Zaqatala, 15 fevral, Mustafa Dadaşov, AZƏRTAC

Azərbaycan Prezidenti İlham Əliyevin 2016-cı il 11 aprel tarixli Sərəncamı ilə yaradılmış “Ərzaq məhsullarının tədarükü və təchizatı” ASC-nin əsas fəaliyyət istiqaməti ölkənin aqrar sektorunun inkişafına təkan verməkdir. Fəaliyyətə başlamasından qısa vaxt keçməsinə baxmayaraq, cəmiyyətin paytaxtla yanaşı, 12 regionda bölmələri, həmçinin 46 rayonda dayaq məntəqələri yaradılıb. Mərkəzi Bakıda olmaqla, 12 rayonda xüsusi təyinatlı, dünya standartlarına cavab verən soyuducu tipli depo-anbarlar qurularaq istifadəyə verilib. Anbarlar ölkədə istehsal olunan bütün növ ərzaq məhsullarının uzunmüddətli, keyfiyyətli saxlanma şəraiti ilə təmin edilib. Ötən dövrdə dövlət büdcəsindən maliyyələşən satınalan təşkilatlarla (körpələr evi-uşaq bağçaları, xəstəxanalar və s.) 825 müqavilə bağlanılıb. Mərkəzi və yerli icra hakimiyyəti orqanlarının ərzaq tələbatının təmin edilməsi üçün 1835 təchizat nöqtəsi yaradılıb.

AZƏRTAC xəbər verir ki, bu barədə “Ərzaq məhsullarının tədarükü və təchizatı” ASC-nin təşkilatçılığı ilə fevralın 15-də Zaqatala şəhərindəki Heydər Əliyev Mərkəzində keçirilən regional müşavirədə məlumat verilib.

Satınalan təşkilatların təchizat səviyyəsini öyrənmək məqsədi ilə keçirilən maarifləndirici tədbirdə Balakən, Zaqatala və Qax rayonlarında fəaliyyət göstərən dövlət satınalan təşkilatların və yerli icra strukturlarının nümayəndələri iştirak ediblər.

Tədbirdə Zaqatala Rayon İcra Hakimiyyətinin başçısı Mübariz Əhmədzadə çıxış edərək, rayonda aqrar sektorun, o cümlədən kənd təsərrüfatının ənənəvi sahələrindən olan tütünçülük, baramaçılıq, gülçülük və fındıqçılığın inkişafı istiqamətində həyata keçirilən genişmiqyaslı tədbirlərdən, həmçinin əhalinin keyfiyyətli ərzaq məhsulları ilə təmin edilməsi istiqamətində görülən işlərdən danışıb.

Müşavirədə “Ərzaq məhsullarının tədarükü və təchizatı” ASC İdarə heyətinin sədr müavini Xaliq Məmmədov son illər dövlətimizin başçısının rəhbərliyi ilə qeyri-neft sektorunda həyata keçirilən inkişafdan söz açıb. Bildirilib ki, cəmiyyətin yaradılması aqrar sektorda tədarük zəncirinin formalaşdırılmasına, fermerlərin istehsal etdikləri məhsulların tədarük olunmasına, eləcə də satınalan müəssisələrin təchizat səviyyəsinin yüksəldilməsinə səbəb olacaq. Cəmiyyətin qarşısına kənd təsərrüfatı məhsullarının istehsalını və ya emalını stimullaşdırmaq, ərzaq məhsullarının keyfiyyətini daha da artırmaq, dövlət vəsaitlərindən səmərəli istifadəni təmin etmək, regionlarda kənd təsərrüfatı ilə məşğul olan əhalinin sosial rifahının yaxşılaşdırılmasına zəmin yaratmaq, dövlət sifarişi ilə ərzaq məhsullarının satın alınmasının mərkəzləşdirilmiş qaydada həyata keçirilməsini təmin etmək kimi məqsədlər qoyulub.

Diqqətə çatdırılıb ki, cəmiyyət 2017-ci ilin əvvəlindən etibarən satınalan təşkilatların (təhsil müəssisələri, körpələr evi-uşaq bağçaları, xəstəxanalar, hərbi hissələr və digər dövlət obyektləri) təchizatının həyata keçirilməsinə başlayıb.

Qeyd olunub ki, bütün bölgələrdə keçirilən belə görüşlər regionlarda istehsal-tədarük potensialının aşkara çıxarılması, bölgədə istehsal olunan məhsulların dövlət satınalan təşkilatlarının ərzaq ehtiyacına yönəldilməsi məqsədi daşıyır. Bildirilib ki, hər bir bölgədə yerləşən təhsil müəssisələrinin, körpələr evi-uşaq bağçalarının, xəstəxanaların, eləcə də hərbi hissələrin ərzaq təminatı həmin bölgənin istehsal imkanları hesabına təmin olunarsa, rayonlara böyük həcmdə vəsaitlər daxil olacaq. Əsas məqsəd büdcə vəsaitlərinə qənaət, şəffaflığın təmin olunması, yerli istehsalın dəstəklənməsidir.

Regional görüşdə satınalan təşkilatların ərzaq məhsullarına tələbatı elektron portalından (tedaruk.az) istifadə qaydaları, qeydiyyatdan keçmə prosedurları ilə bağlı təlimatlar izah olunub.

Tədbir iştirakçılarının mövzu ilə bağlı çoxsaylı sualları cavablandırılıb, portalla işləmək bacarıqları ətraflı şərh edilib.

Sonda satınalan təşkilatların nümayəndələri tədarük-təchizat səviyyəsinin yüksəldilməsi ilə bağlı təkliflərini səsləndiriblər.