SİYASƏT
Dmitri Savelyev: Azərbaycan ötən 25 il ərzində sübut edib ki, etibarlılığın və sabitliyin dayağıdır VİDEO
Moskva, 4 aprel, AZƏRTAC
Aprelin 4-də Rusiya Federasiyası Dövlət Dumasının orqanı olan “Parlamentskaya qazeta” nəşrinin mətbuat mərkəzində Azərbaycan ilə Rusiya arasında diplomatik əlaqələrin qurulmasının 25 illiyinə həsr olunmuş “Rusiya və Azərbaycan: diplomatik əlaqələrin 25 illiyi” mövzusunda “dəyirmi masa” keçirilib.
Tədbirin aparıcısı, Siyasi Tədqiqatlar İnstitutunun direktoru Sergey Markov bildirib ki, bu il Rusiya ilə Azərbaycan arasında diplomatik əlaqələrin qurulmasının 25 illik yubileyi qeyd olunur. Bu dövr ərzində iqtisadiyyat, mədəni-humanitar, təhlükəsizlik sahələrində xeyli birgə layihələr həyata keçirilib. İki ölkənin təhlükəsizlik sahəsində yetərincə sıx əməkdaşlıq etdiyini deyən politoloq Azərbaycanın terrorizmlə mübarizə sahəsində fəaliyyətini yüksək qiymətləndirib. S.Markov Rusiyadakı Azərbaycan diasporunun fəaliyyətindən danışaraq qeyd edib ki, Rusiya azərbaycanlıları Vladimir Putinin prezidentliyə namizədliyini ilk dəstəkləyənlərdən olublar. O, həmçinin Azərbaycanın rusdilli əhalisinin ümummilli lider Heydər Əliyevin və Prezident İlham Əliyevin siyasətini qətiyyətlə dəstəklədiklərini diqqətə çatdırıb. “1993-cü ildə Heydər Əliyevin hakimiyyətə qayıdışını Azərbaycanın rusdilli əhalisi üçün qurtuluş kimi qiymətləndirmək olar. O dövrdə rusdilli əhali ölkədən köçürdü. Heydər Əliyevin qayıdışı bu insanlar üçün sabitliyin təminatı idi”, - deyə o vurğulayıb. S.Markov vurğulayıb ki, hazırda Prezident İlham Əliyevin rəhbərliyi ilə həyata keçirilən multikulturalizm və tolerantlıq siyasəti Azərbaycanda sülhün və sabitliyin qorunmasına xidmət edir.
Rusiya Dövlət Dumasının deputatı, Rusiya-Azərbaycan parlamentlərarası dostluq qrupunun rəhbəri Dmitri Savelyev ötən gün Sankt-Peterburq metrosunda törədilmiş terror aktını qətiyyətlə pisləyərək bildirib ki, Azərbaycan postsovet məkanının təhlükəsizlik baxımından ən sabit dövlətlərindən biridir. O deyib: “Azərbaycan Rusiya ilə birlikdə regionda sabitliyin qorunması məqsədlərinə xidmət edir. Azərbaycanın güclü ordusu, müasir silahları var və bütün bunlar regionda sabitliyə xidmət edir. Ötən 25 il ərzində Azərbaycan sübut edib ki, etibarlılığın və sabitliyin dayağıdır. Rusiya qardaş Azərbaycana hər zaman etibar edə bilər”.
Deputat Dağlıq Qarabağ münaqişəsinin həlli məsələsinə toxunaraq vurğulayıb ki, bu problem tezliklə həllini tapmalı, işğal altında olan ərazilər Azərbaycana qaytarılmalıdır. “Toxunmaq istədiyim ikinci məsələ Xocalı soyqırımı ilə bağlıdır. Bu dəhşətli faciəyə dünya ictimaiyyəti tərəfindən münasibət ikili standartların bariz nümunəsidir. Hesab edirəm ki, Xocalı faciəsinin soyqırımı kimi dünya parlamentləri tərəfindən tanınması olduqca vacib məsələdir”, - deyə o vurğulayıb.
Dövlət Dumasının deputatı Tatyana Tsıbizova bu günlər Bakıda keçirilən Rusiya-Azərbaycan münasibətlərinə dair konfransda iştirak etdiyini bildirilək deyib: “Mən Volqoqrad vilayətini təmsil edirəm. Volqoqradda Heydər Əliyev Fondunun dəstəyi ilə Volqoqrad-Bakı dostluq parkı salınıb, böyük Azərbaycan diasporu fəaliyyət göstərir. Volqoqradlılar Azərbaycanla olan mehriban dostluq münasibətlərini əsas tuturlar. Rusiya və Azərbaycan xalqları arasında münasibətlərə “tolerantlıq” sözü uyğun gəlmir. Biz bir-birimizə dözümlülük nümayiş etdirmirik, biz dostluq edirik”. Rusiyalı deputat Mehriban xanım Əliyevanı Azərbaycanın Birinci vitse-prezidenti vəzifəsinə təyin edilməsi münasibətilə təbrik edərək bildirib ki, onun bu vəzifədə fəaliyyəti iki ölkənin qadın hərəkatının güclənməsinə təkan verəcək. “Qadın varlığı təbiətən sülhə köklənib. Azərbaycanda Dağlıq Qarabağda əzizlərini, həyat yoldaşlarını, ata və qardaşlarını itirmiş qadınlar var. Əminəm ki, Mehriban xanım Əliyevanın rəhbərliyi ilə qadınlar sülhməramlı hərəkata başçılıq edəcəklər. Azərbaycan sülh sahəsində əməkdaşlıqda digər postsovet ölkələrinə nümunə ola bilər”.
Rusiya Dövlət Dumasının İnformasiya Siyasəti, İnformasiya Texnologiyaları və Rabitə Komitəsi sədrinin müavini Aleksandr Yuşşenko aprelin 3-də Almaniyada tədbirdə iştirak etdiyini və Sankt-Peterburq metrosunda baş vermiş terror hadisəsi barədə xəbəri orada aldığını deyib. O bildirib ki, terror aktında həyatını itirənlərlə əlaqədar ilk başsağlığını Milli Məclisdən olan həmkarlarından alıb. Bu, iki ölkənin parlamentariləri arasında dostluq münasibətlərinin səviyyəsindən xəbər verir. Deputat Azərbaycan rəhbərliyinin rus dilinə qayğısından danışıb. “Ölkələrimiz kənar qüvvələrin əks təsirinə baxmayaraq əməkdaşlığı və inteqrasiya əlaqələrini inkişaf etdirəcəklər. Bu gün Azərbaycan çiçəklənən dövlətdir. Dünyanın ən gözəl şəhərlərindən biri olan Bakı mühüm beynəlxalq tədbirlərə ev sahibliyi edir. “Eurovision” mahnı yarışmasının, Birinci Avropa Oyunlarının, “Formula-1” yarışının Bakıda uğurla keçirilməsi Birinci vitse-prezident Mehriban Əliyevanın xidmətləridir. A.Yuşşenko vurğulayıb ki, Rusiya ilə Azərbaycan arasında əməkdaşlıq nə qədər güclü olarsa, dünyada qanlı terror törədən qüvvələrin mövqeyi bir o qədər zəifləyər.
Tədbirdə Azərbaycanın əməkdar elm xadimi, professor Kamran Rüstəmov, “AzərRos” ictimai təşkilatının rəhbəri Mehriban Sadıqova da çıxış ediblər.
“Dəyirmi masa” zamanı Bakı ilə canlı bağlantı da yaradılıb. Bakıdan “Skype” vasitəsilə tədbirə Ekspert Şurasının sədri Elxan Ələsgərov, “Baku Network” analitika mərkəzinin direktoru Gülnarə Məmmədzadə qatılıblar. Onlar bu günlər Bakıda Azərbaycan-Rusiya diplomatik münasibətlərinin qurulmasının 25 illiyi ilə əlaqədar silsilə tədbirlərin keçirildiyini qeyd edib, iki ölkə arasında münasibətlərin böyük perspektivlərindən, o cümlədən Azərbaycan-Türkiyə-Rusiya müstəvisinin inkişaf etdirilməsinin vacibliyindən danışıblar.
Fəridə Abdullayeva
AZƏRTAC-ın xüsusi müxbiri
Moskva