SİYASƏT
Dövlət Sosial Müdafiə Fondunun 2015-ci il dövlət büdcəsi parlamentin komitə iclasında müzakirə edilib
Noyabrın 7-də Milli Məclisin sosial siyasət komitəsinin iclasında “Azərbaycan Respublikası Dövlət Sosial Müdafiə Fondunun 2015-ci il dövlət büdcəsi haqqında”, “Azərbaycan Respublikasında 2015-ci il üçün yaşayış minimumu haqqında”, “Azərbaycan Respublikasında 2015-ci il üçün ehtiyac meyarının həddi haqqında” qanun layihələri müzakirə olunub.
AZƏRTAC xəbər verir ki, Dövlət Sosial Müdafiə Fondunun (DSMF) gələn il üçün proqnoz göstəriciləri barədə məlumat verən Fondun sədri Elman Mehdiyev deyib ki, DSMF-nin 2015-ci il üçün büdcə layihəsi növbəti il üzrə gözlənilən əsas iqtisadi, sosial inkişaf və demoqrafik proqnozlar nəzərə alınmaqla tərtib olunub. Layihədə DSMF-nin 2015-ci il üçün gəlirləri 3 milyard 56 milyon manat proqnozlaşdırılır ki, bu da 2014-cü ilin göstəricisinə nisbətən 127,8 milyon manat və ya 4,4 faiz çoxdur. Fondun 2015-ci il üçün gəlirlərinin 63,8 faizini və ya 1 milyard 950 milyon manatını məcburi dövlət sosial sığorta haqları üzrə daxilolmalar təşkil edəcək. Bu, 2014-cü ilin göstəricilərinə nisbətən 9,5 faiz və ya 169,8 milyon manat yüksəkdir. Proqnozlaşdırılan sosial sığorta daxilolmalarının 64,2 faizi və ya 1 milyard 251 milyon manatı qeyri-büdcə təşkilatlarından daxilolmaların payına düşəcək. Həmin təşkilatlar üzrə daxilolmaların həcmi 2014-cü ilin göstəricisinə nisbətən 11,7 faiz və ya 131,3 milyon manat artımla proqnozlaşdırılıb. Layihədə büdcə təşkilatlarının ödəyəcəyi sosial sığorta haqlarının proqnozu 698,9 milyon manat nəzərdə tutulub. Gözlənilən faiz gəlirlərinin həcmi 6,1 milyon manat təşkil edəcək. 2015-ci ildə dövlət büdcəsindən ayırmalar, yəni, transfertin proqnozu 1 milyard 100 milyon manat nəzərdə tutulur ki, bu da 2014-cü ilin göstəricisinə nisbətən 3,7 faiz və ya 42 milyon manat azdır. DSMF-nin 2015-ci il üçün xərcləri 3 milyard 56,3 milyon manat proqnozlaşdırılır və 2014-cü ilin göstəricisinə nisbətən 127,8 milyon manat və ya 4,4 faiz çoxdur. Növbəti ildə əhaliyə ödənişlər Fondun xərclərinin 97,8 faizini təşkil edəcək və ya 2 milyard 989,2 milyon manat olacaq.
Əmək pensiyalarının ödənişi xərclərinin proqnozu 2 milyard 900,5 milyon manat olmaqla 2014-cü ilə nisbətən 4,4 faiz çoxdur.
Əmək pensiyalarının baza hissəsinin və ona əlavələrin maliyyələşdirilməsi üçün ümumilikdə 1 milyard 536,5 milyon manat, o cümlədən 1 milyard 491,8 milyon manat baza hissəsi nəzərdə tutulub. 44,7 milyon manat isə baza hissəsinə əlavələrin ödənişi üçün nəzərdə tutulub. 2015-ci ildə əmək pensiyalarının sığorta hissəsi 1 milyard 374 milyon məbləğində proqnozlaşdırılır. 2014-cü ilə nisbətən bu göstərici 8,2 faiz və ya 103,9 milyon manat çoxdur.
2015-ci ildə məcburi dövlət sosial sığorta haqları hesabına verilən müavinətlərin proqnozu 78,6 milyon manat nəzərdə tutulur ki, bu da 2014-cü ilə nisbətən 7,5 faiz və ya 5,5 milyon manat çoxdur. Digər xərclər 67,1 milyon manat məbləğində proqnozlaşdırılır. Pensiya və müavinətlərin əhaliyə çatdırılması, bank əməliyyatlarının aparılması üçün xidmət xərci 20,1 milyon manat, sığorta olunanların sanatoriya kurort müalicəsi və sağlamlaşdırma tədbirləri üçün Həmkarlar İttifaqı xətti ilə 19 milyon manat nəzərdə tutulur.
2015-ci ildə beynəlxalq təşkilatlara üzvlük haqqının ödənilməsi xərcləri 40 min manat, 2009-2015-ci illərdə Azərbaycan Respublikasının sığorta pensiya sisteminin inkişafına dair Dövlət Proqramının icrası ilə bağlı 1,5 milyon manat məbləğində vəsait layihədə nəzərə alınıb.
Bildirilib ki, “Azərbaycan Respublikası Dövlət Sosial Müdafiə Fondunun 2015-ci il büdcəsi haqqında” qanun layihəsi makroiqtisadi sabitlik və iqtisadiyyatın dinamik inkişafı nəticəsində əldə olunan potensial, əhəmiyyətli hissəsi pensiyaçıların sosial müdafiəsinə yönəldilməsini ifadə edən bir sənəddir. Həmin sənədin qəbulu Azərbaycanda pensiyaçıların sosial müdafiəsinin daha da gücləndirilməsi sahəsində vəzifələrin yerinə yetirilməsinə öz töhfəsini verəcək.
Sosial siyasət komitəsinin sədri Hadı Rəcəbli deyib ki, DSMF-nin büdcədən maliyyələşməsinin qismən azalması müsbət haldır.
Bildirilib ki, sığortaya cəlb olunmanın artması tendensiyası bu gün çox vacib məsələdir və ölkədə bu istiqamətdə işlər aparılır. Bu məsələdə əsas yük məhz DSMF-nin üzərinə düşür. 2015-ci ildə Fondu çox gərgin bir fəaliyyət gözləyir. Fonda büdcədən transfertin həcmi əvvəlki ilə nisbətən 42 milyon manat azalıb.
Büdcənin məxaric hissəsi ilə bağlı məsələlərə də toxunan komitə sədri qeyd edib ki, əsas yük yenə də pensiya ödənişlərinin üzərindədir. Uşaqların sağlamlıqlarının qorunması ilə bağlı büdcədən ayrılan vəsaitin üç dəfəyə qədər artmasını müsbət hal kimi qiymətləndirən H.Rəcəbli bu rəqəmin daha da artırılmasının vacibliyini vurğulayıb.
Qeyd olunub ki, sanatoriya, kurort mərkəzlərinə ayırmalar 2,2 faiz artıb. Bu rəqəmin artımının nəzərə alınmasını müsbət qiymətləndirən komitə sədri hazırkı ayırmaların hələ ki, günün tələblərinə cavab vermədiyini qeyd edib.
Diqqətə çatdırılıb ki, bütövlükdə bugünkü DSMF-nin büdcəsi dünyada gedən proseslərlə həmahəngdir, eyni zamanda, ölkədə gedən proseslərə cavab verir. Bu gərgin proqram Fondun əməkdaşları tərəfindən uğurla həyata keçiriləcək.
Daha sonra Azərbaycan Respublikasında 2015-ci il üçün yaşayış minimumu haqqında” və “Azərbaycan Respublikasında 2015-ci il üçün ehtiyac meyarının həddi haqqında” qanun layihələrinə baxılıb.
H.Rəcəbli bildirib ki, 2015-ci ilin dövlət büdcəsində yaşayış minimumu 131 manat məbləğində müəyyənləşib. Hələ 2008-ci ildə yaşayış minimumu 70 manat idi. Manatın son dövrdəki inflyasiyasını araşdırandan sonra aydın oldu ki, hazırkı 131 manat əhalinin alıcılıq qabiliyyətinə görə əvvəlki illərə nisbətən yüksək rəqəmdir. İstəyimiz odur ki, bu məbləğ yüksəlsin və müvafiq olaraq əhalinin sosial rifah halı da yaxşılaşsın.
Qeyd edilib ki, ehtiyac meyarı da yaşayış minimumuna uyğunlaşdırılır.
Sonda Elman Mehdiyev “2014-2020-ci illərdə Azərbaycan Respublikasında pensiya təminatı sisteminin islahatı Konsepsiyası” haqqında məlumat verib.