ELM VƏ TƏHSİL
“Dövlət-din münasibətləri: tarix və müasirlik” mövzusunda müzakirələr aparılıb
Bakı, 12 oktyabr, AZƏRTAC
Azərbaycan İlahiyyat İnstitutu (Aİİ) “Dövlət-din münasibətləri: tarix və müasirlik” mövzusunda seminar keçirib.
İnstitutdan AZƏRTAC-a bildirilib ki, seminarı idarə edən prorektor, ilahiyyat üzrə fəlsəfə doktoru Aqil Şirinov Aİİ-də mütəmadi olaraq müxtəlif mövzularda keçirilən tədbirlərin maarifləndirmə məqsədi daşıdığını və cəmiyyətdə maraqla qarşılandığını bildirib. O, bütün cəmiyyətlərdə, həm Şərqdə, həm də Qərbdə hər zaman aktual olan dövlət-din münasibətlərinin Azərbaycanda daha spesifik olduğunu vurğulayaraq, mövzunun xüsusi əhəmiyyət daşıdığını diqqətə çatdırıb.
Sonra ilahiyyat üzrə fəlsəfə doktoru Ceyhun Məmmədov “Dövlət-din münasibətləri: tarix və müasirlik” mövzusunda məruzə ilə çıxış edib. Azərbaycanda ən qədim dövrlərdən başlayaraq dövlət-din münasibətlərinin tarixindən bəhs olunan məruzədə ölkəmizin dini mənzərəsi əks olunub, xalqımızın əsrlərboyu digər din və mədəniyyətlərə dözümlü münasibəti ilə seçildiyi, onlarla sülh və qarşılıqlı anlaşma şəraitində yaşadığı, milli və dini etnik qruplar arasında ədavət və qarşıdurma hallarının müşahidə olunmadığı vurğulanıb.
Azərbaycan Xalq Cümhuriyyəti dövründə dövlət-din münasibətlərini xarakterizə edən C.Məmmədov həmin dövrdə milli dirçəliş, demokratikləşmə, maarifçilik və xeyriyyəçilik hərəkatlarında din xadimlərinin fəal iştirak etdiyini söyləyib. Məruzədə Şeyxülislam Pişnamazzadə və Ağa Əlizadə haqqında məlumat verilib və din xadimlərinin razılığı ilə 1917-ci ilin aprelində Qafqaz Müsəlmanlarının Qurultayının keçirildiyi, 1918-ci il 1 sentyabr tarixli qərar ilə hər iki məzhəb idarəsinin “Məşixət” adlanan vahid bir idarədə birləşdirilməsindən də danışılıb.
Sovet İttifaqı dövründə Azərbaycanda dini ibadət ocaqlarının dağıdıldığını, dini ibadətlərin yasaq olunduğunu bildirən C.Məmmədov ümummilli lider Heydər Əliyevin respublika rəhbərliyinə qayıdışından sonra ölkədə din sahəsinə xüsusi qayğı göstərildiyini, ölkə vətəndaşlarının dini etiqad və vicdan azadlığının təmin olunduğunu, bu sahə ilə bağlı qanunvericilik aktlarının beynəlxalq hüquq normalarına uyğunlaşdırıldığını qeyd edib. Vurğulanıb ki, Ümummilli Liderin hakimiyyəti dövründə ibadət ocaqlarına, dini icmaların fəaliyyətinə, dini ayinlərin icrasına, dini təyinatlı ədəbiyyatın nəşrinə və yayılmasına qoyulmuş qadağalar aradan qaldırılıb, yeni ibadət evlərinin və dini təhsil müəssisələrinin əsası qoyulub. Azərbaycan əhalisinin böyük əksəriyyətini müsəlmanlar təşkil etməsinə baxmayaraq, ölkə Konstitusiyasında bütün dini etiqad və təlimlərin qanun qarşısında bərabər olduğunu qeyd edən alim qanunvericiliyə əsasən ölkədə hər hansı bir dinin digərindən üstün olmadığını bildirib.
Məruzədə Ümummilli Liderin siyasi kursunun davamçısı Prezident İlham Əliyevin və birinci xanım Mehriban Əliyevanın Azərbaycanın dünya ölkələri sırasında öz layiqli yerini tutması, milli-mənəvi dəyərlərimizin qorunmasında, xüsusilə tolerantlığın və multikultural ənənələrin inkişaf etdirilərək dünyaya çatdırılmasındakı xüsusi xidmətləri vurğulanıb. Qeyd olunub ki, ölkəmizdə aparılan uğurlu dövlət-din siyasəti sayəsində xalqımızın əsrlərin sınağından çıxan milli adət-ənənələrinin yaşadılması üçün bütün lazımi şərait yaradılıb. Məhz bu baxımdan, ölkədəki dövlət-din münasibətləri beynəlxalq hüquq normaları çərçivəsində tənzimlənib, müxtəliflik harmoniyası qorunub saxlanılıb və daha da möhkəmləndirilib.
Seminar məruzə ətrafında müzakirələrlə başa çatıb.