CƏMİYYƏT
Dövlət Miqrasiya Xidməti “Caspian Energy Forum Baku-2018”ə dəstək verir
Bakı, 6 avqust, AZƏRTAC
Dövlət Miqrasiya Xidməti dünyanın 50 ölkəsindən 1500-dən çox nümayəndə heyətinin iştirak edəcəyi VII Beynəlxalq “Caspian Energy Forum Baku–2018”in təşkilinə dəstək göstərir.
AZƏRTAC xəbər verir ki, bu barədə “Caspian European Club”un sədrinin birinci müavini və baş icraçı direktoru Telman Əliyev məlumat verib.
O, Dövlət Miqrasiya Xidmətinin rəisi Vüsal Hüseynovun “Capian European Club”un idarə heyətinin üzvləri ilə ikitərəfli görüş çərçivəsində bu forumun təşkilini yüksək qiymətləndirərək tədbirdə iştirak edəcəyini bildirib.
“Caspian Energy Forum Baku–2018” sentyabrın 20-də Azərbaycan Respublikası Hökumətinin və “Caspian European Club”un dəstəyi ilə keçiriləcək.
“1994-cü il sentyabrın 20-də ümummilli lider Heydər Əliyevin rəhbərliyi ilə Xəzər-Qara dəniz regionunun neft və qeyri-neft sektorunun inkişafına təkan verən “Əsrin müqaviləsi” imzalanıb. Xəzərin enerji resursları hesabına Avropanın enerji təhlükəsizliyinin təminatının əsası da məhz o zaman qoyulub. Bununla əlaqədar hər il eyni vaxtda “Caspian Forum Baku” təşkil edəcəyik. “Caspian Energy Forum Baku-2018”in təşkili “Caspian European Club”un yuxarı rəhbərliyinin yaratdığı yeni şərait sayəsində mümkün olub”, - deyə Telman Əliyev söyləyib.
Bildirilib ki, “Caspian Energy Forum Baku–2018”in nümayəndələri arasında Azərbaycan hökumətinin üzvləri, Avropa, Asiya və Amerika ölkələrinin dövlət və transmilli şirkətlərinin, beynəlxalq maliyyə institutlarının, aparıcı analitik mərkəzlərin, investisiya şirkətlərinin və reytinq agentliklərinin rəhbərləri, həmçinin ərəb dünyası ölkələrinin şirkətlərinin təmsilçiləri də yer alıblar.
Xəzər-Qara dəniz və Baltik regionu ölkələrində ildə bir neçə dəfə keçirilən “Caspian Energy Forum” biznes-hökumət dialoqunun fəallaşması, neft və qeyri-neft sektoru şirkətləri arasında sıx əlaqələrin yaranması, transmilli şirkətlərlə kiçik və orta biznes nümayəndələrinin görüşlərinin təşkili, həmçinin qlobal biznes əməkdaşlığında maraqlı olan investor, ekspert və analitiklər üçün münbit şərait yaradan ənənəvi meydandır.
Telman Əliyev əlavə edib ki, tədbirin proqramı, iştirakın şərtləri ilə bağlı məlumat əldə etmək və qeydiyyatdan keçmək üçün http://caspianenergyforum.com/baku2018/index.php/en/ linkinə daxil olmaq lazımdır.
Sıralarında dünyanın 70 ölkəsindən olan 5 mindən çox şirkət və təşkilatı birləşdirən “Caspian European Club” 2002-ci ilin iyununda Xəzər-Qara dəniz regionunda fəaliyyət göstərən nəhəng neft-qaz şirkətlərinin dəstəyi ilə yaradılıb.
2016-cı il dekabrın 24-də “Caspian American Club”, 2018-ci il yanvarın 26-da “Caspian Asian Club” təsis olunub. Hər iki təşkilat iki il ərzində “Caspian European Club”un idarə heyətinin üzvləri tərəfindən idarə ediləcək. “Caspian European Club”a daxil olan bütün şirkətlər avtomatik qaydada “Caspian American Club” və “Caspian Asian Club”un, “Caspian American Club” və “Caspian Asian Club”a daxil olanlar isə “Caspian European Club”un üzvü hesab olunurlar.
“Caspian European Club”, “Caspian American Club” və “Caspian Asian Club”un sədri Azərbaycan Prezidenti İlham Əliyevdir.
“Caspian Energy” jurnalı dünyanın 70 ölkəsində yayılır. On doqquz il ərzində jurnalda dünyanın müxtəlif ölkələrinin Prezident və Baş nazirlərinin, həmçinin nüfuzlu beynəlxalq təşkilat və nəhəng transmilli şirkət rəhbərlərinin müsahibələri, aparıcı ekspertlərin icmal və analitik materialları dərc olunur. Müxtəlif qiymətləndirmələrə görə, jurnal Xəzər-Qara dəniz və Baltik regionlarının aparıcı nəşrləri beşliyinə daxil olub, həmin regionlarda fəaliyyətin müəyyənləşdirilməsində əksər sərmayəçilər üçün istiqamətləndirici rol oynayır.