Bakı, 15 mart, AZƏRTAC

Martın 15-də İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinə (4SİM) mediatur təşkil olunub.

AZƏRTAC xəbər verir ki, Dördüncü Sənaye İnqilabının Təhlili və Koordinasiya Mərkəzinin icraçı direktoru Tamerlan Tağıyev KİV nümayəndələrinə Mərkəzin fəaliyyəti, ölkəmizin 4-cü Sənaye İnqilabının yaratdığı imkanlardan bəhrələnməsi istiqamətində görülən işlər və bu sahədə Dünya İqtisadi Forumu ilə əməkdaşlıq istiqamətləri barədə məlumat verib.

Qeyd edilib ki, Azərbaycan Respublikası Prezidentinin 2021-ci il 6 yanvar tarixli Fərmanı ilə İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi yaradılıb. Mərkəz ölkəmizin Dördüncü Sənaye İnqilabı sahəsində fəaliyyət göstərən beynəlxalq təşkilatlarla əməkdaşlığını və bu sahədə əlaqələndirməni, habelə rəqəmsal iqtisadiyyat üzrə çağırışların, təşəbbüslərin, strategiyaların və layihələrin təhlilini və koordinasiyasını həyata keçirir. Bildirilib ki, 4SİM 2021-ci il aprelin 1-dən Dünya İqtisadi Forumunun Dördüncü Sənaye İnqilabı Şəbəkəsinin Azərbaycandakı Dördüncü Sənaye İnqilabı Mərkəzinə də ev sahibliyi edir və hazırda Dünya İqtisadi Forumu ilə 3 platforma üzrə - “Süni İntellekt və Maşın öyrənməsi”, “Əşyaların İnterneti və Şəhər Transformasiyası” və “Rəqəmsal Ticarət” üzrə layihələrin icrasını və koordinasiyasını həyata keçirir.

Bundan əlavə, 22 dövlət qurumunun nümayəndələrindən ibarət “4-cü Sənaye İnqilabı” üzrə və 11 dövlət qurumunun nümayəndələrindən ibarət “Rəqəmsal ticarət” üzrə İşçi qruplar yaradılıb və hər iki İşçi Qrupun koordinasiyası da Dördüncü Sənaye İnqilabının Təhlili və Koordinasiya Mərkəzi tərəfindən həyata keçirilir. Tamerlan Tağıyev işğaldan azad edilmiş ərazilərimizin bərpasında 4-cü Sənaye İnqilabı texnologiyalarının tətbiqinin önəmini vurğulayıb və ən qabaqcıl texnologiyaların Azərbaycana gətirilməsi və “Ağıllı” və “yaşıl” Qarabağın qurulmasında Mərkəzin öz töhfəsini verəcəyini qeyd edib.