Dövlət Komitəsində keçmiş məcburi köçkünlərin müraciətləri dinlənilib

Bakı, 31 yanvar, AZƏRTAC

Yanvarın 31-də Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev vətəndaşların növbəti qəbulunu keçirib.

Dövlət Komitəsindən AZƏRTAC-a verilən məlumata görə ki, qurumun sədri Rövşən Rzayev əvvəlcədən növbəlilik əsasında qəbula yazılmış vətəndaşların müraciətlərini dinləyib, suallarını cavablandırıb.

Bildirilib ki, Prezident İlham Əliyevin apardığı mükəmməl siyasi xətt ölkəmizin hərtərəfli və davamlı inkişafını, bütün sosial layihələrin ardıcıl icrasını təmin edib, eyni zamanda, məcburi köçkünlərin problemlərinin həllini sosial siyasətin prioritet istiqamətlərindən biri kimi müəyyən edib. Onların mənzil-məişət şəraitinin yaxşılaşdırılması, işğaldan azad olunmuş ərazilərdə əhalinin dayanıqlı məskunlaşmasının təmin edilməsi üçün zəruri tədbirlər görülüb. Məcburi köçkünlərin mənzil, təhsil, sağlamlıq problemlərinin həllində Birinci vitse-prezident Mehriban xanım Əliyevanın da xüsusi diqqət və qayğı göstərdiyi, bu sahədə mühüm işlər gördüyü qeyd edilib.

Qəbulda iştirak edən vətəndaşların müraciətləri, əsasən, mənzil-məişət şəraitinin yaxşılaşdırılması, kommunal xidmətlər, status, vahid aylıq müavinət, məşğulluq, işğaldan azad olunmuş ərazilərə qayıdış və digər məsələlərlə əlaqədar olub. Əksəriyyəti məcburi köçkün olan vətəndaşların müraciətləri dinlənilib və müvafiq qaydada qeydə alınıb.

Vətəndaşlara bildirilib ki, qaldırılan məsələlər araşdırılacaq və qanunvericiliyə uyğun şəkildə həll ediləcək.