SİYASƏT


Dövlət Komitəsində AŞPA nümayəndə heyəti ilə görüş keçirilib

Bakı, 27 iyul, AZƏRTAC

Qaçqınların və Məcburi Köçkünlərin İşləri üzrə Dövlət Komitəsinin sədr müavini Fuad Hüseynov Avropa Şurası Parlament Assambleyasının (AŞPA) Miqrasiya, qaçqınlar və məcburi köçkünlər komitəsinin üzvü, “Ermənistan və Azərbaycan arasında münaqişənin humanitar nəticələri” mövzusunda hazırlanacaq hesabatın məruzəçisi Pol Qavan ilə görüşüb.

Komitənin mətbuat xidmətindən AZƏRTAC-a bildiriblər ki, görüşdə qonaqlara Azərbaycan ərazilərinin işğalına səbəb olan münaqişənin tarixi və nəticələri haqqında məlumat verilib. Qeyd edilib ki, Ermənistan tərəfindən 30 ilə yaxın işğalda saxlanılan ərazilərimiz dağıntılara məruz qalıb, yaşayış binaları, fərdi evlər, tarixi və dini abidələrimiz məhv edilib. Bu müddətdə respublikanın müxtəlif bölgələrində müvəqqəti məskunlaşmış məcburi köçkünlərin sosial problemlərinin həllinə diqqət və qayğı göstərilib. Prezident İlham Əliyevin tapşırığı əsasında məcburi köçkünlərin mənzil-məişət şəraitinin yaxşılaşdırılması, məşğulluğunun artırılması, maddi rifahının yüksəldilməsi prioritet təşkil edib. Birinci vitse-prezident Mehriban xanım Əliyeva tərəfindən onlara xüsusi yanaşma olub.

Məcburi köçkünlərin doğma yurdlarına könüllü, təhlükəsiz və ləyaqətlə qayıtması üçün, dövlət tərəfindən mühüm tədbirlər görülür. “Ağıllı kənd” layihəsi əsasında qəsəbələr salınır. İlk belə qəsəbə Zəngilan rayonu Ağalı kəndində salınır, 200 fərdi mənzilin tikintisi həyata keçirilir. Tamamilə dağıdılmış Ağdam şəhərinin yenidən qurulmasına başlanılıb.

AŞPA-nın Humanitar nəticələr üzrə məruzəçisi Pol Qavan bildirib ki, məcburi köçkün məsələsi həssasdır və onlarla bağlı həyata keçirilən tədbirlər istiqamətində Azərbaycan hökumətinin üzərinə mühüm vəzifələr düşür. O, işğaldan azad edilmiş ərazilərdə aparılan işlərdə Azərbaycan dövlətinə uğurlar arzulayıb.

Görüşdə AŞPA-nın Miqrasiya, qaçqınlar və məcburi köçkünlər komitəsinin katibliyinin rəhbəri Mark Nevil iştirak edib.

Dövlət Komitəsi sədrinin müavini qonaqların məcburi köçkünlərin məşğulluğu, mənzil-məişət şəraitinin yaxşılaşdırılması, qayıdış və digər məsələlərlə bağlı suallarını cavablandırıb.

X X X

Dövlət Komitəsi sədrinin müavini Fuad Hüseynov beynəlxalq ekspert Cefferi Senoqleslə də görüşüb. Ekspert Ermənistanın 30 ilə yaxın bir müddətdə işğal altında saxladığı Azərbaycan ərazilərinə vurduğu ziyanla bağlı məlumat toplayır. Toplanmış materiallar əsasında beynəlxalq məhkəməyə müraciət ünvanlanacaq.

Görüşdə Cefferi Senoqlesi maraqlandıran suallar cavablandırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.