Dövlət Komitəsi məcburi köçkünlərin məşğulluğunu təmin edir

Bakı, 3 avqust, AZƏRTAC

2022-ci ilin aprel-iyul ayları ərzində Qaçqınların və Məcburi Köçkünlərin İşləri üzrə Dövlət Komitəsinə fəal məşğulluq tədbirlərinə cəlb edilmək üçün 81 nəfər məcburi köçkün müraciət edib. Onlardan 51-i kişi, 30-u qadındır.

Komitənin mətbuat xidmətindən AZƏRTAC-a bildiriblər ki, məcburi köçkünlərdən 58 nəfərinə müxtəlif idarə və təşkilatlarda müvafiq iş təklif olunub, onlardan 23 nəfər təklifi qəbul edib. Özünüməşğulluq proqramı üzrə kiçik sahibkarlıq fəaliyyəti qurmaq təklif edilən 31 nəfərdən 14-nün müxtəlif biznes ideyaları qeydiyyata alınıb. Məcburi köçkünlərdən 18 nəfəri onlara təklif edilən iş yerlərindən və ya özünüməşğulluq proqramına qoşulmaqdan imtina edib.

Xatırladaq ki, Qaçqınların və Məcburi Köçkünlərin İşləri üzrə Dövlət Komitəsi və Əmək və Əhalinin Sosial Müdafiəsi Nazirliyinin (ƏƏSMN) birgə əməkdaşlığı çərçivəsində işsiz məcburi köçkünlərin əmək bazarına qaytarılması, onların bilik və bacarıqlarının təkmilləşdirilməsi istiqamətində müvafiq tədbirlər görülüb. Komitəyə daxil olan müraciətlər aidiyyəti üzrə araşdırılıb və işsiz şəxslərə müxtəlif iş yerləri təklif edilib. Birgə əməkdaşlıq çərçivəsində, məcburi köçkün statuslu şəxslər müxtəlif idarə və təşkilatlarda iş ilə təmin edilib, özünüməşğulluq proqramı və peşə kurslarına yönləndiriliblər.

Komitə ilə nazirlik arasında əməkdaşlıq məcburi köçkünlərin əmək bazarına inteqrasiyası istiqamətində davam etdirilir.