REGİONLAR


Dövlət Baytarlıq Xidmətinin rəisi Samuxda qarayara və dabaq xəstəliklərinə qarşı aparılan peyvəndləmə tədbirlərini izləyib

Bakı, 5 mart, AZƏRTAC

Kənd Təsərrüfatı Nazirliyi yanında Dövlət Baytarlıq Xidmətinin (DBX) rəisi Bayandur Rzayev Samux rayonunda heyvanların qarayara və dabaq xəstəliklərinə qarşı aparılan profilaktik peyvəndləmə işləri ilə tanış olub. Həmçinin Samux rayonunun Tatlı və Qiyaslı kənlərində olan Xidmət rəisi heyvanların saxlama, yemləmə şəraiti, qarayara və dabaq xəstəliklərinə qarşı aparılan profilaktik peyvəndləmə tədbirlərini izləyib.

DBX-dən AZƏRTAC-a bildiriblər ki, Xidmət rəisinə təsərrüfatlarda görülən işlərlə bağlı məlumat verilib. Bildirilib ki, Tatlı kəndində sahibkar Nəsibov Rübail Həsən oğluna məxsus təsərrüfatda 200 baş iribuynuzlu heyvan, Qiyaslı kəndində sahibkar Kərimov Azad Yaşar oğluna məxsus damazlıq simmental cinsli iribuynuzlu heyvandarlıq təsərrüfatında isə 170 baş heyvan saxlanılır. Təsərrüfatların tərkibinə ferma binaları, doğum, sağım və buzovluq bölmələri, yem istehsalı sahəsi, əkinçilik təsərrüfatı və digər köməkçi sahələr daxildir.

Həmçinin təsərrüfatlarda saxlanılan heyvanların yem bazası, xarici ölkə istehsalı olan kənd təsərrüfatı texnika və aqreqatları barədə də ətraflı məlumat verilib.

Təsərrüfatda istehsal edilən ekoloji təmiz ət, süd və süd məhsullarının bazarda çoxsaylı alıcılara təqdim olunduğu vurğulanıb.

Bayandur Rzayev təsərrüfat sahiblərinin müraciətini, arzu və təkliflərini dinləyib, heyvanların sağlamlığının təmin edilməsi ilə bağlı müvafiq tövsiyələr verib, eləcə də baytar həkiminin iştirakı və tövsiyəsi olmadan heyvanlar üzərində özbaşına müalicə, peyvəndləmə və profilaktik tədbirlərin aparılmasının yolverilməz olduğunu qeyd edib. Xidmət rəisi bildirib ki, bir sıra təsərrüfatlarda vətəndaşlar heyvanları çimizdirərkən təlimata əməl etmir və baytar həkiminə məlumat vermədən özləri tərəfindən əvvəlcədən alınmış və uzun müddət şəraitsiz yerdə saxlanılmış dərmanlardan istifadə edirlər. Bu da son nəticədə heyvanlar arasında zəhərlənməyə və ölüm hallarının baş verməsinə gətirib çıxarır.

Xidmət rəisi, həmçinin fermerlərin, təsərrüfat sahiblərinin müraciətlərinin sahə baytarlıq məntəqələri və baytarlıq idarələri tərəfindən qəbul edilərək çevik və vaxtında cavablandırıldığını vurğulayıb.

Görüşdə xidmət tərəfindən həyata keçirilən baytarlıq tədbirləri barədə məlumat verilib və hazırda respublikanın epizootik sabitliyinin saxlanılması sahəsində yerlərdə müvafiq tədbirlər görüldüyü bildirilib.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.