CƏMİYYƏT
Dövlət Məşğulluq Agentliyi ilə bp şirkəti arasında Anlaşma Memorandumu imzalanıb
Bakı, 4 avqust, AZƏRTAC
Dövlət Məşğulluq Agentliyi ilə bp şirkəti arasında gələcək birgə layihələrin icrasını nəzərdə tutan Anlaşma Memorandumu imzalanıb.
Sənədi Dövlət Məşğulluq Agentliyinin İdarə Heyətinin sədri Mustafa Abbasbəyli və bp şirkətinin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli imzalayıb.
Agentliyin mətbuat xidmətindən AZƏRTAC-a verilən məlumata görə, M.Abbasbəyli məşğulluq sahəsində aparılan islahatları, pandemiya və postmüharibə dövründə sosial dəstək paketləri çərçivəsində məşğulluq sahəsində proqramları qeyd edib. O, aktiv məşğulluq proqramlarının təşkili sahəsində Dövlət Məşğulluq Agentliyi ilə bp şirkəti arasında əlaqələrin əhəmiyyətini və yeni imzalanan əməkdaşlıq sənədi ilə həmin əlaqələrin daha da güclənəcəyini diqqətə çatdırıb.
B.Aslanbəyli bp-nin Azərbaycandakı fəaliyyətindən, həyata keçirdiyi geniş sosial sərmayə proqramlarından bəhs edib, o cümlədən yerli potensialın və sahibkarlığın inkişafına yönəlmiş sosial layihələri haqqında məlumat verib.
Görüşdə Anlaşma Memorandumu üzrə həyata keçirilməsi nəzərdə tutulan, gənc sahibkarlara dəstək məqsədi daşıyacaq “Kənd yerlərində gənc sahibkarlara dəstək” təşəbbüsündən bəhs olunub, əməkdaşlıq sənədi əsasında birgə fəaliyyət müstəvisində icra olunacaq məşğulluq layihələrinə dair fikir mübadiləsi aparılıb.