MƏDƏNİYYƏT


Dövlət Turizm Agentliyi hotelləri pandemiya ilə əlaqədar müəyyən olunmuş tələblərə ciddi riayət etməyə çağırıb

Bakı, 23 fevral, AZƏRTAC

Fevralın 23-də Dövlət Turizm Agentliyi tərəfindən Bakı şəhərində yerləşən hotellərin monitorinqi çərçivəsində növbəti mediatur baş tutub.

Səhiyyə Nazirliyi ilə birgə həyata keçirilən monitorinqlərdə pandemiya dövründə fəaliyyət göstərən hotellərdə işçi heyətin və qonaqların təhlükəsizliyinin təmin edilməsi üçün tələb olunan gigiyena və sanitariya tədbirlərinin tətbiq edilməsi səviyyəsi yoxlanılıb.

AZƏRTAC xəbər verir ki, mediaturdan sonra təşkil olunan mətbuat konfransında Dövlət Turizm Agentliyinin aparat rəhbəri Kənan Qasımov jurnalistlərin suallarını cavablandırıb.

Kənan Qasımov bildirib ki, gün ərzində Bakı şəhərində, eləcə də regionlarda 70-ə yaxın hotel monitorinqə cəlb olunur. Xüsusi olaraq diqqət bölgələrimizə yönəldilib və bu proses hər gün müntəzəm qaydada davam etdirilir. Avqust ayından başlanan monitorinq prosesi ümumilikdə Azərbaycanın 21 rayonunda həyata keçirilir ki, bu da Azərbaycan Respublikasının Nazirlər Kabinetinin 8 avqust 2020-ci il tarixli “Koronavirus (COVID-19) pandemiyası dövründə Azərbaycan Respublikasında mehmanxanaların fəaliyyətinin təşkili Qaydaları”nın təsdiq edilməsi barədə qərarına əsasən aparılır.

Qeyd edib ki, bu qərarda hotel fəaliyyəti ilə bağlı olan xidmətlər əhatəli şəkildə əks olunub və hotel nümayəndələri öz fəaliyyətlərini bu qərara uyğun şəkildə qurublar.

Dövlət Turizm Agentliyinin əsas vəzifələrindən birinin insanların səyahətlərinin təhlükəsizliyini təmin etmək olduğunu söyləyən aparat rəhbəri deyib: “Təbii ki, iqtisadiyyatın ən vacib sahələrindən olan hotel biznesində çalışan çoxlu sayda insanın iş fəaliyyətini təmin etmək agentliyin vəzifələrindən biridir. Hotellər bu qaydalara düzgün riayət etdikcə insanlarda pandemiya ilə bağlı xəstələnmə hallarının sayı azalmış olar”.

Kənan Qasımov, həmçinin hotellərin işçi heyətini, eləcə də qonaqları xüsusi karantin rejiminin qüvvədə olduğu müddətdə sosial məsafənin gözlənilməsi, dezinfeksiyaedici məhlullar, bütün qapalı və açıq məkanlarda tibbi maskadan istifadə edilməsinin məcburi olduğu barədə bir daha xəbərdarlıq edib və pandemiya ilə əlaqədar müəyyən edilmiş məhdudiyyət və tələblərə ciddi riayət etməyə çağırıb.

Ötən il avqustun 24-dən bu il fevralın 21-dək müvafiq qurumlar tərəfindən ölkədə fəaliyyət göstərən 374 hoteldə ümumi olaraq 11 min 244 sayda monitorinqin aparıldığını və 213 cərimənin tətbiq edildiyini vurğulayan K.Qasımov deyib: “Pandemiya dövründə mehmanxanalara sözügedən tələbləri əməl etməkdə dəstək göstərmək məqsədilə Dövlət Turizm Agentliyi tərəfindən fərdi qoruyucu vasitələr (maska, eynək, kombinezon və s.), dezinfeksiyaedici məhlullar paylanılıb, “SAHMAN” proqramı çərçivəsində maarifləndirmə işləri davam etdirilib. Mehmanxana qonaqlarına sosial məsafə və fərdi qoruyucu vasitələrdən istifadə ilə bağlı xatırlatmalar etmək məqsədilə divar və döşəməyə vurulmaq üçün 11 müxtəlif kateqoriyanı əks etdirən 4600 ədəd nişan və lövhə çap olunaraq sənaye nümayəndələrinə paylanılıb. Həmçinin hotelləri təlimatlandırmaq və maarifləndirmək məqsədilə təlimlər keçirilib, hotellərə pandemiyaya qarşı karantin tədbirlərinin icrasına məsul şəxslər təyin olunub.

Tədbirlər çərçivəsində Nazirlər Kabinetinin sərtləşdirilmiş karantin rejimində tətbiq edilən bəzi məhdudiyyətlərin aradan qaldırılması haqda 16 yanvar 2021-ci il tarixli qərarından sonra “Şahdağ” Turizm Mərkəzi və “Tufandağ” Qış-Yay Turizm İstirahət Komplekslərində qonaq sayının çox olması nəzərə alınaraq xüsusi məhdudlaşdırıcı tədbirlər həyata keçirilib”.

Sonra Dövlət Turizm Agentliyinin mətbuat katibi Kənan Quluzadə jurnalistlərin suallarını cavablandıraraq bildirib ki, Qarabağın zəngin turizm potensialı var və bu istiqamətdə müəyyən işlər görülür: “Kəlbəcər və Zəngilan rayonlarının bu potensialı daha qabarıqdır. İlkin qiymətləndirmələr aparılır, turizm marşrutları işlənilir, xüsusi bələdçilər hazırlanır, eyni zamanda Qarabağda dağıdılan abidələrin tarixi haqda məlumatlar toplanılır”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.