CƏMİYYƏT
Dövlət Miqrasiya Xidmətinin 15 illik yubileyi ərəfəsində növbəti qanvermə aksiyası Gəncə və Xaçmazda keçirilib
Bakı, 12 mart, AZƏRTAC
Dövlət Miqrasiya Xidmətinin (DMX) yaradılmasının 15-ci ildönümü və miqrasiya orqanları işçilərinin peşə bayramı ərəfəsində keçirilən qanvermə aksiyasına Gəncə regional miqrasiya idarəsinin əməkdaşları da qoşulublar.
DMX-dən AZƏRTAC-a bildiriblər ki, talassemiya, hemofiliya və digər qan xəstəliklərindən əziyyət çəkənlərə yardım məqsədilə təşkil olunan aksiya Milli Hematologiya və Transfuziologiya Mərkəzinin Qan Bankının həkim hematoloqları tərəfindən həyata keçirilib.
Daha bir qanvermə aksiyası isə Xaçmazda baş tutub. Tədbir Xaçmaz regional miqrasiya idarəsi və Transfuziologiya Mərkəzinin Qan Bankının Quba bölməsi ilə birgə təşkil olunub. Onlardan götürülən qan nümunələri hemofiliya və talassemiya xəstəliklərindən əziyyət çəkən insanlara, xüsusən də uşaqlara yardım etmək, bu məqsədlə tədarük olunan qan ehtiyatını artırmaq üçün istifadə ediləcək.