İQTİSADİYYAT
Dövlət Gömrük Komitəsinin nümayəndə heyəti Rusiya Gömrük Akademiyasının yubiley tədbirlərində iştirak edib
Bakı, 29 sentyabr, AZƏRTAC
Dövlət Gömrük Komitəsinin (DGK) sədr müavini, gömrük xidməti general-mayoru İqbal Babayevin rəhbərliyi ilə nümayəndə heyəti Rusiya Gömrük Akademiyasının 25 illik yubiley tədbirlərində iştirak etmək üçün Moskva şəhərinə səfər edib.
DGK-nın mətbuat və ictimaiyyətlə əlaqələr idarəsindən AZƏRTAC-a bildiriblər ki, səfərin ilk günü Dövlət Gömrük Komitəsinin sədr müavini İqbal Babayev Rusiya Federasiyasının Federal Gömrük Xidməti rəhbərinin müavini Andrey Strukov və Gömrük Əməkdaşlığı İdarəsinin rəisi Sergey Konovalenko ilə rəsmi görüş keçirib. Görüşdə iki ölkə arasında ticarət əlaqələrinin vəziyyəti, sərhəd buraxılış məntəqələrində mal və nəqliyyat vasitələrinin keçidinin daha da sürətləndirilməsi, Azərbaycan və Rusiya arasında aparılan ticarətin gömrük statistikası ilə bağlı məsələlər və problemlərin araşdırılması müzakirə edilib, eləcə də Rusiya Gömrük Akademiyası ilə Dövlət Gömrük Komitəsinin Akademiyası arasında mütəxəssis hazırlığı sahəsində əməkdaşlıq əlaqələrinin qurulması ilə bağlı fikir mübadiləsi aparılıb.
Sonra Azərbaycan Respublikası Dövlət Gömrük Komitəsinin nümayəndə heyəti Rusiya Gömrük Akademiyasının 25 illiyi əlaqədar keçirilən təntənəli tədbirdə iştirak edib.
Tədbirdə Belarus Respublikasının, Qazaxıstan Respublikasının, Qırğız Respublikasının və Tacikistan Respublikasının gömrük xidmətlərinin və gömrük işi sahəsində tədris aparan ali təhsil müəssisələrinin nümayəndələri, Rusiya Gömrük Xidmətinin veteranları, yüksək səviyyəli dövlət rəsmiləri və müxtəlif beynəlxalq təşkilatların təmsilçiləri iştirak ediblər.
Bu ali təhsil müəssisələrinin rəisi Vladimir Mantusov akademiyanın ötən dövr ərzində əldə etdiyi nailiyyətlər, qarşıda duran vəzifələr haqqında məlumat verib.
Rusiya Federal Gömrük Xidmətinin rəhbəri Vladimir Bulavin çıxış edərək Rusiya dövlət başçısının yubiley ilə əlaqədar təbrik sözlərini iştirakçıların diqqətinə çatdırıb.
Daha sonra akademiya haqqında qısa videoçarx nümayiş olunub və tədbir konsert proqramı ilə davam edib.
Azərbaycan nümayəndə heyətinin rəhbəri İqbal Babayev Dövlət Gömrük Komitəsinin sədri Səfər Mehdiyevin Federal Gömrük Xidmətinin rəhbəri Vladimir Bulavinə ünvanladığı təbriki səsləndirib və yubilyar təşkilata komitənin hədiyyəsini təqdim edib.
Səfər çərçivəsində Azərbaycan Respublikası Dövlət Gömrük Komitəsinin nümayəndə heyəti Rusiya Gömrük Akademiyasının rəisi, professor Vladimir Mantusovla görüşüb. Görüş zamanı Azərbaycan Respublikası Dövlət Gömrük Komitəsinin Akademiyası ilə Rusiya Gömrük Akademiyası arasında əməkdaşlığın perspektivləri müzakirə edilib, təhsil müəssisələri arasında ikili diplom proqramının təşkili imkanlarının araşdırılması, Rusiya Gömrük Akademiyasında tədrisin təşkili ilə bağlı müvafiq məlumatların, gömrük işinə aid dərsliklər və tədris vəsaitlərinin Azərbaycan Respublikası Dövlət Gömrük Komitəsinin Akademiyasına təmənnasız olaraq verilməsi, təcrübə mübadiləsinin aparılması üçün qarşılıqlı səfərlərin təşkili məsələlərinə baxılması haqqında razılıq əldə edilib.