CƏMİYYƏT


Dövlət gənclər siyasəti ədliyyə orqanlarında uğurla həyata keçirilir

Bakı, 2 fevral, AZƏRTAC

Ümummilli lider Heydər Əliyevin Azərbaycan gəncliyinə bəxş etdiyi 2 fevral - Gənclər Günü ədliyyə orqanlarında geniş qeyd olunub.

Ədliyyə Nazirliyinin mətbuat xidmətindən AZƏRTAC-a bildiriblər ki, bu münasibətlə nazirliyin aparatında və struktur qurumlarında silsilə tədbirlər təşkil edilib, o cümlədən gənc əməkdaşlarla və könüllülərlə yığıncaqlar keçirilib, muzeylərlə tanışlıq olub, Azərbaycan Gəncləri Gününə həsr olunmuş fotoslaydlar nümayiş etdirilib.

Tədbirlərdə təməli Ulu Öndər tərəfindən qoyulmuş dövlət gənclər siyasətinin bu gün Prezident İlham Əliyevin rəhbərliyi ilə uğurla inkişaf etməsindən, dövlətçiliyə sadiq, sağlam düşüncəli, müasir Azərbaycan gəncliyinin formalaşmasından və onların ictimai həyatın bütün sahələrində fəal iştirakından bəhs olunub.

Bildirilib ki, dövlət siyasətinə uyğun olaraq, ədliyyə orqanlarında gənclər geniş təmsil olunur, onlara xüsusi qayğı ilə yanaşılır, işlə təminatı daim diqqətdə saxlanılıb. Son illər 2500-ə yaxın gənc şəffaf seçimlər əsasında ədliyyə orqanlarına qulluğa qəbul olunub. Həmçinin onlarla hazırlıqlı mütəxəssis vəzifədə irəli çəkilib, nazirliyin aparatına təyinatlar alıb. Hazırda növbəti açıq müsabiqədən uğur qazanmış 95 namizəd peşə fəaliyyətinə buraxılışla əlaqədar Ədliyyə Akademiyasında icbari təlim keçir.

Bu gün ədliyyə sistemində çalışan işçilərin təxminən yarısını gənclər təşkil edir və onlar ədliyyənin müxtəlif sahələrində uğurla fəaliyyət göstərirlər. Dövlətimizin başçısının təşəbbüsü ilə yaradılmış könüllülər institutunun təşviqinə xüsusi diqqət yetirilərək, son bir ildə 250-dək gənc ədliyyə orqanlarında və məhkəmələrdə könüllü fəaliyyətə cəlb olunub.

Dövlətimizin başçısının penitensiar xidmətin fəaliyyətinin təkmilləşdirilməsi ilə bağlı tapşırığına uyğun olaraq xidmətin kadr korpusunun möhkəmləndirilməsi üzrə tədbirlər görülür, bu ərəfədə 40-dək gənc icbari təlimdən müvəffəqiyyətlə keçərək penitensiar xidmətə təyinat alıb. Onlara ilk xüsusi rütbələr verilib, daha 75 nəfər isə hazırda Ədliyyə Akademiyasında icbari təlim keçir.

Əlamətdar gün münasibətilə ədliyyə naziri Fikrət Məmmədov təyinat alan yeni əməkdaşlarla görüş keçirib.

Dövlətimizin gənclərin hərtərəfli inkişafına yüksək qayğısından bəhs edən nazir Prezident İlham Əliyevin cəza siyasətinin humanistləşdirilməsinə dair 2017-ci il 10 fevral tarixli Sərəncamı, habelə penitensiar xidmətdə qulluq keçmənin xüsusiyyətləri barədə məlumat verib, gənclərin işlərində məsuliyyətli olmasını, qanunçuluq, insan hüquqları, humanizm prinsiplərinə, nizam-intizama, etik davranış qaydalarına dönmədən əməl olunmasını, korrupsiya və digər neqativ halların yolverilməzliyini vurğulayıb, gənclərə xidməti vəzifələrini layiqincə yerinə yetirmələri barədə tövsiyə və tapşırıqlarını verib, uğurlu fəaliyyət arzulayıb.

Gənclər hərtərəfli dövlət qayğısı ilə əhatə olunduqlarını qeyd edərək ölkəmizin tərəqqisinin və əmin-amanlığının təmin olunması, hüquqi dövlətin inkişafı naminə Azərbaycan Prezidentinin ətrafında sıx birləşərək yorulmaz fəaliyyətində layiqli yardımçı olacaqlarını vurğulayıb, onlara göstərilən yüksək etimadı doğruldacaqlarına, ədliyyə işçisi adını şərəflə daşıyacaqlarına və uca tutacaqlarına söz veriblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.