tədbirdə çıxış edən ABŞ-ın Beynəlxalq İnkişaf Agentliyinin (USAID) missiya direktoru Cey Sinqx aqroturizmin aqrobiznesin ən maraqlı sahələrindən biri olduğunu söyləyib: “Azərbaycanda kənd təsərrüfatının inkişafına investisiyamız Rəftarə Şükürova kimi fermer və sahibkarların bu sahəyə dəstək göstərməyə hazır olduqları üçün uğurlu alındı. Aqroturizm və qida emalı, qadınlar və gənclər də daxil olmaqla, müxtəlif sahibkarlar qrupunu aqrar sektora cəlb edə biləcək aqrobiznesin maraqlı sahələridir. Ümid edirik ki, onlar daha çox turisti ziyarət etməyə, yerli insanları burada qalmağa və Azərbaycanın gözəl bölgələrində yaşamağa təşviq edə bilərlər. Qeyd edim ki, aqroturizmi inkişaf etdirmək Kənd Təsərrüfatı Nazirliyinin tabeliyində olan ATT ilə USAID arasında tərəfdaşlığın yeni sahələrindən biridir”.

“Aqrar Tədarük və Təchizat” ASC-nin İdarə Heyətinin sədri Leyla Məmmədova isə çıxışında aqroturizm üçün ölkəmizdə hər cür şəraitin olduğunu vurğulayıb: "Məqsədimiz fermerlərin məhsulların satışından asılılığını azaltmaqdır. Bu mənada aqroturizm ən yaxşı vasitələrdən biridir. Dünyanın çox ölkəsində bu praktika var. Biz də yerli və xarici qurumların, eləcə də KİV nümayəndələrinin dəstəyi ilə bu layihəni daha da kütləvi hala gətirmək istəyirik”.

Aqrotur iştirakçıları günün ikinci yarısında Lənkərandakı “Yaşıl çay” MMC-yə məxsus çay plantasiyası ilə tanış olublar. Burada qonaqlara çay bitkisinin becərilmə qaydaları və emal prosesi barədə ətraflı məlumat verilib.

Qeyd edək ki, oxşar tur bu il oktyabrın 12-də “Aqrar Tədarük və Təchizat” ASC, Aqrar Kredit və İnkişaf Agentliyi və Birləşmiş Millətlər Təşkilatının İnkişaf Proqramının birgə təşkilatçılığı ilə Hacıqabul rayonunda yerləşən nar təsərrüfatına da təşkil olunub.

“Şəhərdən Kəndə” layihəsi kiçik və orta fermer təsərrüfatlarını dəstəkləmək məqsədilə həyata keçirilir. Layihə fermer təsərrüfatı sahiblərinə təkcə məhsuldar dövrdə deyil, eləcə də qeyri-məhsuldar dövrdə əlavə gəlir qazanmaq imkanı verir.

Layihə çərçivəsində mütəmadi olaraq hər həftəsonu Azərbaycanın müxtəlif regionlarında yerləşən təsərrüfatlara aqroekoturlar təşkil olunur. İştirakçılara alternativ istirahət imkanı verən turlar həm şəhər sakinləri, həm də xarici ölkə vətəndaşları tərəfindən maraqla qarşılanır. “Şəhərdən Kəndə” aqroturları turistlərin aqrar sahə üzrə bilik və bacarıqlarını artırmalarına, bir və ya bir neçə günlük kənd həyatı yaşamalarına imkan yaradır.

“Aqrar Tədarük və Təchizat” ASC “Şəhərdən Kəndə” layihəsində iştirak etmək istəyən fermerlərlə əməkdaşlığa hər zaman açıqdır. Hazırda qurum yerli fermerlərin müraciətlərini qəbul etməyə davam edir. Layihəyə qoşulmaq istəyən fermerlərə peşəkar mütəxəssislər tərəfindən təlimlər keçiriləcək.

Mart ayına qədər layihədə iştirak edən fermer təsərrüfatlarında isə göstərilən xidmət səviyyəsinin yüksəldilməsi məqsədilə müəyyən təmir işləri aparılacaq.

Layihədə iştirak etmək istəyən fermerlər “Aqrar Tədarük və Təchizat” ASC-nin regional idarələrinə yaxınlaşa, +994504008899 nömrəsinə zəng edə və ya qurumun sosial media hesablarına yaza bilərlər.