REGİONLAR
Dövlət dəstəyindən bəhrələnən ağdaşlı fermer gələn il 120 hektar sahədə çəltik əkəcək
Ağdaş, 14 sentyabr, Şahnəzər Bəşirov, AZƏRTAC
Prezident İlham Əliyevin sentyabrın 12-də imzaladığı Sərəncama əsasən həyata keçiriləcək tədbirlər ölkəmizdə sitrus meyvələri və çayçılıqla yanaşı, çəltik istehsalının da inkişafının sürətləndirilməsinə gətirib çıxaracaq.
Bu sözləri AZƏRTAC-a müsahibəsində Ağdaş rayonunun Kotanarx kənd sakini, fermer Əli Lətifov deyib. O qeyd edib ki, çəltikçilik Ağdaşda ənənəvi sahələrdən hesab olunur və kəndlilərin əsas gəlir mənbəyindən biridir. Müştərilərə bir kiloqramı 1,5-2 manata satılan Ağdaş düyüsü yüksək keyfiyyəti və dadı ilə həmişə alıcıların diqqətini cəlb edib.
“Ağdaş ölkənin ən böyük çəltikçilik rayonlarından biridir. Cari ildə rayonun 59 yaşayış məntəqəsində 360 fermer və torpaq mülkiyyətçisi tərəfindən 2454 hektar sahədə çəltik əkilib. Bu, 2014-cü illə müqayisədə 5 dəfə, ötən illə müqayisədə 2 dəfə çox olmaqla, respublikada əldə edilən ən yüksək göstəricidir. Keçən il hər hektarda məhsuldarlıq 18,2, bu il isə 30 sentner olub”, - deyə Əli Lətifov bildirib.
Fermerin sözlərinə görə, bu il rayonda çəltik əkini, becərilməsi və biçini ilə əlaqədar 2200 nəfər mövsümi işlə təmin olunub. Ağdaşlı fermerlər “Yerli bezos”, “Ağ mirvari”, “Qırmızı mirvari”, “Çappa”, “Ağ gilə” sortlarının əkilməsinə üstünlük verirlər.
Əli Lətifov Kotanarx və Nehrəxəlil kəndlərində, ümumilikdə, 80 hektar sahədə çəltik əkib. O, sahələrdən 220 tondan çox məhsul götürəcəyinə ümid edir. Ötən il isə 40 hektarda çəltik yetişdirib, 65 ton məhsul toplayıb. Bu il çəltik sahələrinə lazımi aqrotexniki qulluq göstərdiyi üçün bol məhsul əldə edib. Fermer deyib: “Sentyabrın 4-də çəltik yığımına başlamışam. Rayonda kombayn çatışmazlığı yoxdur. Hazırda çəltik biçininə 5 kombayn cəlb olunub. Çəltik əkininə görə hər hektar üçün dövlət tərəfindən 90 manat subsidiya verilir. Dövlətin bizə göstərdiyi qayğıdan çox razıyıq. Dövlət dəstəyindən bəhrələnərək gələn il 120 hektar sahədə çəltik əkməyi qarşıya məqsəd qoymuşam. Bunun üçün boş sahələr seçmişəm və hazırda torpaqda tarazlıq, şum çıxarma işləri görülür, suvarma üçün arxlar lildən təmizlənir”.
Fermer bildirib ki, Prezidentin “Azərbaycan Respublikasında sitrus meyvələri, çay və çəltik istehsalının inkişafı ilə bağlı əlavə tədbirlər haqqında” Sərəncamı respublikamızın bir çox rayonlarında, eləcə də Ağdaşda çəltikçiliyin inkişafına, bu sahənin potensial imkanlarından daha səmərəli istifadə edilməsinə tezliklə öz müsbət təsirini göstərəcək. Sərəncama əsasən çəltik istehsalının inkişafının sürətləndirilməsi, bu sahənin potensial imkanlarından daha səmərəli istifadə edilməsi və məhsul istehsalına əhalinin marağının artırılması məqsədilə əkinəyararlı torpaqlar müəyyən olunaraq təsərrüfat subyektlərinə ayrılacaq. Bu da çəltikçiliyin inkişafına əlavə imkanlar açacaq.
Ağdaşda müasir çəltik emalı və düyü istehsalı müəssisəsinin, çəltik qurutma meydançalarının inşa ediləcəyini bildirən Ə.Lətifov deyib: “Çəltikçiliyin daha da inkişaf etdirilməsi və yeni iş yerlərinin açılması üçün fəaliyyətimi genişləndirməyi düşünürəm. Dövlət başçısının çəltikçiliyin inkişafına diqqət və qayğısı məni işə daha həvəslə yanaşmağa sövq edir. Prezident İlham Əliyevin sentyabrın 3-də Lənkəran şəhərində keçirilən müşavirədəki çəltikçiliklə bağlı tapşırıq və tövsiyələri, sentyabrın 12-də imzaladığı Sərəncam qarşımıza mühüm vəzifələr qoyur. Çalışacağıq ki, bu vəzifələrin yerinə yetirilməsi üçün əlimizdən gələni əsirgəməyək”.